ଭାରତ ଏବଂ ଇଂଲଣ୍ଡ ମଧ୍ୟରେ ଟି-୨୦ ବିଶ୍ୱକପ୍ ୨୦୨୬ର ଦ୍ୱିତୀୟ ସେମିଫାଇନାଲ ମ୍ୟାଚ୍ ମୁମ୍ବାଇର ପ୍ରସିଦ୍ଧ ୱାଙ୍ଖେଡେ ଷ୍ଟାଡିୟମରେ ଖେଳାଯିବ। ପ୍ରତିଯୋଗିତାର ପ୍ରଥମ ସେମିଫାଇନାଲରେ ନ୍ୟୁଜିଲାଣ୍ଡ ଦକ୍ଷିଣ ଆଫ୍ରିକାକୁ ୯ ୱିକେଟରେ ପରାସ୍ତ କରି ସିଧାସଳଖ ଫାଇନାଲରେ ପ୍ରବେଶ କରିସାରିଛି। ଚଳିତ ଟୁର୍ଣ୍ଣାମେଣ୍ଟରେ ଇଂଲଣ୍ଡ ଦଳ ଆଶାନୁରୂପ ପ୍ରଦର୍ଶନ କରିବାରେ ବିଫଳ ହୋଇଥିଲେ ମଧ୍ୟ ଏପର୍ଯ୍ୟନ୍ତ ୬ଟି ମ୍ୟାଚ୍ ଜିତିବାରେ ସଫଳ ହୋଇଛି। ଇଂଲଣ୍ଡ କେବଳ ୱେଷ୍ଟଇଣ୍ଡିଜ୍ ବିପକ୍ଷରେ ଗୋଟିଏ ମ୍ୟାଚ୍ ହାରିଥିବା ବେଳେ ଭାରତ ନିଜର ଶେଷ ସୁପର-୮ ମ୍ୟାଚରେ ୱେଷ୍ଟଇଣ୍ଡିଜକୁ ହରାଇ ସେମିଫାଇନାଲରେ ପହଞ୍ଚିଛି। ଭାରତ ମଧ୍ୟ ଚଳିତ ବିଶ୍ୱକପରେ କେବଳ ଦକ୍ଷିଣ ଆଫ୍ରିକା ବିପକ୍ଷରେ ଏକମାତ୍ର ମ୍ୟାଚ୍ ହାରିଛି। ସୂର୍ଯ୍ୟକୁମାର ଯାଦବଙ୍କ ନେତୃତ୍ୱରେ ଭାରତୀୟ ଦଳ ୬ଟି ବିଜୟ ସହ ଏବେ ଖେତାବ ଜିତିବାର ଶକ୍ତିଶାଳୀ ଦାବିଦାର ଭାବେ ଉଭା ହୋଇଛି।
ଉଲ୍ଲେଖଯୋଗ୍ୟ ଯେ, ଲଗାତାର ତିନୋଟି ଟି-୨୦ ବିଶ୍ୱକପରେ ଭାରତ ଏବଂ ଇଂଲଣ୍ଡ ମଧ୍ୟରେ ଏହା ତୃତୀୟ ସେମିଫାଇନାଲ ମୁକାବିଲା। ଏହା ପୂର୍ବରୁ ୨୦୨୨ ଏବଂ ୨୦୨୪ ବିଶ୍ୱକପ୍ ସେମିଫାଇନାଲରେ ମଧ୍ୟ ଏହି ଦୁଇ ଦଳ ମୁହାଁମୁହିଁ ହୋଇଥିଲେ। ବିଶେଷ କଥା ହେଉଛି, ଗତ ଦୁଇଟି ସଂସ୍କରଣରେ ଯେଉଁ ଦଳ ଭାରତ-ଇଂଲଣ୍ଡ ସେମିଫାଇନାଲ ଜିତିଛି, ସେହି ଦଳ ହିଁ ଶେଷରେ ବିଶ୍ୱକପ୍ ଚାମ୍ପିୟନ ହୋଇଛି। ପିଚ୍ ରିପୋର୍ଟ ଅନୁଯାୟୀ, ୱାଙ୍ଖେଡେ ପିଚ୍ରେ ଘାସ ଥିବାରୁ ଆରମ୍ଭରୁ ବ୍ୟାଟରମାନଙ୍କୁ ସାମାନ୍ୟ ଅସୁବିଧାର ସମ୍ମୁଖୀନ ହେବାକୁ ପଡ଼ିପାରେ। ଏଥିସହିତ ଆଜି ମୁମ୍ବାଇର ପାଣିପାଗ ବେଶ୍ ଗରମ ରହିବା ସମ୍ଭାବନା ଥିବାରୁ ଏହା ଖେଳାଳିଙ୍କ ପାଇଁ ଏକ ବଡ଼ ଆହ୍ୱାନ ହେବ।
Comments are closed.