ଏମ୍ସ ଭୁବନେଶ୍ୱରରେ ଏବେ ସ୍ୱଳ୍ପ ମୂଲ୍ୟରେ ଅତ୍ୟାଧୁନିକ ଚିକିତ୍ସା

ଭୁବନେଶ୍ବର : କର୍କଟ ରୋଗୀଙ୍କ ପାଇଁ ଖୁସି ଖବର। ଏମ୍‌ସ ଭୁବନେଶ୍ବରରେ ଏବେ ସ୍ବଳ୍ପ ମୂଲ୍ୟରେ ମିଳିପାରିବ କର୍କଟ ରୋଗର ଚିକିତ୍ସା ସୁବିଧା। ଆଜି ଏମ୍‌ସ ଭୁବନେଶ୍ବର ନିର୍ଦ୍ଦେଶିକା ଡ. ବି ଗୀତାଞ୍ଜଳୀ ପେଟ୍‌-ସିଟି ସ୍କାନ ମେସିନ୍‌ ସେବାର ଉଦ୍‌ଘାଟନ କରିଛନ୍ତି। ସମଗ୍ର ପୂର୍ବ ଭାରତରେ ଏମ୍‌ସ ଭୁବନେଶ୍ବର ହେଉଛି ପ୍ରଥମ ଅନୁଷ୍ଠାନ ଯେଉଁଠାରେ ଏପରି ଅତ୍ୟାଧୁନିକ ମେସିନ୍‌ ସ୍ଥାପିତ କରାଯାଇଛି। ଅନୁଷ୍ଠାନର ନ୍ୟୁକ୍ଳିୟାର ମେଡିସିନ୍‌ ବିଭାଗ‌ରେ ଏହି ସେବାର ଉଦ୍‌ଘାଟନ କରିବା ଅବସରରେ ଓଡ଼ିଶାବାସୀଙ୍କୁ ଏହି ସେବା ଯୋଗାଇବାକୁ ଏମ୍‌ସ ଭୁବନେଶ୍ବର ସଫଳ ହୋଇଛି। ସ୍ବଳ୍ପ ମୂଲ୍ୟରେ ଏହି ସେବା ସାଧାରଣ ଜନତାଙ୍କ ପାଇଁ ବିଶେଷ ସ‌ହାୟକ ହେବ ବୋଲି ଡ. ଗୀତାଞ୍ଜଳି ପ୍ରକାଶ କରିଛନ୍ତି।

ଏହି ଅବସରରେ ନ୍ୟୁକ୍ଳିୟାର୍‌ ମେଡିସିନ୍‌ ବିଭାଗ ସମେତ ଏହି ସେବା କାର୍ଯ୍ୟକ୍ଷମ କରିବାରେ ସଂପୃକ୍ତ ଥିବା ସମସ୍ତଙ୍କୁ ଡ. ଗୀତାଞ୍ଜଳୀ ଧନ୍ୟବାଦ ପ୍ରଦାନ କରିଥିଲେ। ଏମ୍‌ସ ଭୁବନେଶ୍ବରରେ ଉଦ୍‌ଘାଟିତ ହୋଇଥିବା ଏହି ଅତ୍ୟାଧୁନିକ ପେଟ୍‌-ସିଟି ମେସିନ୍‌ ୧୨୮-ସ୍ଲାଇସ୍‌ ସିଟି ଏବଂ ଏଲ୍‌ଏସଓ କ୍ରିଷ୍ଟାଲ୍‌ ବିଶିଷ୍ଟ ହୋଇଥିବାବେଳେ ଜ୍ଞାନକୌଶଳ ଦୃଷ୍ଟିରୁ ରାଜ୍ୟ ତଥା ପୂର୍ବ ଭାରତରେ ପ୍ରଥମ ବୋଲି ନ୍ୟୁକ୍ଲିୟାର୍‌ ମେଡିସିନ୍‌ ବିଭାଗର ଆସୋସିଏଟ୍‌ ପ୍ରଫେସର୍‌ ଡ. କହ୍ନେୟା ଅଗରୱାଲା ସୂଚନା ଦେଇଛନ୍ତି। ଏହି ପେଟ୍‌ସିଟି ସ୍କାନ ମେସିନ ଜରିଆରେ କ୍ଷୁଦ୍ରରୁ କ୍ଷୁଦ୍ରତମ ଅବସ୍ଥାରେ ଥିବା କର୍କଟ ରୋଗର ଚିହ୍ନଟ ହୋଇପାରିବ। ଯାହାକି ପୂର୍ବରୁ ପ୍ରଚଳିତ ମେସିନ୍‌ କରିବାରେ ସକ୍ଷମ ନଥିଲା। ସେହିପରି ପାଦରୁ ମୁଣ୍ଡ ପର୍ଯ୍ୟନ୍ତ ଏହି ମେସିନ୍‌ ସ୍କାନ୍‌ କରିବା ସହିତ ଶରୀରର ଯେଉଁଠି ମଧ୍ୟ କର୍କଟ ରୋଗର ସାମାନ୍ୟ ଲକ୍ଷଣ ଥିବ ତା’କୁ ଚିହ୍ନଟ କରିପାରିବ। ଏଥିସହିତ କର୍କଟ ରୋଗ ଉପରେ ଚିକିତ୍ସା ପ୍ରଭାବ ଏବଂ କେଉଁ ଷ୍ଟେଜ୍‌ରେ ରହିଛି, ଏହା ମଧ୍ୟ ଜଣାପଡ଼ିବ।

ରୋଗୀ ଉପରେ ଏହି ମେସିନ୍‌ର ବିକିରଣ(ରେଡିଏସନ୍‌) ପ୍ରଭାବ କମ ରହୁଥିବାବେଳେ ସଠିକ୍‌ ଚିହ୍ନଟ କରିଥାଏ। କ୍ୟାନ୍‌ସର ଅପରେସନ୍‌ ପରେ ପୁନର୍ବାର ଏହି ବ୍ୟାଧି ମଣିଷ ଶରୀରକୁ ଫେରିଛି କି ନାହିଁ ତାହା ମଧ୍ୟ ଚିହ୍ନଟ କରିଥାଏ ଏହି ପେଟ୍‌-ସିଟି ମେସିନ୍‌। ସେହିପରି ହୃଦୟ ଉପରେ ହୃଦ୍‌ଘାତ୍‌ର ପ୍ରଭାବ, ହୃଦୟର କେଉଁ ଅଂଶରେ ଆଞ୍ଜିଓପ୍ଲାଷ୍ଟି ସୁଫଳ ଦେଉଛି ତାହା ମଧ୍ୟ ଏହି ମେସିନ୍‌ ଜରିଆରେ ଜଣାପଡ଼ିଥାଏ। ସାଧାରଣ ମଣିଷର ମସ୍ତଷ୍କ ଏବଂ ହୃଦୟକୁ ସଠିକ୍‌ ଢଙ୍ଗରେ ମାପିବା ସହିତ କେନ୍ଦ୍ରୀୟ ସ୍ନାୟୁବିକ ବ୍ୟବସ୍ଥାରେ ଥିବା ତ୍ରୁଟି, ସ୍ମୃତିଶକ୍ତି ହ୍ରାସ ଆଦିକୁ ଚିହ୍ନଟ କରିବାରେ ଏହି ପେଟ୍‌-ସିଟି ମେସିନ୍‌ ବିଶେଷ ସହାୟକ ହେଉଥିବା ଡ. ଅଗ୍ରୱାଲା ପ୍ରକାଶ କରିଛନ୍ତି।

ଓଡ଼ିଶାରେ ପୂର୍ବରୁ କେବଳ କିଛି ଘରୋଇ ହସ୍‌ପିଟାଲରେ ଏପରି ମେସିନ୍‌ ରହିଛି। ଯାହାକି ବେଶ୍‌ ବ୍ୟୟସାକ୍ଷେପ। ଏହି ସ୍କାନ୍‌ କରିବାକୁ ଯେକୌଣସି ଘରୋଇ ହସ୍‌ପିଟାଲରେ ପ୍ରାୟ ୨୫ହଜାରରୁ ଊର୍ଧ୍ବ ଖର୍ଚ୍ଚ କରିବାକୁ ପଡ଼ୁଥିବାବେଳେ ଏମ୍‌ସ ଭୁବନେଶ୍ବରରେ ଏହା ମାତ୍ର ୭,୫୦୦ ଟଙ୍କାରେ ହୋଇପାରିବ ବୋଲି ପ୍ରକାଶ। ରାଜ୍ୟରେ ବର୍ଷକୁ ବର୍ଷ କର୍କଟ ରୋଗୀଙ୍କ ସଂଖ୍ୟା ବଢ଼ିଚାଲୁଥିବାବେଳେ ଏହାର ଚିହ୍ନଟ ଏବଂ ନିରାକରଣ କ୍ଷେତ୍ରରେ ଏହି ମେସିନ୍‌ ବିଶେଷ ସହାୟକ ହେବ ବୋଲି ଏମ୍‌ସ ଭୁବନେଶ୍ବର ନିର୍ଦ୍ଦେଶିକା ଡ. ଗୀତାଞ୍ଜଳୀ ମତବ୍ୟକ୍ତ କରିଛନ୍ତି। ଏହି ଅବସରରେ ଏମ୍‌ସ ଭୁବନେଶ୍ବର ଅଧୀକ୍ଷକ ପ୍ରଫେସର ଡ. ଏସ ଏନ ମହାନ୍ତି, ଡିନ୍‌ ଡ. ଦେବାଶିଷ ହୋତା, ଡିଡିଏ ପି କେ ରାୟ ପ୍ରମୁଖ ଉପସ୍ଥିତ ଥିଲେ।

Comments are closed.