ଅଷ୍ଟ୍ରେଲିଆ ବିପକ୍ଷରେ ବିଜୟ ପରେ ଭାରତୀୟ ଡ୍ରେସିଂ ରୁମର ଭିଡିଓ: ‘ବନ୍ଦେ ମାତରମ୍ ଶବ୍ଦ ରେ କମ୍ପିଲା ଷ୍ଟାଡିୟମ
ଚାମ୍ପିୟନ୍ସ ଟ୍ରଫି ୨୦୨୫ରେ ଭାରତ ଅଷ୍ଟ୍ରେଲିଆକୁ ପରାସ୍ତ କରି ୨୦୨୩ ଦିନିକିଆ ବିଶ୍ୱକପ୍ ଫାଇନାଲରେ ହୋଇଥିବା ପରାଜୟର ପ୍ରତିଶୋଧ ନେଇଛି। ଏହି ବିଜୟ ସହ ଭାରତୀୟ ଦଳ ଫାଇନାଲରେ ପହଞ୍ଚିଛି, ଯାହା ଏବେ ଦୁବାଇରେ ଖେଳାଯିବ। ଏହି ବିଜୟ ପରେ ଭାରତୀୟ ଖେଳାଳିଙ୍କ ମୁହଁରେ ଯେଉଁ ଭାବନା ଦେଖିବାକୁ ମିଳିଥିଲା ତାହା ଦର୍ଶାଉଛି ଯେ ଏହି ବିଜୟ ସେମାନଙ୍କ ପାଇଁ କେତେ ମହତ୍ତ୍ୱପୂର୍ଣ୍ଣ। ରୋହିତ ଶର୍ମା, ବିରାଟ କୋହଲି ଓ କେଏଲ ରାହୁଲଙ୍କ ସମେତ ସମସ୍ତ ଖେଳାଳି ଏହି ବିଜୟ ଉତ୍ସବ ପାଳନ କରୁଥିଲେ। ମ୍ୟାଚ୍ ର ଶେଷ ମୁହୂର୍ତ୍ତ ଏବଂ ବିଜୟ ପରେ ମୁହୂର୍ତ୍ତଗୁଡ଼ିକୁ ଦର୍ଶାଇ ବିସିସିଆଇ ଇନଷ୍ଟାଗ୍ରାମରେ ଏକ ଭିଡିଓ ସେୟାର କରିଛି। ଭିଡିଓରେ ରୋହିତ, କୋହଲି ଓ ହାର୍ଦ୍ଦିକ ପାଣ୍ଡ୍ୟା ପରସ୍ପରକୁ ଆଲିଙ୍ଗନ କରି ଜୋରସୋରରେ ସେଲିବ୍ରେସନ କରୁଥିବା ଦେଖିବାକୁ ମିଳିଛି। ଏହି ସମୟରେ ଷ୍ଟାଡିୟମରେ ହଜାର ହଜାର ପ୍ରଶଂସକ ବନ୍ଦେ ମାତରମ୍ ଗାନ କରୁଥିବା ଦେଖିବାକୁ ମିଳିଥିଲା।
ଅଷ୍ଟ୍ରେଲିଆ ପ୍ରଥମେ ବ୍ୟାଟିଂ କରି ଷ୍ଟିଭ ସ୍ମିଥ୍ (୭୩) ଓ ଆଲେକ୍ସ କ୍ୟାରି (୬୧)ଙ୍କ ଅର୍ଦ୍ଧଶତକ ବଳରେ ୪୮.୧ ଓଭରରେ ୨୬୪ ରନ୍ କରିଥିଲା। ଜବାବରେ ଭାରତ ୧୧ ବଲ୍ ବାକି ଥାଇ ଲକ୍ଷ୍ୟ ହାସଲ କରିନେଇଥିଲା। ମ୍ୟାଚ୍ ର ଶ୍ରେଷ୍ଠ ଖେଳାଳି କୋହଲି ୯୮ ବଲ୍ ରୁ ୫ ଚୌକା ସହାୟତାରେ ୮୪ ରନ୍ କରିଥିଲେ।
Comments are closed.