ଭୁବନେଶ୍ୱର: ଭାରତୀୟ ନିର୍ବାଚନ ଆୟୋଗ (ECI) ଓଡ଼ିଶାରେ ସ୍ୱତନ୍ତ୍ର ଭୋଟର ତାଲିକା ସଂଶୋଧନ (Special Intensive Revision ବା SIR) ପାଇଁ ନୂଆ କାର୍ଯ୍ୟସୂଚୀ ଘୋଷଣା କରିଛନ୍ତି। ଏହି କାର୍ଯ୍ୟସୂଚୀରେ ଆୟୋଗ ଓଡ଼ିଶା ସମେତ ଅନ୍ୟ ୧୫ଟି ରାଜ୍ୟ ଏବଂ ୩ଟି କେନ୍ଦ୍ରଶାସିତ ଅଞ୍ଚଳକୁ ମଧ୍ୟ ସାମିଲ କରିଛନ୍ତି। ଏହି ସଂଶୋଧନ ପ୍ରକ୍ରିୟା ପାଇଁ ଯୋଗ୍ୟତା ତାରିଖ (Qualifying Date) ଜୁଲାଇ ୧ ଧାର୍ଯ୍ୟ କରାଯାଇଥିବା ବେଳେ, ମେ’ ୨୦ ରୁ ମେ’ ୨୯ ତାରିଖ ପର୍ଯ୍ୟନ୍ତ ପ୍ରସ୍ତୁତି, ତାଲିମ ଏବଂ ଛପା କାର୍ଯ୍ୟ ଅନୁଷ୍ଠିତ ହେବ। ଏହାପରେ ବୁଥ୍ ସ୍ତରୀୟ ଅଧିକାରୀ (ବିଏଲ୍ଓ) ମାନେ ମେ’ ୩୦ ତାରିଖରୁ ଘରକୁ ଘର ବୁଲି ତଥ୍ୟ ସଂଗ୍ରହ ପ୍ରକ୍ରିୟା ଆରମ୍ଭ କରିବେ।
ସେହିପରି, ଜୁନ୍ ୨୮ ସୁଦ୍ଧା ମତଦାନ କେନ୍ଦ୍ରଗୁଡ଼ିକର ବ୍ୟବସ୍ଥିତକରଣ ବା ଯୁକ୍ତିଯୁକ୍ତକରଣ ଶେଷ ହେବ ଏବଂ ଜୁଲାଇ ୫ ତାରିଖରେ ଡ୍ରାଫ୍ଟ୍ ବା ଚିଠା ଭୋଟର ତାଲିକା ପ୍ରକାଶ ପାଇବ। ଏହା ପରେ ଲୋକମାନେ ନିଜର ଭୋଟର ପରିଚୟପତ୍ରକୁ ନେଇ ଜୁଲାଇ ୫ ରୁ ଅଗଷ୍ଟ ୪ ତାରିଖ ପର୍ଯ୍ୟନ୍ତ ସେମାନଙ୍କର ଦାବି ଏବଂ ଆପତ୍ତି ଦାଖଲ କରିପାରିବେ। ଏହିସବୁ ଦାବି ଏବଂ ଆପତ୍ତିଗୁଡ଼ିକର ଶୁଣାଣି ତଥା ଫଇସଲା ଜୁଲାଇ ୫ ରୁ ସେପ୍ଟେମ୍ବର ୨ ତାରିଖ ମଧ୍ୟରେ କରାଯାଇ, ଶେଷରେ ସେପ୍ଟେମ୍ବର ୬ ତାରିଖରେ ଚୂଡ଼ାନ୍ତ ଭୋଟର ତାଲିକା ପ୍ରକାଶ ପାଇବ।
ସଦ୍ୟତମ ତଥ୍ୟ (ମେ ୧୨, ୨୦୨୬) ଅନୁଯାୟୀ ଓଡ଼ିଶାରେ ମୋଟ ୩,୩୪,୩୩,୬୫୯ ଜଣ ଭୋଟର ଅଛନ୍ତି। ରାଜ୍ୟରେ ଏହି ସ୍ୱତନ୍ତ୍ର ସଂଶୋଧନ କାର୍ଯ୍ୟ ପାଇଁ ସର୍ବମୋଟ ୩୮,୧୨୩ ଜଣ ବିଏଲ୍ଓ (BLO) ଏବଂ ୮,୩୯୧ ଜଣ ବିଏଲ୍ଏ (BLA) ନିୟୋଜିତ ହେବେ। ବର୍ତ୍ତମାନ ଚାଲୁ ରହିଥିବା ଜନଗଣନା (Census) ପ୍ରକ୍ରିୟା ଏବଂ ସେଥିରେ ନିୟୋଜିତ କର୍ମଚାରୀମାନଙ୍କୁ ଦୃଷ୍ଟିରେ ରଖି ଏହି ତୃତୀୟ ପର୍ଯ୍ୟାୟ ଭୋଟର ତାଲିକା ସଂଶୋଧନର କାର୍ଯ୍ୟସୂଚୀ ନିର୍ଦ୍ଧାରଣ କରାଯାଇଛି, ଯାହାଫଳରେ ଉଭୟ କାର୍ଯ୍ୟ ସୁଚାରୁରୂପେ ପରିଚାଳିତ ହୋଇପାରିବ।
ହିମାଚଳ ପ୍ରଦେଶ, ଜମ୍ମୁ-କାଶ୍ମୀର ଏବଂ ଲଦାଖକୁ ବାଦ୍ ଦେଲେ ଏହି ତୃତୀୟ ପର୍ଯ୍ୟାୟ ପ୍ରକ୍ରିୟାରେ ସମଗ୍ର ଦେଶ ସାମିଲ ହେବ। ଏହି ତିନୋଟି ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳରେ ଦ୍ୱିତୀୟ ପର୍ଯ୍ୟାୟ ଜନଗଣନା ଶେଷ ହେବା ପରେ ଏବଂ ସେଠାକାର ପାଣିପାଗ (ବରଫାବୃତ ଅଞ୍ଚଳ) କୁ ବିଚାରକୁ ନେଇ, ପରବର୍ତ୍ତୀ ସମୟରେ ଏମାନଙ୍କ ପାଇଁ ସ୍ୱତନ୍ତ୍ର କାର୍ଯ୍ୟସୂଚୀ ଘୋଷଣା କରାଯିବ। ତୃତୀୟ ପର୍ଯ୍ୟାୟରେ ୩.୯୪ ଲକ୍ଷରୁ ଅଧିକ ବିଏଲ୍ଓ ଘରକୁ ଘର ବୁଲି ପ୍ରାୟ ୩୬.୭୩ କୋଟି ଭୋଟରଙ୍କ ପାଖରେ ପହଞ୍ଚିବେ ଏବଂ ଏଥିରେ ରାଜନୈତିକ ଦଳଗୁଡ଼ିକ ଦ୍ୱାରା ନିଯୁକ୍ତ ୩.୪୨ ଲକ୍ଷ ବୁଥ୍ ଲେବଲ୍ ଏଜେଣ୍ଟ (ବିଏଲ୍ଏ) ସେମାନଙ୍କୁ ସାହାଯ୍ୟ କରିବେ। ବିଭିନ୍ନ ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳର ଏହି କର୍ମଚାରୀମାନଙ୍କ ତାଲିକା ଆନେକ୍ସର-୨ ରେ ପ୍ରଦାନ କରାଯାଇଛି।
ଭୋଟର ତାଲିକା ସଂଶୋଧନ ହେଉଛି ଏକ ମିଳିତ ପ୍ରୟାସ, ଯେଉଁଥିରେ ଭୋଟର, ରାଜନୈତିକ ଦଳ ଏବଂ ନିର୍ବାଚନ ଅଧିକାରୀମାନେ ସାମିଲ ଅଟନ୍ତି। ଏହି ପ୍ରକ୍ରିୟାରେ ସମ୍ପୂର୍ଣ୍ଣ ସ୍ୱଚ୍ଛତା ବଜାୟ ରଖିବା ନିମନ୍ତେ ପ୍ରତ୍ୟେକ ବୁଥ୍ ପାଇଁ ନିଜର ଏଜେଣ୍ଟ ନିଯୁକ୍ତ କରିବାକୁ ନିର୍ବାଚନ ଆୟୋଗ ସମସ୍ତ ରାଜନୈତିକ ଦଳକୁ ଅନୁରୋଧ କରିଛନ୍ତି। ସୂଚନାଯୋଗ୍ୟ ଯେ, ପୂର୍ବରୁ ୧୩ଟି ରାଜ୍ୟ ଏବଂ କେନ୍ଦ୍ରଶାସିତ ଅଞ୍ଚଳରେ ହୋଇଥିବା ପ୍ରଥମ ଦୁଇଟି ପର୍ଯ୍ୟାୟରେ ପ୍ରାୟ ୫୯ କୋଟି ଭୋଟରଙ୍କୁ ସାମିଲ କରାଯାଇଥିଲା। ଏହି ଦୁଇଟି ପର୍ଯ୍ୟାୟରେ ମୋଟ ୬.୩ ଲକ୍ଷରୁ ଅଧିକ ବିଏଲ୍ଓ ଏବଂ ୯.୨ ଲକ୍ଷରୁ ଅଧିକ ବିଏଲ୍ଏ ସକ୍ରିୟ ଭାବରେ ଅଂଶଗ୍ରହଣ କରିଥିଲେ।
About the Author
