ସମନ୍ୱିତ ସ୍ୱାସ୍ଥ୍ୟସେବା ଯୋଜନାରେ ୧୦ ଲକ୍ଷ ଟଙ୍କା ପର୍ଯ୍ୟନ୍ତ ନଗଦ ବିହୀନ ଚିକିତ୍ସାରୁ ଉପକୃତ ହେବେ ରାଜ୍ୟବାସୀ

ଭୁବନେଶ୍ବର: ଆୟୁଷ୍ମାନ ଭାରତ ପ୍ରଧାନମନ୍ତ୍ରୀ ଜନ ଆରୋଗ୍ୟ ଯୋଜନାକୁ ରାଜ୍ୟର ବିଜୁ ସ୍ୱାସ୍ଥ୍ୟ କଲ୍ୟାଣ ଯୋଜନା (ବିଏସ୍କେୱାଇ) ସହ ଯୋଡ଼ିବା ପାଇଁ ରାଜ୍ୟ ସରକାର ଜାତୀୟ ସ୍ୱାସ୍ଥ୍ୟ ପ୍ରାଧିକରଣ (ଏନ୍ଏଚ୍ଏ) ସହ ଏକ ବୁଝାମଣାପତ୍ର ସ୍ୱାକ୍ଷର କରିଛନ୍ତି। ଏହି ପଦକ୍ଷେପ ଦ୍ୱାରା ଓଡ଼ିଶାର ପ୍ରାୟ ୩.୪୬ କୋଟି ହିତାଧିକାରୀଙ୍କୁ ଅନ୍ତର୍ଭୁକ୍ତ କରି ପ୍ରାୟ ୧.୦୩ କୋଟି ପରିବାରକୁ କ୍ୟାସଲେସ୍ ସ୍ୱାସ୍ଥ୍ୟସେବା ପ୍ରଦାନ କରାଯିବ।

ଏହି ନୂତନ ସମନ୍ୱିତ ଯୋଜନା ଅଧୀନରେ ଯୋଗ୍ୟ ପରିବାରକୁ ନଗଦ ବିହୀନ ଚିକିତ୍ସା ପାଇଁ ବାର୍ଷିକ ୫ ଲକ୍ଷ ଟଙ୍କା ମିଳିବ । ଏହାବ୍ୟତୀତ ମହିଳା ହିତାଧିକାରୀଙ୍କୁ ଅତିରିକ୍ତ ୫ ଲକ୍ଷ ଟଙ୍କା ମିଳିବ, ଯାହା ଦ୍ୱାରା ସେମାନଙ୍କ ର ମୋଟ ବୀମା ବାର୍ଷିକ ୧୦ ଲକ୍ଷ ଟଙ୍କାକୁ ବୃଦ୍ଧି ପାଇବ ।

ସେହିପରି ବରିଷ୍ଠ ନାଗରିକଙ୍କ ପାଇଁ ଆୟୁଷ୍ମାନ ବାୟୋ-ବନ୍ଦନା ଯୋଜନା ଲାଗୁ କରିବାକୁ ଓଡ଼ିଶା ସରକାର ନିଷ୍ପତ୍ତି ନେଇଛନ୍ତି। ଅର୍ଥନୈତିକ ପୃଷ୍ଠଭୂମି ନିର୍ବିଶେଷରେ ୭୦ ବର୍ଷ ରୁ ଅଧିକ ବୟସର ବ୍ୟକ୍ତିଙ୍କୁ ଏହି ଯୋଜନା ଅଧୀନରେ ମାଗଣା ଚିକିତ୍ସା ପାଇଁ ପରିବାର ପିଛା ବାର୍ଷିକ ୫ ଲକ୍ଷ ଟଙ୍କା ମିଳିବ ।

ଏହି ପଦକ୍ଷେପ ଦ୍ୱାରା ହିତାଧିକାରୀମାନେ ବର୍ତ୍ତମାନ ସମଗ୍ର ଭାରତରେ ଉଭୟ ସରକାରୀ ଏବଂ ବେସରକାରୀ ୨୯,୦ ଡାକ୍ତରଖାନା ରେ ପ୍ରବେଶ କରିପାରିବେ, ଯାହା କି ରାଜ୍ୟ ଯୋଜନା ଅଧୀନରେ ପୂର୍ବ ୯୦୦ ଡାକ୍ତରଖାନାଠାରୁ ଯଥେଷ୍ଟ ବିସ୍ତାରିତ ହେବ । ଏହାବ୍ୟତୀତ ଓଡ଼ିଶାରେ ଏବି-ପିଏମଜେଏୱାଇ କାର୍ଯ୍ୟକାରୀ ହେଲେ ରାଜ୍ୟକୁ ଭାରତ ସରକାରଙ୍କ ଠାରୁ କେନ୍ଦ୍ରୀୟ ପାଣ୍ଠି ସହାୟତା ମିଳିପାରିବ ।

ଆୟୁଷ୍ମାନ ବାୟୋ-ବନ୍ଦନା ଯୋଜନା ଦ୍ୱାରା ବରିଷ୍ଠ ନାଗରିକମାନେ ଦେଶର ସମାନ ୨୯,୦୦୦ ଡାକ୍ତରଖାନାରେ ଚିକିତ୍ସା ପାଇପାରିବେ । ଏହି ସଂପ୍ରସାରଣ ଦ୍ୱାରା ଅତିରିକ୍ତ ୬ ଲକ୍ଷ ନୂଆ ହିତାଧିକାରୀ ରାଜ୍ୟର ସ୍ୱାସ୍ଥ୍ୟ ସେବା ଅଧୀନରେ ଆସିବେ ବୋଲି ଆଶା କରାଯାଉଛି।

ସେପଟେ ଓଡ଼ିଶାର ସମସ୍ତ ସରକାରୀ ହସ୍ପିଟାଲରେ ସମସ୍ତ ନାଗରିକଙ୍କ ପାଇଁ ସାର୍ବଜନୀନ ସ୍ୱାସ୍ଥ୍ୟସେବା କୁ ସୁନିଶ୍ଚିତ କରିବା ପାଇଁ ପ୍ରଚଳିତ ନୀତି ଅନୁଯାୟୀ ମାଗଣା ଚିକିତ୍ସା ସେବା ଜାରି ରହିବ ।