ବାପି ହାଁସଦା: “ମୋର ପ୍ରଥମ ଜାତୀୟ କ୍ରୀଡ଼ା ସ୍ୱର୍ଣ୍ଣ ପଦକ ଜିତିବା ଏବଂ ଏହା ମୋର ବ୍ୟକ୍ତିଗତ ସର୍ବୋତ୍ତମ ପ୍ରଦର୍ଶନ ସହ ହେବା ଏକ ସ୍ୱତନ୍ତ୍ର ଅନୁଭୂତି”

ଭୁବନେଶ୍ୱର: ଉତ୍ତରାଖଣ୍ଡରେ ୨୦୨୫ ଜାତୀୟ କ୍ରୀଡ଼ାରେ ଓଡ଼ିଶା ଖେଳାଳିମାନେ ଦୌଡ଼କୁଦରେ ଉତ୍କୃଷ୍ଟ ପ୍ରଦର୍ଶନ କରି ୫ଟି ପଦକ ଅର୍ଜନ କରିଛନ୍ତି ଯେଉଁଥିରେ ଚାରୋଟି ସ୍ୱର୍ଣ୍ଣ ଏବଂ ଏକ ରୌପ୍ୟ ପଦକ ରହିଛି । ଏହା ଓଡ଼ିଶାର ଜାତୀୟ କ୍ରୀଡ଼ାରେ କୌଣସି ଏକ ସଂସ୍କରଣରେ ସର୍ବୋତ୍ତମ ଦୌଡ଼କୁଦ ପ୍ରଦର୍ଶନ ।
ଅନିମେଷ କୁଜୁର ତିନୋଟି ସ୍ୱର୍ଣ୍ଣ ପଦକ ଜିତି ମେଡାଲ ତାଲିକାରେ ଅଗ୍ରଣୀ ଥିଲେ, ଯାହା ମଧ୍ୟରେ ୧୦୦ ମିଟର ଏବଂ ୨୦୦ ମିଟରରେ ଏକ ରେକର୍ଡ-ଭାଙ୍ଗିବା ସ୍ପ୍ରିଂଟ୍ ଡବଲ୍ ଏବଂ ୪x୧୦୦ ମିଟର ରିଲେରେ ଡି.ଏମ. ଜୟରାମ, ଲାଲୁ ଭୋଇ, ଏବଂ ଅମିୟ କୁମାର ମଲ୍ଲିକଙ୍କ ସହିତ ବିଜୟ ଅନ୍ତର୍ଭୁକ୍ତ । ଅନିମେଷ ୧୦୦ ମିଟରରେ ୧୦.୨୮ ସେକେଣ୍ଡ ସମୟ ସହିତ ଏକ ନୂତନ ମିଟ୍ ରେକର୍ଡ ସ୍ଥାପନ କରିଛନ୍ତି । ଓଡ଼ିଶା ଦଳ ୪x୧୦୦ ମିଟର ରିଲେକୁ ୩୯.୪୭ ସେକେଣ୍ଡ ସମୟରେ ପୂର୍ଣ୍ଣ କରି ଏକ ନୂତନ ମିଟ୍ ରେକର୍ଡ ସ୍ଥାପନ କରିଛି ।

ବାପି ହାଁସଦା ୪୦୦ ମିଟରରେ ୪୬.୮୨ ସେକେଣ୍ଡର ବ୍ୟକ୍ତିଗତ ସର୍ବୋତ୍ତମ ସମୟ ସହିତ ସ୍ୱର୍ଣ୍ଣ ପଦକ ଜିତିଛନ୍ତି । ତାଙ୍କର ବିଜୟରେ ଅତ୍ୟନ୍ତ ଖୁସି ପ୍ରକାଶ କରି ବାପି କହିଛନ୍ତି, “ଆଘାତରୁ ଫେରିବା ପରେ ମୋର ପ୍ରଥମ ଜାତୀୟ କ୍ରୀଡ଼ା ସ୍ୱର୍ଣ୍ଣ ପଦକ ଜିତିବା ଏବଂ ଏହା ପୁଣି ମୋର ବ୍ୟକ୍ତିଗତ ସର୍ବୋତ୍ତମ ପ୍ରଦର୍ଶନ ସହିତ ହେବା ଏକ ସ୍ୱତନ୍ତ୍ର ଅନୁଭୂତି । ମୁଁ ସୁସ୍ଥ ହେବା ସମୟରେ ଓଡ଼ିଶା ସରକାର ଏବଂ ହାଇ ପରଫର୍ମାନ୍ସ ସେଣ୍ଟରର ମୋ କୋଚ୍‌ମାନଙ୍କ ଅବିଚଳିତ ସମର୍ଥନ ପାଇଁ ମୁଁ କୃତଜ୍ଞ । ମୁଁ ଆଶା କରୁଛି ଯେ ମୁଁ ବରିଷ୍ଠ ସ୍ତରରେ ନିରନ୍ତର ଭାବରେ ଭଲ ପ୍ରଦର୍ଶନ ଜାରି ରଖିପାରିବି ଏବଂ ସୁସ୍ଥ ରହିପାରିବି ।’’
ଓଡ଼ିଶା ରିଲାଏନ୍ସ ଫାଉଣ୍ଡେସନ୍ ହାଇ ପରଫର୍ମାନ୍ସ ସେଣ୍ଟରର ମୁଖ୍ୟ କୋଚ ମାର୍ଟିନ ଓୱେନ୍ସ କହିଛନ୍ତି ଯେ, “ଏହା ଆମର ଓଡ଼ିଶାର ଖେଳାଳିମାନଙ୍କ ପାଇଁ ସବୁଠାରୁ ସଫଳ ଜାତୀୟ କ୍ରୀଡ଼ା ଥିଲା । ଅନିମେଷ ଏକ ଅଦ୍ଭୁତ ପ୍ରତିଯୋଗିତାରେ ଖେଳିଥିଲେ ଏବଂ ୪x୧୦୦ ମିଟର ରିଲେକୁ ଭଲ ସମର୍ଥନ ମିଳିଥିଲା । ବାପିଙ୍କ ଫଳାଫଳ ଏକ ସୁଖଦ ଅନୁଭୂତି ଥିଲା ଏବଂ ଏହା ତାଙ୍କ ଶକ୍ତି ଏବଂ ସ୍ଥିରତାକୁ ଦର୍ଶାଇଛି । ଏକ ନୂତନ ମିଟ୍ ରେକର୍ଡ ସହିତ ରିଲେ ସ୍ୱର୍ଣ୍ଣ ପଦକ ଏକ ବଡ଼ ସଫଲତା ଥିଲା କାରଣ ଆମେ ୨୦୨୨ରେ ଓଡ଼ିଶା ରିଲେ ପ୍ରକଳ୍ପ ସ୍ଥାପନ କରିଥିଲୁ ଏବଂ ଏହା ଦଳର ଜାତୀୟ କ୍ରୀଡ଼ାରେ ପ୍ରଥମ ସ୍ୱର୍ଣ୍ଣ ପଦକ ଅଟେ, ଯାହା ପଛରେ ଅନେକ ପରିଶ୍ରମ ରହିଛି । ଭାରତରେ ସ୍ପ୍ରିଣ୍ଟିଂ   କ୍ରୀଡ଼ାରେ ଓଡ଼ିଶା ବର୍ତମାନ ପେସ ସେଟର୍ ଅଟେ ।’’
ଅନିମେଷ, ଯିଏକି ସେ ଭାଗ ନେଇଥିବା ସମସ୍ତ କ୍ରୀଡ଼ାରେ ପ୍ରଭାବଶାଳୀ ଥିଲେ, ସେ କହିଛନ୍ତି, “ମୁଁ ବହୁତ ଖୁସି କାରଣ ଆମେ ବର୍ଷର ଆରମ୍ଭରେ ଅଛୁ ଏବଂ ମୁଁ ତିନୋଟି ସ୍ୱର୍ଣ୍ଣ ପଦକ ଜିତିଛି । ଯାହା ମୋତେ ଆହୁରି ଆନନ୍ଦିତ କରିଛି ତାହା ହେଉଛି ମୁଁ ୧୦୦ ମିଟର ଏବଂ ୨୦୦ ମିଟରରେ ମୋର ବ୍ୟକ୍ତିଗତ ସର୍ବୋତ୍ତମ ସମୟର ନିକଟତର ସମୟ ହାସଲ କରିଥିଲି ଏବଂ ଆମେ ୪x୧୦୦ ମିଟର ରିଲେରେ ଏକ ନୂତନ ମିଟ୍ ରେକର୍ଡ ସ୍ଥାପନ କରିଛୁ । ଆମେ ବର୍ତ୍ତମାନ ଆନ୍ତର୍ଜାତୀୟ ସ୍ତରରେ ସଫଳତା ପାଇଁ ଲକ୍ଷ୍ୟ ରଖିଛୁ । ମୋର ଯାତ୍ରାରେ, ଓଡ଼ିଶା ହାଇ ପରଫର୍ମାନ୍ସ ସେଂଟର ଏକ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଛି କାରଣ ସେମାନେ ମୋତେ ପ୍ରତ୍ୟେକ ପଦକ୍ଷେପରେ ସମର୍ଥନ କରିଛନ୍ତି ଏବଂ ଏହି ସମସ୍ତ ସଫଳତା ଏହା ବିନା ସମ୍ଭବ ହୋଇନଥାନ୍ତା ।’’
ସ୍ୱାଧୀନ ମାଝି ପୁରୁଷ ହାଇ ଜମ୍ପ (ଉଚ୍ଚ ଡିଆଁ)ରେ ରୌପ୍ୟ ପଦକ ଜିତିଛନ୍ତି । ସ୍ୱାଧୀନ ୨.୧୧ ମିଟରର ବ୍ୟକ୍ତିଗତ ସର୍ବୋତ୍ତମ ଉଚ୍ଚତା ଅତିକ୍ରମ କରି ପୂର୍ବ ସଂସ୍କରଣରେ ଥିବା ତାଙ୍କର କାଂସ୍ୟ ପଦକକୁ ଏଥର ରୌପ୍ୟକୁ ଉନ୍ନୀତ କରିଛନ୍ତି ।
ଏହି ପ୍ରଭାବଶାଳୀ ପଦକ ଅର୍ଜନ ଓଡ଼ିଶାର ଖେଳାଳିମାନଙ୍କର ଅସାଧାରଣ ପ୍ରତିଭା ଏବଂ ନିଷ୍ଠାକୁ ପ୍ରତିଫଳିତ କରୁଛି ଯାହା ଓଡ଼ିଶା ରିଲାଏନ୍ସ ଫାଉଣ୍ଡେସନ୍ ହାଇ ପରଫର୍ମାନ୍ସ ସେଣ୍ଟରରେ ଓଡ଼ିଶା ସରକାରଙ୍କ ବିଶ୍ୱସ୍ତରୀୟ ସୁବିଧା ଏବଂ ସମର୍ଥନ ଦ୍ୱାରା ଜାରି ରହିଛି ।