ଡାକ୍ତରଖାନାରେ ଲାଗିଥିଲା ନିଆଁ : ତଥାପି ଚାଲିଥିଲା ଓପନ ହାର୍ଟ ସର୍ଜରୀ, ତାପରେ କଣ ଘଟିଲା ଜାଣନ୍ତୁ
ରୁଷର ବ୍ଲାଗୋଭେଟେନ୍ସ୍କ (Blagoveshchensk) ସହରରୁ ଏପରି ଏକ ମାମଲା ସାମ୍ନାକୁ ଆସିଛି, ଯାହା ଡାକ୍ତରମାନଙ୍କୁ କାହିଁକି ଭଗବାନଙ୍କ ମାନ୍ୟତା ଦିଆଯାଇଥାଏ ସେହି ବକ୍ତବ୍ୟକୁ ଯଥାର୍ଥ କରୁଛି। ଶୁକ୍ରବାର ଦିନ, ବ୍ଲାଗୋଭେଶେନ୍ସ୍କ ସହରର ଏକ ଡାକ୍ତରଖାନାରେ ହଠାତ୍ ଅଗ୍ନିକାଣ୍ଡ ଘଟିଥିଲା। ତେବେ ଡାକ୍ତରଖାନାରେ ନିଆଁ ଲାଗିବା ସମୟରେ ଜଣେ ରୋଗୀଙ୍କର ଅପରେସନ୍ ଥିଏଟରରେ ଓପନ ହାର୍ଟ ସର୍ଜରୀ ଚାଲିଥିଲା।
ଯେତେବେଳେ ଅଗ୍ନିଶମ କର୍ମଚାରୀ ଘଟଣାସ୍ଥଳରେ ପହଞ୍ଚି ଡାକ୍ତରଖାନାରେ ଏକ ଅପରେସନ୍ ଚାଲିଥିବାର ଜାଣିଥିଲେ, ସେମାନେ OT ପର୍ଯ୍ୟନ୍ତ ନିଆଁ କିମ୍ବା ଧୂମ ନପହଂଚିବା ପାଇଁ କଠିନ ପରିଶ୍ରମ କରିଥିଲେ। ପ୍ରକାଶଥାଉ ଯେ ଅଗ୍ନିଶମ କର୍ମଚାରୀମାନଙ୍କୁ ଏହି ନିଆଁ ଲିଭାଇବାକୁ ପ୍ରାୟ ଦୁଇ ଘଣ୍ଟା ସମୟ ଲାଗିଥିଲା। ତେବେ ପରେ ନିଆଁକୁ ନିୟନ୍ତ୍ରଣ କରାଯାଇଥିଲା।
ଏହି ପରିପ୍ରେକ୍ଷୀରେ ଡାକ୍ତରଖାନାର ଡାକ୍ତରମାନେ ଅଗ୍ନିକାଣ୍ଡ ପରେ ମଧ୍ୟ ଅପରେସନ୍ ପ୍ରକ୍ରିୟା ଛାଡି ନଥିଲେ ବରଂ ପ୍ରତିକୂଳ ପରିସ୍ଥିତିରେ ମଧ୍ୟ କାର୍ଯ୍ୟ କରିଥିଲେ। ଡାକ୍ତରମାନେ ତାଙ୍କ ଜୀବନକୁ ବିପଦରେ ପକାଇ ରୋଗୀର ଜୀବନ ବଞ୍ଚାଇବା ଅଧିକ ଗୁରୁତ୍ୱପୂର୍ଣ୍ଣ ମନେ କରିଥିଲେ।
ଅଗ୍ନିଶମ କର୍ମଚାରୀଙ୍କ ଅନୁଯାୟୀ, ଧୂଆଁ ଅପରେସନ୍ ଥିଏଟରରେ ନପହଞ୍ଚିବା ପାଇଁ ସେମାନେ ପଙ୍ଖାର ବ୍ୟବହାର କରିଥିଲେ। ଏଥିସହିତ ଆଠ ଜଣ ଡାକ୍ତର ଏବଂ ନର୍ସଙ୍କ ଟିମ୍ ଅପରେସନ୍ ଶେଷ କରିଥିଲେ। ଜରୁରୀକାଳୀନ ମନ୍ତ୍ରଣାଳୟ ଅନୁଯାୟୀ, ଅପରେସନ୍ ଶେଷ ହେବା ପରେ ରୋଗୀକୁ ଅନ୍ୟ ଡାକ୍ତରଖାନାକୁ ସ୍ଥାନାନ୍ତର କରାଯାଇଥିଲା।
ଏହି ଅସ୍ତ୍ରୋପଚାରରେ ଜଡିତ ଡାକ୍ତର ଭାଲେଣ୍ଟାଇନ୍ ଫିଲାଟୋଭ ସୂଚନା ଦେଇଛନ୍ତି ଏବଂ କହିଛନ୍ତି ଯେ ଆମର ଅନ୍ୟ ବିକଳ୍ପ ନଥିଲା। ଯେକଣସି ପରିସ୍ଥିତିରେ, ଆମକୁ ରୋଗୀକୁ ବଞ୍ଚାଇବାକୁ ଥିଲା ଏବଂ ଏହା ପାଇଁ ଯାହା ହୋଇପାରିଲା ତାହା କରିଥିଲୁ | ଜରୁରୀକାଳୀନ ମନ୍ତ୍ରଣାଳୟ ପକ୍ଷରୁ ସୂଚନା ଦିଆଯାଇଛି ଯେ ଡାକ୍ତରଖାନାରେ ନିଆଁ ଲାଗିବା ମାତ୍ରେ ୧୨୮ ଜଣଙ୍କୁ ତୁରନ୍ତ ଡାକ୍ତରଖାନାରୁ ସ୍ଥାନାନ୍ତର କରାଯାଇଛି। ମନ୍ତ୍ରଣାଳୟ କହିଛି ଯେ ଯେଉଁ କ୍ଲିନିକରେ ନିଆଁ ଲାଗିଥିଲା ତାହା ଏକ ପୁରାତନ କୋଠା। ମନ୍ତ୍ରଣାଳୟ ରିପୋର୍ଟ କରିଛି ଯେ ନିଆଁ କାଠ ଛାତରୁ ବିଜୁଳି ପରି ବ୍ୟାପିଯାଇଥିଲା ।
Comments are closed.