ରାଜ୍ୟର ଟୁଇନ୍ ସିଟି କଟକ ଏବଂ ଭୁବନେଶ୍ୱରରେ ଏବେ ପେଟ୍ରୋଲ ଓ ଡିଜେଲ ଅଭାବକୁ ନେଇ ସର୍ବତ୍ର ତ୍ରାହି ତ୍ରାହି ରବ ଶୁଣିବାକୁ ମିଳୁଛି। ଗତ କିଛି ଦିନ ହେବ ଇନ୍ଧନ ଯୋଗାଣରେ ଦେଖାଦେଇଥିବା ଅନିୟମିତତା କାରଣରୁ ପରିସ୍ଥିତି ସାଂଘାତିକ ରୂପ ନେଇଛି। ବିଶେଷ କରି କଟକର ପ୍ରମୁଖ ବ୍ୟବସାୟିକ କେନ୍ଦ୍ର ତଥା ଜନଗହଳି ପୂର୍ଣ୍ଣ କନିକା ଛକ ଅଞ୍ଚଳରେ ଥିବା ପେଟ୍ରୋଲ ପମ୍ପ ଗୁଡ଼ିକରେ ଆଖି ଖୋସି ହୋଇଯିବା ଭଳି ଗାଡ଼ି ମୋଟରର ଲମ୍ବା ଧାଡ଼ି ଦେଖିବାକୁ ମିଳିଛି। ତେଲ ବୁନ୍ଦାଏ ପାଇଁ ଲୋକମାନେ ନିଜର ଜରୁରୀ କାମଦାମ ଛାଡ଼ି ଘଣ୍ଟା ଘଣ୍ଟା ଧରି ଖରାରେ ଲାଇନରେ ଠିଆ ହୋଇ ରହିଛନ୍ତି, ଯାହା ଫଳରେ ସାଧାରଣ ଜନଜୀବନ ସମ୍ପୂର୍ଣ୍ଣ ଭାବେ ଅସ୍ତବ୍ୟସ୍ତ ହୋଇପଡ଼ିଛି।
ଅଧିକାଂଶ ପେଟ୍ରୋଲ ପମ୍ପ ଆଗରେ “ନୋ ଷ୍ଟକ୍” କିମ୍ବା “ପେଟ୍ରୋଲ ସରିଯାଇଛି” ବୋର୍ଡ ଝୁଲୁଥିବା ବେଳେ, ଯେଉଁ କେତୋଟି ସ୍ଥାନରେ ତେଲ ମିଳୁଛି ସେଠାରେ ଅସମ୍ଭାଳ ଭିଡ଼ ଜମୁଛି। ଅଫିସ ଯାଉଥିବା କର୍ମଚାରୀ, ପରୀକ୍ଷା ଦେବାକୁ ଯାଉଥିବା ସ୍କୁଲ କଲେଜ ଛାତ୍ରଛାତ୍ରୀ ଏବଂ ଦୈନନ୍ଦିନ ବ୍ୟବସାୟୀମାନେ ନିଜ ଗନ୍ତବ୍ୟ ସ୍ଥଳରେ ଠିକ୍ ସମୟରେ ପହଞ୍ଚି ନପାରି ନାହିଁ ନଥିବା ହଇରାଣ ହେଉଛନ୍ତି। ପରିବହନ ବ୍ୟବସ୍ଥାରେ ବାଧା ଏବଂ ଟେଙ୍କର ଧର୍ମଘଟ ଗୁଜବ ଯୋଗୁଁ ଲୋକଙ୍କ ମନରେ ଛାନିଆ ପଶିଛି। ଫଳରେ ଅନେକ ଗ୍ରାହକ ଆଗୁଆ ଭୟଭୀତ ହୋଇ ଜାରକିନ୍ ଧରି ନିଜ ଗାଡ଼ିର ଟାଙ୍କି ଫୁଲ୍ କରିବାକୁ ପ୍ରତିଯୋଗିତା କରୁଥିବାରୁ ଏହି କୃତ୍ରିମ ଅଭାବ ଆହୁରି ଉଗ୍ର ରୂପ ନେଇଛି। କନିକା ଛକରେ ପରିସ୍ଥିତି ଏପରି ନିୟନ୍ତ୍ରଣ ବାହାରକୁ ଯାଇଛି ଯେ, ଟ୍ରାଫିକ୍ ସମ୍ଭାଳିବା ପାଇଁ ସ୍ଥାନୀୟ ପୋଲିସକୁ ନାକେଦମ୍ ହେବାକୁ ପଡ଼ୁଛି। ତୁରନ୍ତ ରାଜ୍ୟ ସରକାର ଏବଂ ଯୋଗାଣ ବିଭାଗ ଏହି ସ୍ପର୍ଶକାତର ବିଷୟରେ ହସ୍ତକ୍ଷେପ କରି ତୈଳ ଯୋଗାଣକୁ ସ୍ୱାଭାବିକ ନକଲେ ଆଗାମୀ ଦିନରେ ଟୁଇନ୍ ସିଟିରେ ଯୋଗାଯୋଗ ବ୍ୟବସ୍ଥା ସମ୍ପୂର୍ଣ୍ଣ ଠପ୍ ହୋଇଯିବ ବୋଲି ସାଧାରଣ ଜନତା ଚେତାବନୀ ଦେଇଛନ୍ତି।
About the Author
