ଅହମ୍ମଦାବାଦର ନରେନ୍ଦ୍ର ମୋଦୀ ଷ୍ଟାଡିୟମରେ ଚାଲିଥିବା ୨୦୨୬ ଟି-୨୦ ବିଶ୍ୱକପ୍ର ସୁପର-୮ ପର୍ଯ୍ୟାୟର ଏକ ଗୁରୁତ୍ୱପୂର୍ଣ୍ଣ ମ୍ୟାଚରେ ୱେଷ୍ଟଇଣ୍ଡିଜ୍ ଏବଂ ଦକ୍ଷିଣ ଆଫ୍ରିକା ମଧ୍ୟରେ କଡ଼ା ଟକ୍କର ଦେଖିବାକୁ ମିଳିଛି। ଏହି ରୋମାଞ୍ଚକର ମୁକାବିଲାରେ ୱେଷ୍ଟଇଣ୍ଡିଜ୍ ଦଳ ଦକ୍ଷିଣ ଆଫ୍ରିକା ସମ୍ମୁଖରେ ୧୭୭ ରନର ଏକ ସମ୍ମାନଜନକ ବିଜୟ ଲକ୍ଷ୍ୟ ଧାର୍ଯ୍ୟ କରିଛି। ଦକ୍ଷିଣ ଆଫ୍ରିକା ଅଧିନାୟକ ଆଡେନ ମାର୍କରାମ ଟସ୍ ଜିତି ପ୍ରଥମେ ବୋଲିଂ କରିବାକୁ ନିଷ୍ପତ୍ତି ନେଇଥିଲେ। ବ୍ୟାଟିଂ ପାଇଁ ଆମନ୍ତ୍ରଣ ପାଇଥିବା ୱେଷ୍ଟଇଣ୍ଡିଜ୍ ଦଳର ଆରମ୍ଭ ବେଶ୍ ଆକ୍ରମଣାତ୍ମକ ରହିଥିଲା। ପ୍ରଥମ ଓଭରରେ ହିଁ ଦଳ ୧୭ ରନ୍ ସଂଗ୍ରହ କରି ନିଜର ଆଭିମୁଖ୍ୟ ସ୍ପଷ୍ଟ କରିଥିଲା। କିନ୍ତୁ କିଛି ସମୟ ପରେ ଦକ୍ଷିଣ ଆଫ୍ରିକାର ଶାଣିତ ବୋଲିଂ ଆଗରେ କାରିବିୟାନ ଦଳ ଧରାଶାୟୀ ହେବାକୁ ଲାଗିଲା।
କ୍ୟାଗିସୋ ରବାଡା ଏବଂ ଲୁଙ୍ଗି ଏନଗିଡିଙ୍କ ଘାତକ ବୋଲିଂ ଯୋଗୁଁ ୱେଷ୍ଟଇଣ୍ଡିଜ୍ ନିଜର ଶୀର୍ଷ ବ୍ୟାଟରଙ୍କୁ ଶୀଘ୍ର ହରାଇଥିଲା। ଅଧିନାୟକ ସାଇ ହୋପ୍, ସିମରନ୍ ହେଟମାୟର ଏବଂ ବ୍ରାଣ୍ଡନ କିଙ୍ଗ୍ ସ୍ୱଳ୍ପ ରନ୍ରେ ପ୍ୟାଭିଲିୟନ ଫେରିବା ପରେ ଦଳ ଚାପରେ ଆସିଯାଇଥିଲା। ଗୋଟିଏ ସମୟରେ ୧୦୦ ରନ୍ ପୂର୍ବରୁ ୭ଟି ୱିକେଟ୍ ହରାଇ ଦଳ ବଡ଼ ସଙ୍କଟରେ ପଡ଼ିଥିଲା।
ଏହି ସଙ୍କଟ ସମୟରେ ରୋମାରିଓ ଶେଫର୍ଡ ଏବଂ ଅଭିଜ୍ଞ ଜେସନ ହୋଲ୍ଡର ଦଳର ମଙ୍ଗ ଧରିଥିଲେ। ଶେଫର୍ଡ ନିଜର ଅର୍ଦ୍ଧଶତକ ପୂରଣ କରିବା ସହ ଦଳର ସ୍କୋରକୁ ଆଗକୁ ନେଇଥିଲେ। ଶେଫର୍ଡ ଏବଂ ହୋଲ୍ଡରଙ୍କ ମଧ୍ୟରେ ହୋଇଥିବା ଗୁରୁତ୍ୱପୂର୍ଣ୍ଣ ଭାଗିଦାରୀ ବଳରେ ୱେଷ୍ଟଇଣ୍ଡିଜ୍ ନିର୍ଦ୍ଧାରିତ ୨୦ ଓଭରରେ ୧୭୬ ରନ୍ ସଂଗ୍ରହ କରିବାରେ ସଫଳ ହୋଇଥିଲା। ଶେଫର୍ଡଙ୍କ ବିସ୍ଫୋରକ ବ୍ୟାଟିଂ ଏବଂ ହୋଲ୍ଡରଙ୍କ ଧୈର୍ଯ୍ୟପୂର୍ଣ୍ଣ ଖେଳ ପ୍ରଶଂସକଙ୍କୁ ଆକୃଷ୍ଟ କରିଥିଲା। ଦକ୍ଷିଣ ଆଫ୍ରିକା ପକ୍ଷରୁ କ୍ୟାଗିସୋ ରବାଡା ଏବଂ ଲୁଙ୍ଗି ଏନଗିଡି ସଫଳ ବୋଲିଂ କରିଥିଲେ। ରବାଡା ଗୋଟିଏ ଓଭରରେ ଦୁଇଟି ୱିକେଟ୍ ନେଇ ୱେଷ୍ଟଇଣ୍ଡିଜ୍ର ବ୍ୟାଟିଂ ମେରୁଦଣ୍ଡ ଭାଙ୍ଗି ଦେଇଥିଲେ। ସେହିପରି କର୍ବିନ୍ ବସ ମଧ୍ୟ ଗୁରୁତ୍ୱପୂର୍ଣ୍ଣ ୱିକେଟ୍ ଅକ୍ତିଆର କରିଥିଲେ। ତେବେ ଶେଷ ଓଭରଗୁଡ଼ିକରେ ବୋଲରମାନେ ଅଧିକ ରନ୍ ବ୍ୟୟ କରିବା ଦଳ ପାଇଁ କଷ୍ଟକର ହୋଇଥିଲା।
ସେମିଫାଇନାଲ୍ ଦୃଷ୍ଟିରୁ ଏହି ମ୍ୟାଚ୍ ଉଭୟ ଦଳ ପାଇଁ ଅତ୍ୟନ୍ତ ଗୁରୁତ୍ୱପୂର୍ଣ୍ଣ। ଦକ୍ଷିଣ ଆଫ୍ରିକା ବର୍ତ୍ତମାନ ପର୍ଯ୍ୟନ୍ତ ଏହି ଟୁର୍ଣ୍ଣାମେଣ୍ଟରେ ଅପରାଜେୟ ରହିଛି। ଅନ୍ୟପକ୍ଷରେ ୱେଷ୍ଟଇଣ୍ଡିଜ୍ ମଧ୍ୟ ନିଜର ଦମଦାର ପ୍ରଦର୍ଶନ ଜାରି ରଖିଛି। ଯଦି ଦକ୍ଷିଣ ଆଫ୍ରିକା ଏହି ମ୍ୟାଚ୍ ଜିତିବାରେ ସଫଳ ହୁଏ, ତେବେ ସେମିଫାଇନାଲ୍ ପାଇଁ ସେମାନଙ୍କ ରାସ୍ତା ସହଜ ହୋଇଯିବ। ଅହମ୍ମଦାବାଦର ଏହି ଲାଲ୍ ମାଟି ପିଚ୍ରେ ୧୭୭ ରନର ଲକ୍ଷ୍ୟ ପିଛା କରିବା ଦକ୍ଷିଣ ଆଫ୍ରିକା ପାଇଁ ସହଜ ହେବ ନାହିଁ, କାରଣ ୱେଷ୍ଟଇଣ୍ଡିଜ୍ ପାଖରେ ଗୁଡାକେଶ ମୋତି ଏବଂ ସମାର ଜୋସେଫଙ୍କ ଭଳି ପ୍ରଭାବଶାଳୀ ବୋଲର ଅଛନ୍ତି। ବର୍ତ୍ତମାନ ସମସ୍ତଙ୍କ ନଜର ଦକ୍ଷିଣ ଆଫ୍ରିକାର ବ୍ୟାଟିଂ ଉପରେ ରହିଛି। କ୍ୱିଣ୍ଟନ୍ ଡି କକ୍ ଏବଂ ଡେଭିଡ୍ ମିଲରଙ୍କ ଭଳି ତାରକା ଖେଳାଳିଙ୍କ ଉପରେ ଏହି ବଡ଼ ସ୍କୋରକୁ ହାସଲ କରିବାର ଗୁରୁତ୍ୱପୂର୍ଣ୍ଣ ଦାୟିତ୍ୱ ରହିବ। କ୍ରିକେଟ୍ ପ୍ରେମୀଙ୍କ ପାଇଁ ଏହା ଏକ ରୋମାଞ୍ଚକର ଶେଷ ହେବାକୁ ଯାଉଛି।
Comments are closed.