କ୍ରିକେଟ୍ ବେଟିଂ ପାଇଁ ୩ କୋଟିରୁ ଅଧିକ ଟଙ୍କା ଠକେଇ ଅଭିଯୋଗରେ ଆଉ ଜଣେ ପିଇଓ ଗିରଫ

ଭୁବନେଶ୍ୱର: କଳାହାଣ୍ଡି ଜିଲ୍ଲା ଥୁଆମୂଳ-ରାମପୁର ବ୍ଲକ ଅନ୍ତର୍ଗତ ପୋଡ଼ାପଦର ଓ ତାଳନେଗି ଗ୍ରାମପଞ୍ଚାୟତର ପୂର୍ବତନ ପଞ୍ଚାୟତ ନିର୍ବାହୀ ଅଧିକାରୀ (ପିଇଓ) ଦେବାନନ୍ଦ ସାଗରଙ୍କୁ ୩ କୋଟି ୨୬ ଲକ୍ଷ ଟଙ୍କାର ସରକାରୀ ପାଣ୍ଠି ଦୁର୍ନୀତି ଅଭିଯୋଗରେ ଭିଜିଲାନ୍ସ ଗିରଫ କରିଛି। ପବ୍ଲିକ ଫାଇନାନ୍ସ ମ୍ୟାନେଜମେଣ୍ଟ ସିଷ୍ଟମ (ପିଏଫଏମଏସ) ଜରିଆରେ ଚେକ୍ ଉଠାଣ ଓ ଅନ୍ଲାଇନ୍ ଟ୍ରାନ୍ସଫର ଜରିଆରେ ତାଲନେଗି ଜିପିରୁ ୧,୭୧,୮୬,୩୪୨ ଟଙ୍କା ଏବଂ ପୋଡ଼ାପଦର ଜିପିରୁ ୧,୫୫,୦୦,୭୫୮ ଟଙ୍କା ହଡ଼ପ କରାଯାଇଛି। ଶ୍ରୀ ସାଗର ସଂପୃକ୍ତ ଜିପିଙ୍କ ଦସ୍ତଖତ ଜାଲ୍ କରି କଳାହାଣ୍ଡି ଧର୍ମଗଡ଼ ବଜାର ଶାଖାସ୍ଥିତ ଏସ୍ ବିଆଇରେ ଥିବା ତାଙ୍କ ବ୍ୟକ୍ତିଗତ ଆକାଉଣ୍ଟକୁ ଟଙ୍କା ଟ୍ରାନ୍ସଫର କରିଥିଲେ। ପୋର୍ଟାଲ ଫେୟାରପ୍ଲେ ଜରିଆରେ ଅନଲାଇନ୍ କ୍ରିକେଟ୍ ବେଟିଂ ପାଇଁ ଏହି ଟଙ୍କା ବ୍ୟବହୃତ ହୋଇଥିବା ଅଭିଯୋଗ ହୋଇଛି।

ଶ୍ରୀ ଦେବାନନ୍ଦ ସାଗର ୨୦୧୬ ଜୁଲାଇ ୪ ତାରିଖରେ ପିଇଓ ଭାବେ ସରକାରୀ ଚାକିରିରେ ଯୋଗ ଦେଇ ଥୁଆମୂଳ-ରାମପୁର ବ୍ଲକ ୍ ଅନ୍ତର୍ଗତ ତାଳନେଗି ଜିପିରେ ଅବସ୍ଥାପିତ ହୋଇଥିଲେ। ଏହାବ୍ୟତୀତ ତାଙ୍କୁ ପୋଡ଼ାପଦର ଜିପି ଦାୟିତ୍ୱ ଦିଆଯାଇଥିଲା। ୨୦୧୮ ମେ ୫ରୁ ୨୦୨୨ ମାର୍ଚ୍ଚ ୧୭ ମଧ୍ୟରେ ତାଙ୍କର ଠକେଇ କାର୍ଯ୍ୟକଳାପ ଘଟିଥିଲା।

ସୂଚନାଯୋଗ୍ୟ, ଶ୍ରୀ ସାଗରଙ୍କ ବିରୋଧରେ ୨୦୨୩ମସିହାରେ କଳାହାଣ୍ଡି ଲାଞ୍ଜିଗଡ଼ ବ୍ଲକ ଅନ୍ତର୍ଗତ ବଡ଼ଛତରଙ୍ଗ, ବିରିକୋଟ ଓ ପାହାଡ଼ପଦର ଜିପିରେ ପିଇଓ ଭାବେ କାର୍ଯ୍ୟ କରୁଥିବା ବେଳେ ୧ କୋଟି ୪ ଲକ୍ଷ ଟଙ୍କା ଦୁର୍ନୀତି ଅଭିଯୋଗରେ ଓଡ଼ିଶା ଭିଜିଲାନ୍ସ ମାମଲା ରୁଜୁ କରିଥିଲା। ଏହି ଦୁର୍ନୀତି ଜଣାପଡ଼ିବା ପରେ ତାଙ୍କୁ ନିଲମ୍ବିତ କରାଯାଇଥିଲା।

ଅଧିକ ଅନୁସନ୍ଧାନ ବେଳେ ଅତିରିକ୍ତ ଅନିୟମିତତା ପଦାକୁ ଆସିବା ପରେ ଓଡ଼ିଶା ଭିଜିଲାନ୍ସ ୨୦୧୮ରେ ସଂଶୋଧିତ ଦୁର୍ନୀତି ନିବାରଣ ଆଇନ, ୧୯୮୮ର ଧାରା ୧୩(୨) ଓ ୧୩(୨୧.୦୩.୨୦୨୫) ଏବଂ ୧୩ଟି ମାମଲା (କୋରାପୁଟ ଭିଜିଲାନ୍ସ କେସ୍ ନଂ.୧୨ ଓ ୧୩) ରୁଜୁ କରିଥିଲା।

ଆଜି ଶ୍ରୀ ଦେବାନନ୍ଦ ସାଗରଙ୍କୁ ପରବର୍ତ୍ତୀ ଆଇନଗତ କାର୍ଯ୍ୟାନୁଷ୍ଠାନ ପାଇଁ ଭବାନୀପାଟଣା ଭିଜିଲାନ୍ସ ସ୍ବତନ୍ତ୍ର ବିଚାରପତିଙ୍କ କୋର୍ଟକୁ ପଠାଯାଇଛି।