ଆଜିଠାରୁ ଭାରତରେ ସମ୍ପୂର୍ଣ୍ଣ ରୁପେ ବନ୍ଦ ହେବ ପବଜି ମୋବାଇଲ ଗେମ: କମ୍ପାନୀ ପକ୍ଷରୁ ଘୋଷଣା


ଭାରତରେ ପ୍ଲେୟାରମାନଙ୍କର ପ୍ରିୟ ବ୍ୟାଟେଲଗ୍ରାଉଣ୍ଡ ପବଜି କୁ ବିଦାୟ ଦେବାର ସମୟ ଆସିଯାଇଛି | ସୁରକ୍ଷା ଦୃଷ୍ଟିରୁ ଭାରତ ସରକାରଙ୍କ ଦ୍ବାରା ସେପ୍ଟେମ୍ବର ୨ ରେ ନିଷିଦ୍ଧ ହୋଇଥିବା ଉଭୟ ପବଜି ମୋବାଇଲ୍ ଏବଂ ପବଜି ମୋବାଇଲ୍ ଲାଇଟ୍ ଦେଶରେ ଆଉ କାମ କରିବ ନାହିଁ।

ଗୁରୁବାର ଟେନସେଣ୍ଟ କମ୍ପାନି ସୋସିଆଲ ମିଡିଆ ଆକାଉଣ୍ଟରେ ଏହି ଘୋଷଣା କରିଛି | ଭାରତ ସେପ୍ଟେମ୍ବର ୨ରେ ୧୧୮ଟି ଆପ୍ ସହିତ ପବଜି ଖେଳ ଉପରେ ପ୍ରତିବନ୍ଧକ ଲଗାଇଥିଲା | ହେଲେ ପବଜି ନିଷେଧ ହେବା ପରେ ମଧ୍ୟ ଡାଉନଲୋଡ୍ କରିସାରିଥିବା ପ୍ଲେୟରମାନେ ଏହାକୁ ଖେଳିପାରୁଥିଲେ। କିନ୍ତୁ ଆଜିଠାରୁ ତାହା ଅଚଳ ହୋଇଯିବ। ଆପ ଡାଉନଲୋଡ୍ କରି ରଖିଥିଲେ ମଧ୍ୟ ତାହା ଚାଲିବ ନାହିଁ।

ଟେନସେଣ୍ଟ କମ୍ପାନି ଏହି ଖବରକୁ ଅତ୍ୟନ୍ତ ଦୁଃଖର ସହିତ ଘୋଷଣା କରିଛି | ଫେସବୁକ୍ ପୋଷ୍ଟରେ କମ୍ପାନି ଲେଖିଛି ଯେ, ଭାରତରେ ପବଜି ମୋବାଇଲ୍ ଏବଂ ପବଜି ମୋବାଇଲ୍ ଲାଇଟ୍ କୁ ସମର୍ଥନ କରିଥିବାରୁ ଆପଣ ସମସ୍ତଙ୍କୁ ଧନ୍ୟବାଦ। ସେପ୍ଟେମ୍ବର ୨, ୨୦୨୦ରେ ବୈଦ୍ୟୁତିକ ଏବଂ ସୂଚନା ପ୍ରଯୁକ୍ତିବିଦ୍ୟା ମନ୍ତ୍ରାଳୟର ମଧ୍ୟବର୍ତ୍ତୀକାଳୀନ ନିର୍ଦ୍ଦେଶ ପାଳନ କରିବାକୁ ଟେନସେଣ୍ଟ ଗେମ୍ସ ଅକ୍ଟୋବର ୩୦ରୁ ଭାରତରେ ଏହାର ସମସ୍ତ ସେବା ବନ୍ଦ କରୁଛି। ଉପଭୋକ୍ତାମାନଙ୍କ ତଥ୍ୟର ସୁରକ୍ଷାକୁ ଆମେ ସର୍ବଦା ପ୍ରାଥମିକତା ଦେଇଆସିଛୁ | ଆମେ ସବୁବେଳେ ଭାରତରେ ତଥ୍ୟ ସୁରକ୍ଷା ଆଇନ ଏବଂ ନିୟମାବଳୀକୁ ପାଳନ କରିଛୁ। ଆମର ଗୋପନୀୟତା ନୀତିରେ ଦର୍ଶାଯାଇଥିବା ସମସ୍ତ ଉପଭୋକ୍ତାଙ୍କର ଗେମପ୍ଲେ ସୂଚନା ଏକ ସ୍ୱଚ୍ଛ ଢ଼ଙ୍ଗରେ ପ୍ରକ୍ରିୟାକରଣ କରାଯାଏ | ଏହି ଫଳାଫଳକୁ ନେଇ ଆମେ ଗଭୀର ଦୁଃଖିତ ଏବଂ ଭାରତରେ ପବଜି ମୋବାଇଲ୍ ପ୍ରତି ଆପଣଙ୍କର ସମର୍ଥନ ଏବଂ ଭଲ ପାଇବା ପାଇଁ ଆପଣଙ୍କୁ ଅଶେଷ ଧନ୍ୟବାଦ।


Share It

Comments are closed.