୨୦୨୧ ମସିହାରେ ସାରା ଓଡ଼ିଶାକୁ ଦୋହଲାଇ ଦେଇଥିବା ଚର୍ଚ୍ଚିତ ଝରାଫୁଲ ହତ୍ୟା ମାମଲାରେ ସୋମବାର ଦିନ କୋର୍ଟ ଶେଷ ନିଷ୍ପତ୍ତି ଶୁଣାଇଛନ୍ତି। ଯାଜପୁର ଅତିରିକ୍ତ ଜିଲ୍ଲା ଜଜ୍ କୋର୍ଟ ଏହି ଘଟଣାର ମୁଖ୍ୟ ଅଭିଯୁକ୍ତ ରାକେଶ ସ୍ୱାଇଁକୁ ଆଜୀବନ ଜେଲ୍ ଦଣ୍ଡ ଦେଇଛନ୍ତି। ଏହା ସହିତ ତାକୁ ୧ ଲକ୍ଷ ଟଙ୍କା ଜରିମାନା କରାଯାଇଛି, ଯଦି ସେ ଏହି ଟଙ୍କା ନଦିଏ ତେବେ ତାକୁ ଅଧିକ ଦିନ ଜେଲ୍ରେ ରହିବାକୁ ପଡ଼ିବ। ଅନ୍ୟପଟେ, ପ୍ରମାଣ ନଷ୍ଟ କରିବା ଓ ଅପରାଧରେ ସାହାଯ୍ୟ କରିବା ପାଇଁ ତାର ସହଯୋଗୀ ଅମରେଶ ରାଉତକୁ ୫ ବର୍ଷ ଜେଲ୍ ଦଣ୍ଡ ମିଳିଛି। ସାକ୍ଷୀମାନଙ୍କ କଥା ଓ ପୋଲିସର ପ୍ରମାଣକୁ ଭଲଭାବେ ଯାଞ୍ଚ କରିବା ପରେ କୋର୍ଟ ଏହି ବଡ଼ ରାୟ ଦେଇଛନ୍ତି।
ରମାଦେବୀ କଲେଜର ଛାତ୍ରୀ ଝରାଫୁଲ ନାୟକଙ୍କୁ ୨୦୨୧ ସାଧାରଣତନ୍ତ୍ର ଦିବସ (ଜାନୁଆରୀ ୨୬) ଦିନ ହତ୍ୟା କରାଯାଇଥିଲା। ପୋଲିସ ତଦନ୍ତରୁ ଜଣାପଡ଼ିଥିଲା ଯେ ତାର ପୁରୁଷ ବନ୍ଧୁ ରାକେଶ ସ୍ୱାଇଁ ଭୁବନେଶ୍ୱରରେ ତାଙ୍କୁ ମାରିଦେଇଥିଲା। ପରେ ସେ ଅମରେଶ ସହ ମିଶି ଗାଡ଼ିରେ ଶବକୁ ପ୍ରାୟ ୧୦୦ କିଲୋମିଟର ଦୂର ଯାଜପୁରକୁ ନେଇଯାଇଥିଲା ଏବଂ ପାପ ଲୁଚାଇବା ପାଇଁ କୁଆଖିଆ ଥାନା ପାଖରେ ଫିଙ୍ଗି ଦେଇ ପଳାଇଥିଲା। ପୋଲିସ୍ ସିସିଟିଭି ଫୁଟେଜ୍ ଓ ମୋବାଇଲ୍ ଡାଟା ଚେକ୍ କରି ଏହି ପୂରା ଘଟଣାର ପର୍ଦ୍ଦାଫାଶ କରିଥିଲା। ଏହି ରାୟ ଆସିବା ପରେ ନ୍ୟାୟ ପାଇଁ ବର୍ଷ ବର୍ଷ ଧରି ଚାହିଁ ରହିଥିବା ଝରାଫୁଲଙ୍କ ପରିବାରକୁ ଶେଷରେ ଆଶ୍ୱସ୍ତି ମିଳିଛି।
About the Author
