ଆନ୍ତର୍ଜାତୀୟ ନର୍ସେସ ଡେ: ଆଧୁନିକ ନର୍ସିଙ୍ଗର ଜନନୀ ତଥା ‘ଲେଡି ୱିଥ ଲ୍ୟାମ୍ପ’ ନାମରେ ଜଣାଶୁଣା ଏହି ମହିୟସୀ ମହିଳାଙ୍କ କାହାଣୀ ବିଷୟରେ ଜାଣନ୍ତୁ

ମେ ୧୨, ୧୮୨୦ରେ ଇଟାଲୀର ଫ୍ଲୋରେନ୍ସ ୱିଲିୟମ ନାଇଟିନଗେଲ ଏବଂ ଫେନିଙ୍କ ଘରେ ଜନ୍ମିତ ଫ୍ଲୋରେନ୍ସ ନାଇଟିନଗେଲ ଇଂଲଣ୍ଡରେ ବଢ଼ିଛନ୍ତି । ଫ୍ଲୋରେନ୍ସ ନାଇଟିନଗେଲଙ୍କୁ ଆଧୁନିକ ନର୍ସିଙ୍ଗର ଜନକ ରୂପେ ମାନ୍ୟତା ଦିଆଯାଇଥାଏ । ତାଙ୍କର ଜନ୍ମଦିବସର ଖାସ ଅବସରରେ ଅନ୍ତରାଷ୍ଟ୍ରିୟ ନର୍ସ ଦିବସ ପାଳନ କରାଯାଇଥାଏ । ଫୋ୍ଲରେନ୍ସଙ୍କୁ ୧୬ ବର୍ଷ ବୟସରେ ହୃଦୟଙ୍ଗମ ହୋଇଯାଇଥିଲା ଯେ ତାଙ୍କର ଜନ୍ମ କେବଳ ସେବା ପାଇଁ ହୋଇଛି ।
କିନ୍ତୁ ଧନବାନ ପିତା ୱିଲିୟମ, ଫ୍ଲୋରେନ୍ସଙ୍କ ଏହି ଇଚ୍ଛାର ଆଦୌ ପସନ୍ଦ କରୁନଥିଲେ । କାରଣ ନର୍ସିଙ୍ଗକୁ ସେହି ସମୟରେ ସମ୍ମ୍‌ାନିତ ପେସା ଭାବେ ଗ୍ରହଣ କରାଯାଉନଥିଲା । ହସପିଟାଲଗୁଡ଼ିକ ବହୁତ ଅପରିଷ୍କାର ଥିଲା । କିନ୍ତୁ ଶେଷରେ ଫ୍ଲୋରେନ୍ସ ସେବା ପାଇଁ ନିଜର ଜିଦିକୁ ବାସ୍ତବରେ ପରିଣତ କଲେ ଏବଂ ୧୮୫୧ରେ ସେ ନର୍ସିଙ୍ଗ ପାଇଁ ନିଜର ପାଠପଢ଼ା ଆରମ୍ଭ କରିଦେଲେ । ୧୮୫୩ରେ ସେ ଲଂଣ୍ଡନରେ ମହିଳାଙ୍କ ପାଇଁ ହସପିଟାଲ ଖୋଲିଲେ ।
୧୮୫୪ରେ ଯେବେ କ୍ରିମିୟାରେ ଯୁଦ୍ଧ ହେଲା ସେତେବେଳେ ବ୍ରିଟିଶ ସୈନିକଙ୍କୁ ରୁଷର ଦକ୍ଷିଣସ୍ଥିତ କ୍ରିମିୟାରେ ଲଢ଼ିବା ପାଇଁ ପଠାଗଲା । ବ୍ରିଟେନ, ଫ୍ରାନ୍ସ ଏବଂ ତୁର୍କୀର ଲଢେଇ ରୁଷ ସହିତ ଥିଲା । ଏହି ଯୁଦ୍ଧରେ ସୈନିକଙ୍କ ଆହତ ଏବଂ ମୃତ୍ୟୁ ହେବାର ଖବର ପାଇବା ପରେ ଫ୍ଲୋରେନ୍ସ ନର୍ସଙ୍କର ଏକ ଟିମ ଧରି ଯୁଦ୍ଧସ୍ଥଳରେ ପହଂଚିଗଲେ । ସେଠାର ଅବସ୍ଥା ବହୁତ ଖରାପ ଥିଲା । ଅପରିଷ୍କାର, ଦୁର୍ଗନ୍ଧ, ଉପକରଣର ଅଭାବ, ବେଡ, ପାନୀୟଜଳର ଅଭାବ ଭଳି ଅନେକ ଅସୁବିଧା ମଧ୍ୟରେ ରୋଗ ଦ୍ରୁତ ଗତିରେ ମାଡ଼ିବାକୁ ଲାଗିଲା ଏବଂ ସୈନିକମାନଙ୍କର ସଂକ୍ରମଣରେ ମୃତ୍ୟୁ ହୋଇଗଲା । ଏଭଳି ସମୟରେ ଫ୍ଲୋରେନ୍ସ ହସପିଟାଲର ଅବସ୍ଥା ସୁଧାରିବା ସହିତ ରୋଗୀମାନଙ୍କର ଗାଧୋଇବା, ଖାଇବା, କ୍ଷତସ୍ଥାନର ଡ୍ରେସିଙ୍ଗ ଆଦି ଉପରେ ବିଶେଷ ଧ୍ୟାନ ଦେଲେ । ଧିରେ ଧିରେ ସୈନିକମାନଙ୍କ ଅବସ୍ଥା ସୁଧୁରିବାରେ ଦେଖାଗଲା ।
ଫ୍ଲୋରେନ୍ସ ଦିନ ରାତି ରୋଗୀଙ୍କ ଉପରେ ନଜର ରଖୁଥିଲେ । ଦିନ ରାତି ଅନିଦ୍ରା ରହି ସୈନିକଙ୍କର ସେବା କରୁଥିଲେ । ସୈନିକଙ୍କୁ ତରଫରୁ ଚିଠି ଲେଖି ଫ୍ଲୋରେନ୍ସ ସେମାନଙ୍କ ପରିବାର ନୀକଟକୁ ପଠାଉଥିଲେ । ରାତିରେ ହାତରେ ଲଣ୍ଠନ ଧରି ସେ ରୋଗୀମାନଙ୍କୁ ଦେଖିବାକୁ ଯାଉଥିଲେ ଏବଂ ଏହି କାରଣରୁ ସୈନିକମାନେ ତାଙ୍କୁ ‘ଲେଡି ୱିଥ ଲ୍ୟାମ୍ପ’ ବୋଲି କହୁଥିଲେ । ଏହା ପରଠାରୁ ସେ ଏହି ନାମରେ ଜଣାଶୁଣା ହେବାକୁ ଲାଗିଲେ ।
୧୩ ଅଗଷ୍ଟ, ୧୯୧୯ରେ ଫ୍ଲୋରେନ୍ସ ନାଇଟିନଗେଲଙ୍କର ନିଧନ ହୋଇଗଲା । ଫ୍ଲୋରେନ୍ସ ନାଇଟିନଗେଲଙ୍କର ସମ୍ମାନରେ ତାଙ୍କର ଜନ୍ମ ଦିବସକୁ ନର୍ସ ଦିବସ ଭାବେ ପାଳନ କରାଗଲା । ଏହି ଖାସ ଅବସରରେ ନର୍ସିଙ୍ଗ କ୍ଷେତ୍ରରେ ଉଲ୍ଲେଖନୀୟ ଯୋଗଦାନ ପାଇଁ ନର୍ସମାନଙ୍କୁ ଫ୍ଲୋରେନ୍ସ ନାଇଟିନଗେଲ ପୁରସ୍କାରରେ ସମ୍ମାନିତ ମଧ୍ୟ କରାଯାଇଥାଏ ।