ପନ୍ତଙ୍କ ଭଉଣୀଙ୍କ ବାହାଘରରେ ପତ୍ନୀ ସାକ୍ଷୀଙ୍କ ସହ ଗୀତ ଗାଇ ନିଜର କୁଲ ଷ୍ଟାଇଲ ଦେଖାଇଲେ ଧୋନି

ନୂଆଦିଲ୍ଲୀ: ଭାରତୀୟ ଦଳର ପୂର୍ବତନ ଅଧିନାୟକ ମହେନ୍ଦ୍ର ସିଂହ ଧୋନି ଏବେ ମସୁରୀରେ ୱିକେଟକିପର ବ୍ୟାଟ୍ସମ୍ୟାନ୍ ଋଷଭ ପନ୍ତଙ୍କ ଭଉଣୀଙ୍କ ବିବାହଉତ୍ସବରେ ସମୟ ବିତାଉଛନ୍ତି। ବୁଧବାର ଦିନ ସୋସିଆଲ ମିଡିଆରେ ଏକ ଭିଡିଓ ଭାଇରାଲ ହୋଇଥିଲା ଯେଉଁଥିରେ ସେ ପନ୍ତ ଏବଂ ସୁରେଶ ରାଇନାଙ୍କ ସହ ଡ୍ୟାନ୍ସ କରୁଥିବାର ଦେଖିବାକୁ ମିଳିଥିଲା । ଏବେ ଆଉ ଏକ ଭିଡିଓ ସାମ୍ନାକୁ ଆସିଛି ଯେଉଁଥିରେ ଧୋନି ତାଙ୍କ ପତ୍ନୀ ସାକ୍ଷୀଙ୍କ ସହ ‘ତୁ ଜାନେ ନା…’ ଗାଉଥିବାର ନଜର ଆସିଛନ୍ତି ।

ପନ୍ତଙ୍କ ଭଉଣୀଙ୍କ ବିବାହରେ କ୍ରିକେଟ ଜଗତର ଅନେକ ବଡ଼ ବଡ଼ ନାମ ସାମିଲ ହୋଇଛନ୍ତି । ମଙ୍ଗଳବାର ଧୋନି ଓ ଅଭିଜ୍ଞ କ୍ରିକେଟର ସୁରେଶ ରାଇନା ଡେରାଡୁନରେ ପହଞ୍ଚିଛନ୍ତି। ମଙ୍ଗଳବାର ଏହି ହଳଦୀ ସମାରୋହ ଅନୁଷ୍ଠିତ ହୋଇଥିଲା। ଏହି ସମୟରେ ଭେଟେରାନମାନେ ବହୁତ ମଜା କରିଥିଲେ । ଲକ୍ଷ୍ନୌ ସୁପର ଜାଏଣ୍ଟସର ନୂଆ ଅଧିନାୟକ ଋଷଭ ପନ୍ତଙ୍କ ଭଉଣୀ ବ୍ୟବସାୟୀ ଅଙ୍କିତ ଚୌଧୁରୀଙ୍କ ସହ ବିବାହ କରିବେ। ସେ ଲଣ୍ଡନର ଏକ ଘରୋଇ କମ୍ପାନୀର ବୋର୍ଡ ଅଫ୍ ଡାଇରେକ୍ଟରରେ ଅଛନ୍ତି। ଦୁହେଁ ପରସ୍ପରକୁ ଦୀର୍ଘ ଦିନ ଧରି ଜାଣନ୍ତି ଏବଂ ଗତ ବର୍ଷ ଜାନୁଆରୀରେ ନିର୍ବନ୍ଧ କରିଥିଲେ । ଏହି ବିବାହରେ କେବଳ ନିକଟ ସମ୍ପର୍କୀୟ ଏବଂ ବିଶେଷ ବନ୍ଧୁଙ୍କୁ ନିମନ୍ତ୍ରଣ କରାଯାଇଛି।

ଏହି ବିବାହ ଉତ୍ସବରେ ଧୋନୀ ଆକର୍ଷଣର କେନ୍ଦ୍ରବିନ୍ଦୁ ପାଲଟିଛନ୍ତି। ସୋସିଆଲ ମିଡିଆରେ ଏକ ଭିଡିଓ ଭାଇରାଲ ହେବାରେ ଲାଗିଛି, ଯେଉଁଥିରେ ଧୋନି ଓ ସାକ୍ଷୀ ଖୁବ ଉତ୍ସାହର ସହ ଗୀତ ଗାଉଛନ୍ତି । ଅନ୍ୟପକ୍ଷରେ ଭାରତୀୟ ଦଳର ମୁଖ୍ୟ ପ୍ରଶିକ୍ଷକ ତଥା ୨୦୧୧ ଦିନିକିଆ ବିଶ୍ବକପ୍ ଦଳର ସଦସ୍ୟ ଗୌତମ ଗମ୍ଭୀର ମଧ୍ୟ ବୁଧବାର ବିବାହ ଉତ୍ସବରେ ଯୋଗଦେବା ପାଇଁ ପହଞ୍ଚିଛନ୍ତି।