ଛାଡପତ୍ରର ଖବର ମଧ୍ୟରେ ଏକାଠି ନଜର ଆସିଲେ ସାନିଆ-ଶୋଏବ

ଭାରତୀୟ ଟେନିସ୍‌ ଷ୍ଟାର ସାନିଆ ମୀର୍ଜା ଓ ତାଙ୍କ ସ୍ୱାମୀ ପାକିସ୍ତାନୀ କ୍ରିକେଟର ଶୋଏବ ମଲିକ। ଉଭୟଙ୍କ ମଧ୍ୟରେ ବିବାହ ବିଚ୍ଛେଦ ହୋଇପାରେ ବୋଲି ଗତ ସପ୍ତାହରେ ଖବର ସାମ୍ନାକୁ ଆସିଥିଲା । ପାକିସ୍ତାନୀ ମିଡିଆ ପକ୍ଷରୁ ଏହି ଦାବି କରାଯାଇଥିବାବେଳେ ସେମାନେ ଅଲଗା ରହୁଥିବା ବି ସେଥିରେ ଦର୍ଶାଯାଇଥିଲା । ସେମାନଙ୍କର ଏହି ଦାମ୍ପତ୍ୟ କଳହ ଲାଗି ଜଣେ ମଡେଲ୍‌ଙ୍କୁ ଦାୟୀ କରାଯାଇଥିଲା । ଏଥିମଧ୍ୟରେ ଏହି ସେଲିବ୍ରିଟି ଦମ୍ପତିଙ୍କ ସଂପର୍କରେ ଆଉ ଏକ ଖବର ସାମ୍ନାକୁ ଆସିଛି ।

ସୂଚନା ଅନୁଯାୟୀ, ଏହି ସେଲିବ୍ରିଟି ଦମ୍ପତି ଖୁବ୍‌ ଶୀଘ୍ର ଏକ ଟକ୍‌ ଶୋ’ରେ ନଜର ଆସିବାକୁ ଯାଉଛନ୍ତି । ଏହି ଶୋ’ର ନାମ ରହିବ ‘ଦ ମୀର୍ଜା ମଲିକ ଶୋ’ । ପାକିସ୍ତାନୀ ଓଟିଟି ଫ୍ଲାଟ୍‌ଫର୍ମ ଉର୍ଦ୍ଦୁଫ୍ଲିକ୍ସ ଶନିବାର ସନ୍ଧ୍ୟାରେ ନିଜର ଆନୁଷ୍ଠାନିକ ଇନ୍‌ଷ୍ଟାଗ୍ରାମ୍ ଏକାଉଣ୍ଟରେ ଏହାର ପୋଷ୍ଟରକୁ ସେୟାର କରିଛି । ଖୁବ୍‌ ଶୀଘ୍ର ଶୋ’ ପ୍ରସାରିତ ହେବ ବୋଲି ଚ୍ୟାନେଲ କହିଛି । ସୋସିଆଲ ମିଡିଆରେ ଭାଇରାଲ୍‌ ହେଉଥିବା ସେହି ପୋଷ୍ଟରରେ ସାନିଆ ଶୋଏବଙ୍କ କାନ୍ଧରେ ହାତ ଭରା ରଖି ଛିଡ଼ା ହୋଇଥିବା ଦେଖାଯାଉଛି । ପଛରେ ଥିବା ଏକ ଝରକାରେ ବୁର୍ଜ ଖଲିଫାର ଚିତ୍ର ପ୍ରତିଫଳିତ ହେଉଛି । ଅନ୍ୟପକ୍ଷେ ଏହି ଟକ୍‌ ଶୋ’ର ପୋଷ୍ଟର ଭାଇରାଲ୍‌ ହେବାପରେ ସାନିଆ-ଶୋଏବଙ୍କ ବିବାହ ବିଚ୍ଛେଦ ଖବର କେବଳ ଏକ ପବ୍ଲିସିଟି ଷ୍ଟଣ୍ଟ ଥିବା କଥା ୟୁଜର୍ ମାନେ କହୁଛନ୍ତି । ଅବଶ୍ୟ ଏ ସଂପର୍କରେ ଦୁହେଁ ମୁହଁ ଖୋଲିନାହାନ୍ତି । ୨୦୧୦ରେ ସେମାନଙ୍କର ବିବାହ ଅନୁଷ୍ଠିତ ହୋଇଥିଲା । ଦମ୍ପତିଙ୍କର ଏକ ପୁଅ ଇଜହାନ୍‌ ଥିବାବେଳେ ସେମାନେ ବର୍ତ୍ତମାନ ଦୁବାଇରେ ରହୁଛନ୍ତି ।