କେନ୍ଦ୍ର ଶିକ୍ଷା ମନ୍ତ୍ରୀଙ୍କ ଦ୍ୱାରା ଅନୁଗୁଳ ଓ ଢେଙ୍କାନାଳରେ ଟାଟା ଷ୍ଟିଲ୍ ଫାଉଣ୍ଡେସନର ବିଭିନ୍ନ ପ୍ରକଳ୍ପ ଲୋକାର୍ପିତ

ନରେନ୍ଦ୍ରପୁର, ୨୭/୦୮/୨୦୨୫: ମାନ୍ୟବର କେନ୍ଦ୍ର ଶିକ୍ଷା ମନ୍ତ୍ରୀ ଶ୍ରୀ ଧର୍ମେନ୍ଦ୍ର ପ୍ରଧାନ ଆଜି ଅନୁଗୁଳ ଜିଲ୍ଲାର ବଅଁରପାଳ ନିକଟସ୍ଥ ଯୋରାଗାଡ଼ିଆଠାରେ ଟାଟା ଷ୍ଟିଲ୍ ଫାଉଣ୍ଡେସନ (ଟିଏସ୍‌ଏଫ୍‌)ର ବିଭିନ୍ନ ଗୋଷ୍ଠୀ ଉନ୍ନୟନ ଉପକ୍ରମର ଶୁଭାରମ୍ଭ ସହ ଭିତ୍ତିପ୍ରସ୍ତର ସ୍ଥାପନ କରିଛନ୍ତି। ମାନ୍ୟବର କେନ୍ଦ୍ରମନ୍ତ୍ରୀ ଏଠାରେ ଜାତୀୟ ରାଜପଥ -୫୫ର ଆଲୋକୀକରଣ ଓ ନୂଆହତାରେ ଏକ ସୌର ଚାଳିତ ସଡ଼କ ଆଲୋକୀକରଣ ପ୍ରକଳ୍ପର ଭୂମିପୂଜନ କରିଥିଲେ। ଏହି ଅବସରରେ ଅନ୍ୟ ମାନ୍ୟଗଣ୍ୟ ଅତିଥିମାନେ ଉପସ୍ଥିତ ଥିଲେ। ଇଟାପଠାରୁ ନୂଆହତା ଛକ ପର୍ଯ୍ୟନ୍ତ ଏନଏଚ-୫୫ରେ ୩.୫ କିଲୋମିଟର ପର୍ଯ୍ୟନ୍ତ ରାସ୍ତାରେ ଆଲୋକୀକରଣ ବ୍ୟବସ୍ଥାର ଶିଳାନ୍ୟାସ କରାଯାଇଛି। ହାତୀ ପ୍ରବଣ ଅଂଚଳ ସନ୍ତ୍ରୀ ଛକରୁ ହାତୁରା ପର୍ଯ୍ୟନ୍ତ ୨୦ କିଲୋମିଟର ବ୍ୟାପୀ ସୌର ଶକ୍ତି ଚାଳିତ ସଡ଼କ ଆଲୋକୀକରଣ ବ୍ୟବସ୍ଥାର ଭିତ୍ତିପ୍ରସ୍ତର ସ୍ଥାପନ କରାଯାଇଛି। ଏହି ପ୍ରକଳ୍ପ ଦ୍ୱାରା ସ୍ଥାନୀୟ ଲୋକେ ଉପକୃତ ହେବେ ଏବଂ ଅଙ୍ଗାରକାମ୍ଳ ନିର୍ଗମନ ବାର୍ଷିକ ୩୫ ନିୟୁତ ଟନ୍ ହ୍ରାସ ପାଇବ। ଏଥିସହିତ ଏକାଧିକ ପ୍ରକଳ୍ପର ଲୋକାର୍ପଣ ମଧ୍ୟ କରାଯାଇଛି। ଅନୁଗୁଳର ବଅଁରପାଳ ବ୍ଲକ୍‌ରେ ୧.୨୮ କୋଟି ଟଙ୍କା ବ୍ୟୟରେ ଡ୍ରେନ୍ ବ୍ୟବସ୍ଥା ସହିତ ୧ କିଲୋମିଟରର କଙ୍କ୍ରିଟ୍ ସଡ଼କ, ଡିହସାହିରେ ଏକ ଗୋଷ୍ଠୀ କେନ୍ଦ୍ର ଏବଂ ନୂଆହତା ଗ୍ରାମପଞ୍ଚାୟତରେ ୨ଟି ହାଇମାଷ୍ଟ ଲାଇଟ୍ ଏବଂ ୮୨ଟି ଷ୍ଟ୍ରିଟଲାଇଟର ଲୋକାର୍ପଣ କରାଯାଇଛି। ଢେଙ୍କାନାଳ ଜିଲ୍ଲାର ହିନ୍ଦୋଳରେ ୧ କୋଟି ଟଙ୍କା ବ୍ୟୟରେ ଏକ ସୂଚନା କେନ୍ଦ୍ର, ନରେନ୍ଦ୍ରପୁରରେ ଏକ ନୂଆ ବିଦ୍ୟାଳୟ କୋଠା ଏବଂ ହିନ୍ଦୋଳ ଓ ଓଡ଼ାପଡ଼ା ବ୍ଲକ୍‌ରେ ୮ଟି ହାଇମାଷ୍ଟ ଲାଇଟ ଓ ୧୬୦ଟି ଷ୍ଟ୍ରିଟଲାଇଟ ସ୍ଥାପନ କରାଯାଇଛି। ଗୋଷ୍ଠୀ ଭିତ୍ତିଭୂମି କାର୍ଯକ୍ରମର ଶୁଭାରମ୍ଭ ପୂର୍ବରୁ ମାନ୍ୟବର ମନ୍ତ୍ରୀ ଶ୍ରୀ ଧର୍ମେନ୍ଦ୍ର ପ୍ରଧାନ ଅନ୍ୟ ବିଶିଷ୍ଟ ବ୍ୟକ୍ତିବିଶେଷଙ୍କ ସହ ଟାଟା ଷ୍ଟିଲ ମେରାମଣ୍ଡଳୀର ଜୈବ ବିବିଧତା ପାର୍କ ପରିଦର୍ଶନ କରିଥିଲେ। ଏହି ଅବସରରେ କେନ୍ଦ୍ର ସରକାରଙ୍କ ‘ମାଆ ପାଇଁ ଗଛଟିଏ’ ଅଭିଯାନ ଅଧୀନରେ ସେ ପାର୍କ ଓ ପାରିପାଶ୍ୱିର୍କ ଅଂଚଳରେ ୫୦୦୦ ବୃକ୍ଷରୋପଣ କାର୍ଯକ୍ରମର ଶୁଭାରମ୍ଭ କରିଥିଲେ। ଏହି ସମାରୋହରେ ଅତିଥି ଭାବେ ଅନୁଗୁଳର ମାନ୍ୟବର ବିଧାୟକ ଶ୍ରୀ ପ୍ରତାପ ଚନ୍ଦ୍ର ପ୍ରଧାନ, ପରଜଙ୍ଗ ବିଧାୟକ ଶ୍ରୀ ବିଭୁତି ଭୂଷଣ ପ୍ରଧାନ, କାମାକ୍ଷାନଗର ବିଧାୟକ ଶତ୍ରୁଘ୍ନ ଜେନା, ଅନୁଗୁଳ ଆଞ୍ଚଳିକ ବନ ସଂରକ୍ଷକ ଡ଼ ସଞ୍ଜୟ କୁମାର ସ୍ଵାଇଁ, ତାଳଚେର ଏନସିଆର ଆଇଜିପି ସତ୍ୟବ୍ରତ ଭୋଇ, ଅନୁଗୁଳ ଜିଲ୍ଲାପାଳ ଓ ଜିଲ୍ଲା ମାଜିଷ୍ଟ୍ରେଟ୍ ଶ୍ରୀ ଅବଦାଲ ମୁହମ୍ମଦ ଅଖତର, ଢେଙ୍କାନାଳର ଜିଲ୍ଲାପାଳ ଓ ଜିଲ୍ଲା ମାଜିଷ୍ଟ୍ରେଟ୍ ଶ୍ରୀ ଆଶିଷ ଇଶ୍ଵର ପାଟିଲ, ଢେଙ୍କାନାଳ ଜିଲ୍ଲା ଆରକ୍ଷୀ ଅଧୀକ୍ଷକ ଶ୍ରୀ ଅଭିନବ ସୋନକର, ଅନୁଗୁଳର ଆରକ୍ଷୀ ଅଧୀକ୍ଷକ ଶ୍ରୀ ରାହୁଲ ଜୈନ, ଅନୁଗୁଳ ବନଖଣ୍ଡ ଅଧିକାରୀ ଶ୍ରୀ ନିତୀଶ କୁମାର, ଢେଙ୍କାନାଳ ବନଖଣ୍ଡ ଅଧିକାରୀ ଶ୍ରୀ ସୁମିତ କୁମାର କରଙ୍କ ସମେତ ଟାଟା ଷ୍ଟିଲ୍ ମେରାମଣ୍ଡଳୀର ଉପସଭାପତି (ଅପରେସନ୍ସ) ଶ୍ରୀ ଉତ୍ତମ ସିଂହ ଓ ଟାଟା ଷ୍ଟିଲ୍ ଉପସଭାପତି (କର୍ପୋରେଟ୍ ସେବା) ତଥା ଟାଟା ଷ୍ଟିଲ ଫାଉଣ୍ଡେସନର ନିର୍ଦ୍ଦେଶକ ଶ୍ରୀ ଡି ବି ସୁନ୍ଦର ରମମ ଉପସ୍ଥିତ ଥିଲେ। ଏହି ଅବସରରେ ମାନ୍ୟବର କେନ୍ଦ୍ର ଶିକ୍ଷା ମନ୍ତ୍ରୀ ଶ୍ରୀ ଧର୍ମେନ୍ଦ୍ର ପ୍ରଧାନ କହିଛନ୍ତି ଯେ, “ରାଷ୍ଟ୍ରୀୟ ଆବଶ୍ୟକତା ଦୃଷ୍ଟିରୁ କଳ କାରଖାନା ହେବ, ହେଲେ ପରିବେଶ ସୁରକ୍ଷା ସମସ୍ତଙ୍କ ପାଇଁ ଅତ୍ୟଧିକ ଗୁରୁତ୍ୱପୂର୍ଣ୍ଣ। ପରିବେଶ ସନ୍ତୁଳନ ରକ୍ଷା କରିବା ପାଇଁ ଗଛ ଲଗାଇବା ନିହାତି ଆବଶ୍ୟକ। ଆଜି ଟାଟା କମ୍ପାନୀ ପକ୍ଷରୁ ଆୟୋଜିତ କାର୍ଯ୍ୟକ୍ରମରେ ମୋତେ ୫୦୦୦ ଗଛ ଲଗାଇବାର ସୌଭାଗ୍ୟ ମିଳିଲା। ଶିଳ୍ପାଞ୍ଚଳବାସୀ ଓ ଆମ ରାଜ୍ୟର ପ୍ରତ୍ଯେକ ନାଗରିକଙ୍କୁ ନିଜ ପ୍ରୟାସରେ ଗଛ ଲଗାଇବା ପରିବେଶ ସୁରକ୍ଷାରେ ସାମିଲ ହୁଅନ୍ତୁ। ଆମେ ସମସ୍ତେ ଏକାଠି ହୋଇ ବଡ ପରିବର୍ତ୍ତନ କରିବା ପାଇଁ ମୁଁ ଆହ୍ଵାନ ଦେଉଛି।“ ଟାଟା ଷ୍ଟିଲ୍ ମେରାମଣ୍ଡଳୀର ଉପସଭାପତି (ଅରେସନ୍ସ) ଶ୍ରୀ ଉତ୍ତମ ସିଂହ କହିଛନ୍ତି ଯେ, “ଗୋଷ୍ଠୀ କଲ୍ୟାଣ ସହ ମିଳିତ ଭାବେ ବିକାଶଧାରା ଆଗକୁ ବଢ଼ିବା ଉଚିତ ବୋଲି ଟାଟା ଷ୍ଟିଲ୍‌ ମେରାମଣ୍ଡଳୀ ବିଶ୍ୱାସ କରେ। ଆମ ଅଭିବୃଦ୍ଧି ଯାତ୍ରାର ଅଭିନ୍ନ ଅଙ୍ଗ ପାଲଟିଥିବା ଲୋକମାନଙ୍କ ଦୀର୍ଘକାଳୀନ ସୁବିଧା ପାଇଁ ଏହି ସୁରକ୍ଷିତ ସଡ଼କ, ଉତ୍ତମ ସୁବିଧା ସୁଯୋଗ ଏବଂ ଉନ୍ନତ ସାମାଜିକ ଭିତ୍ତିଭୂମି ପ୍ରକଳ୍ପଗୁଡିକର ଶୁଭାରମ୍ଭ କରାଯାଇଛି।’’ ଟାଟା ଷ୍ଟିଲ୍ ଉପସଭାପତି (କର୍ପୋରେଟ୍ ସେବା) ତଥା ଟାଟା ଷ୍ଟିଲ ଫାଉଣ୍ଡେସନର ନିର୍ଦ୍ଦେଶକ ଶ୍ରୀ ଡି ବି ସୁନ୍ଦର ରାମମ କହିଛନ୍ତି ଯେ, “ଏହି ଅଞ୍ଚଳରେ ସ୍ଥାୟୀ ଓ ଅର୍ନ୍ତଭୁକ୍ତୀକରଣ ବିକାଶ ସୃଷ୍ଟି କରିବା ଲାଗି ଟାଟା ଷ୍ଟିଲ୍ ଫାଉଣ୍ଡେସନ ପ୍ରତିବଦ୍ଧ। ସୁରକ୍ଷା, ଶିକ୍ଷା ଓ ଗୋଷ୍ଠୀ ବିକାଶ ଭଳି ଅତ୍ୟାବଶ୍ୟକ ଆବଶ୍ୟକତା ପୂରଣ କରି ଆମେ ସେବା କରୁଥିବା ଅଂଚଳରେ ଲୋକମାନଙ୍କୁ ସଶକ୍ତ କରିବା ସହ ସାମାଜିକ ସମ୍ବନ୍ଧକୁ ଆହୁରି ସୁଦୃଢ କରିବାକୁ ଆମେ ଲକ୍ଷ୍ୟ ରଖିଛୁ।’’ କାର୍ଯ୍ୟକ୍ରମରେ ଆଖପାଖ ଗ୍ରାମବାସୀଙ୍କ ସମେତ ବରିଷ୍ଠ ସରକାରୀ ଅଧିକାରୀ, ଟାଟା ଷ୍ଟିଲ ଓ ଟାଟା ଷ୍ଟିଲ ଫାଉଣ୍ଡେସନର କର୍ମଚାରୀମାନେ ସାମିଲ ହୋଇଥିଲେ।