ଓଡ଼ିଶାର ଗଞ୍ଜାମ, ମୟୂରଭଞ୍ଜ ଏବଂ ସୁନ୍ଦରଗଡ଼ ଜିଲ୍ଲାରେ ଘଟିଥିବା ତିନୋଟି ପୃଥକ ସଡ଼କ ଦୁର୍ଘଟଣାରେ ୨ ଜଣଙ୍କର ମୃତ୍ୟୁ ଘଟିଥିବା ବେଳେ ପ୍ରାୟ ୩୫ ଜଣ ଆହତ ହୋଇଛନ୍ତି। ପ୍ରଥମ ଦୁର୍ଘଟଣାଟି ଗଞ୍ଜାମ ଜିଲ୍ଲାର କୋଦଳା-ଖଲ୍ଲିକୋଟ ରୋଡ୍ରେ ଥିବା ବାଲି ଢାବା ନିକଟରେ ଆଜି ସକାଳ ପ୍ରାୟ ୬ଟା ବେଳେ ଘଟିଛି। ଏଠାରେ ‘ଦୁର୍ଗା ମାଧବ’ ନାମକ ଏକ ଘରୋଇ ଯାତ୍ରୀବାହୀ ବସ୍ ଏବଂ ଏକ ଟ୍ରକ ମଧ୍ୟରେ ମୁହାଁମୁହିଁ ଧକ୍କା ହୋଇଥିଲା। ବସ୍ଟି ପୋଲସରାରୁ ପୁରୀ ଅଭିମୁଖେ ଯାଉଥିବା ବେଳେ ଏହି ଅଘଟଣ ଘଟିଥିଲା। ଫଳରେ ଟ୍ରକ ଚାଳକଙ୍କର ଘଟଣାସ୍ଥଳରେ ହିଁ ମୃତ୍ୟୁ ହୋଇଛି ଏବଂ ବସର ୧୫ ଜଣ ଯାତ୍ରୀ ଆହତ ହୋଇଛନ୍ତି। ସେମାନଙ୍କ ମଧ୍ୟରୁ ଦୁଇଜଣଙ୍କ ଅବସ୍ଥା ଗୁରୁତର ରହିଛି।
ଦ୍ୱିତୀୟ ଦୁର୍ଘଟଣାଟି ମୟୂରଭଞ୍ଜ ଜିଲ୍ଲା ବେତନଟୀ ଥାନା ଅନ୍ତର୍ଗତ ୧୮ ନମ୍ବର ଜାତୀୟ ରାଜପଥର ନନ୍ଦସୋଳ ଛକ ନିକଟରେ ଘଟିଛି। ବିଳମ୍ବିତ ରାତିରେ ଚିତ୍ରଡ଼ା ଅଞ୍ଚଳରୁ ଏକ ବାହାଘର ଭୋଜି ଖାଇ ଫେରୁଥିବା ଏକ ବୋଲେରୋ ଗାଡ଼ି ଭାରସାମ୍ୟ ହରାଇ ଏକ କଣ୍ଟେନର ସହ ଧକ୍କା ହେବା ଫଳରେ ଓଲଟି ପଡ଼ିଥିଲା। ରାସ୍ତାରେ ଥିବା ଏକ ଡାଇଭର୍ସନ ବୁଲିବା ବେଳେ ଡ୍ରାଇଭରଙ୍କ ମନଯୋଗ ହଟିଯିବାରୁ ଏହି ଦୁର୍ଘଟଣା ଘଟିଥିବା ଆହତ ଯାତ୍ରୀମାନେ କହିଛନ୍ତି। ଏଥିରେ ପ୍ରାୟ ୧୩ ଜଣ ବ୍ୟକ୍ତି ଆହତ ହୋଇଛନ୍ତି। ସମସ୍ତ ଆହତଙ୍କୁ ଚିକିତ୍ସା ପାଇଁ ବାରିପଦା ସ୍ଥିତ ପିଆରଏମ୍ (PRM) ମେଡିକାଲରେ ଭର୍ତ୍ତି କରାଯାଇଛି ଏବଂ ବର୍ତ୍ତମାନ ସେଠାରେ ୮ ଜଣ ଚିକିତ୍ସିତ ହେଉଛନ୍ତି।
ତୃତୀୟ ଦୁର୍ଘଟଣାଟି ସୁନ୍ଦରଗଡ଼ ଜିଲ୍ଲା ତଳସରା ଥାନା ଅଧୀନରେ ଥିବା ଘୋଘର ବୁନ୍ଦେଲ ଜଙ୍ଗଲ ନିକଟରେ ବିଳମ୍ବିତ ରାତିରେ ଘଟିଛି। ବାଲିଶଙ୍କରା ଭାଟିପଡ଼ା ଗ୍ରାମର ତିନିଜଣ ଯୁବକ ଏକ ନମ୍ବର ବିହୀନ ବାଇକ୍ରେ ଘୋଘରକୁ ଏକ ବିବାହ ଭୋଜି ଖାଇବାକୁ ଯାଉଥିବା ବେଳେ ଗାଡ଼ିଟି ଭାରସାମ୍ୟ ହରାଇ ଦୁର୍ଘଟଣାଗ୍ରସ୍ତ ହୋଇଥିଲା। ଏଥିରେ ଶ୍ଲୋକ ବାର୍ଲା (୨୨) ନାମକ ଜଣେ ଯୁବକଙ୍କର ମୃତ୍ୟୁ ଘଟିଥିବା ବେଳେ ଅବିନାଶ ବାର୍ଲା (୨୦) ଏବଂ ଆକାଶ ବାର୍ଲା (୧୯) ଗୁରୁତର ଭାବେ ଆହତ ହୋଇଛନ୍ତି। ଆହତଙ୍କୁ ପ୍ରଥମେ ସବ୍ଡେଗା ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ର ଓ ପରେ ଜିଲ୍ଲା ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତର କରାଯାଇଛି।
About the Author
