କରୋନା ଏବଂ ଅମ୍ଫାନ ମଧ୍ୟରେ ଦେଶକୁ ପାକିସ୍ତାନରୁ ମାଡ଼ିଆସିଛି ଆଉ ଏକ ସଂକଟ

ବର୍ଷର ଛଅ ମାସ ମଧ୍ୟ ଯାଇନି ଏବଂ ଏହା ଭିତରେ କରୋନା ଏବଂ ବାତ୍ୟା ଅମ୍ଫାନ ପରେ ଦେଶକୁ ଆଉ ଏକ ସଂକଟ ମାଡ଼ି ଆସିଛି । ରାଜସ୍ଥାନରେ ପଶିଥିବା ପଙ୍ଗପାଳ(ଲୋକଷ୍ଟ) ଏବେ ଦେଶର ଅନ୍ୟ ଅଂଶ ଗୁଡ଼ିକ ଆଡ଼କୁ ମଧ୍ୟ ବଢ଼ିବାରେ ଲାଗିଛନ୍ତି । ଏହି ପାକିସ୍ତାନୀ ଆକ୍ରମଣର ଲକ୍ଷ ଏବେ ୟୁପି, ପଂଜାବ, ହରିୟାଣା ଏବଂ ମଧ୍ୟପ୍ରଦେଶ ଅଟେ । ସାଧାରଣ ଭାବେ ଜୁନ ଜୁଲାଇରେ ଆସୁଥିବା ଏହି ପଙ୍ଗପାଳଗୁଡ଼ିକ ନିଜ ରାସ୍ତାରେ ଆସୁଥିବା ସମସ୍ତ ଫସଲକୁ ସଫା କରି ଦିଲ୍ଲୀ ଆଡ଼କୁ ଅଗ୍ରସର ହେଉଛନ୍ତି ।

ଝଡ଼ ତୋଫାନର ଏହି ମାସରେ ଯେଉଁ ଆଡ଼େ ପବନ ବହିଲା ପଙ୍ଗପାଳମାନେ ସେହି ଦିଗରେ ୨୦୦-୨୦୦ କିମି ପର୍ଯ୍ୟନ୍ତ ଦ୍ରୁତ ଗତିରେ ବଡ଼ିଚାଲିଲେ । ପର୍ଯ୍ୟାବରଣକୁ ଏମାନଙ୍କ ଦ୍ୱାରା ବିପଦ ରହିଛି । ତେଣୁ ମନ୍ତ୍ରଣାଳୟ ପକ୍ଷରୁ ସବୁ ରାଜ୍ୟକୁ ଆଲର୍ଟ କରିଦିଆଯାଇଛି । ଏମାନଙ୍କ କାରଣରୁ ରାଜସ୍ଥାନରେ ଗତ ବର୍ଷ ୧୦୦୦ କୋଟିର କ୍ଷତି ହୋଇଥିଲା । ବିଶେଷଜ୍ଞଙ୍କ କହିବା ଅନୁଯାୟୀ ଏଥର ଏମାନଙ୍କର ଦଳ ଆହୁରି ବଡ଼ ରହିବାର ଆଶଙ୍କା ରହିଛି । ଏମିତିରେ ପୂର୍ବରୁ ହିଁ ସଙ୍କଟ ସହ ଲଢ଼ୁଥିବା କୃଷକମାନଙ୍କର ବହୁତ କ୍ଷତି ହୋଇପାରେ ।

ପଙ୍ଗପାଳମାନେ ରାଜସ୍ଥାନର ଜୈସଲମେର, ବାଡ଼ମେର, ଶ୍ରୀଗଙ୍ଗାନଗର, ଜୋଧପୁରରେ ବାଜି ଏବେ ଦୌସା, ସବାଇମାଧୋପୁର, କରୌଲୀ ଏବଂ ଧୌଳପୁର ପର୍ଯ୍ୟନ୍ତ ପହଂଛିସାରିଛନ୍ତି । ଦୁଇଦିନ ଆଗରୁ ପଙ୍ଗପାଳଙ୍କ ଏକ ଅତ୍ୟଧିକ ବଡ଼ ଦଳ ଶିବାଡ଼ କ୍ଷେତ୍ରରେ ଦୁଇ ଦଳରେ ଭାଗ ହୋଇଯାଇଥିଲେ । ଗୋଟିଏ ଦଳ ଇନ୍ଦ୍ରଗଡ଼ ଲାଖୋରୀ ଆଡ଼ରୁ ତ ଅନ୍ୟ ଏକ ଦଳ ବନାସ ନଦୀ ଆଡ଼ରୁ ମଧ୍ୟପ୍ରଦେଶ ଏବଂ ଉତରପ୍ରଦେଶ ଆଡ଼କୁ ବଢ଼ିଚାଲିଲା । ବିଶ୍ୱ ସ୍ୱାସ୍ଥ୍ୟ ସଂଗଠନ ଚେତାବନୀ ଦେଇଛି ଯେ ଯଦି ଏହି ପତଙ୍ଗ ଗୋଟିଏ ଅଂଚଳରେ ଥରେ ପ୍ରବେଶ କରିଥାଏ, ତେବେ ଏମାନଙ୍କର ପ୍ରକୋପ ତିନି ବର୍ଷ ପର୍ଯ୍ୟନ୍ତ ରହିବ । ଏମାନଙ୍କର ଅଣ୍ଡାରୁ କୋଟି କୋଟି ପରିମାଣରେ ପଙ୍ଗପାଳ ବଢ଼ିଚାଲିବେ ।