ମୁମ୍ବାଇର କ୍ରାଉଫୋର୍ଡ ମାର୍କେଟରେ ଭୟାବହ ଅଗ୍ନିକାଣ୍ଡ

ମୁମ୍ବାଇର ପ୍ରସିଦ୍ଧ କ୍ରାଉଫୋର୍ଡ ମାର୍କେଟରେ ଗୁରୁବାର ସନ୍ଧ୍ୟାରେ ଏକ ବଡ ଧରଣର ଅଗ୍ନିକାଣ୍ଡ ଘଟିଥିଲା । ଦୀର୍ଘ ୩ ଘଣ୍ଟା ପରେ ନିଆଁ ଲିଭାଯାଇଥିଲା । ନିଆଁ ଲିଭାଇବା ପାଇଁ ଘଟଣାସ୍ଥଳରେ ୪ଟି ଦମକଳ ଗାଡି ଉପସ୍ଥିତ ଥିଲା । ଘଟଣାସ୍ଥଳରେ ୪ଟି ୱାଟର ଟ୍ୟାଙ୍କର ମଧ୍ୟ ନିୟୋଜିତ କରାଯାଇଥିଲ। ।

ଅଗ୍ନିଶମ ବିଭାଗର କର୍ମଚାରୀମାନେ ଅକ୍ଳାନ୍ତ ପରିଶ୍ରମ କରି ରାତି ପ୍ରାୟ ୯ଟା ୪୫ ମିନିଟ୍ ସମୟରେ ନିଆଁକୁ ଆୟତ୍ତ କରିଥିଲେ । କ୍ରାଉଫୋର୍ଡ ମାର୍କେଟ ଭିତରେ ପ୍ୟାକିଂ ସାମଗ୍ରୀ, ବୈଦ୍ୟୁତିକ ମିଟର ସମେତ ବୈଦ୍ୟୁତିକ ତାରରେ ଏକ ବଡ ଧରଣର ଅଗ୍ନିକାଣ୍ଡ ଘଟିଥିଲା । ଯାହାକୁ ଅଗ୍ନିଶମ କର୍ମଚାରୀମାନେ ବହୁ ପରିଶ୍ରମ ପରେ ଲିଭାଇଥିଲେ । ନିଆଁ ଲିଭା କାର୍ଯ୍ୟାରେ ୫ଟି ଅଗ୍ନି ନିର୍ବାପକ ଜେଟ୍ ଲଗାଯାଇଥିଲା । ଅଗ୍ନିଶମ ବିଭାଗର କର୍ମଚାରୀଙ୍କ ତୁରନ୍ତ କାର୍ଯ୍ୟ ହେତୁ ଏକ ବଡ ଅଘଟଣକୁ ଏଡାଇ ନିଆଁକୁ ନିୟନ୍ତ୍ରଣ କରାଯାଇଥିଲା । ଏହି ଅଗ୍ନିକାଣ୍ଡରେ କେହି ମୃତାହତ ହୋଇନାହାଁନ୍ତି । ପ୍ରାଥମିକ ରିପୋର୍ଟ ଅନୁଯାୟୀ, ସନ୍ଧ୍ୟା ୬ଟା ବେଳେ ନିଆଁ ଲାଗିଥିଲା । କ୍ରାଉଫୋର୍ଡ ମାର୍କେଟର ତଳ ମହଲାରେ ନିଆଁ ଲାଗିଯାଇଥିଲା । ଘଟଣାସ୍ଥଳରେ ଅଗ୍ନିଶମ ବାହିନୀ ବ୍ୟତୀତ ୧୦୮ ସେବା, ପୋଲିସ ଏବଂ ୱାର୍ଡ କର୍ମଚାରୀ ନିୟୋଜିତ ହୋଇଥିଲେ ।

ମୁମ୍ବାଇର କ୍ରାଉଫୋର୍ଡ ମାର୍କେଟ ମଧ୍ୟ ବହୁତ ବଡ ଏବଂ ବ୍ୟସ୍ତବହୁଳ । ଯଦିଓ ଲକ୍ ଡାଉନ୍ ଯୋଗୁଁ ଏତେ ଭିଡ ନଥିଲା ମାତ୍ର ଅଗ୍ନିକାଣ୍ଡ ଯୋଗୁଁ ବଜାରରେ ଅଧିକ କ୍ଷତି ଘଟିଛି । ବହୁ ସଂଖ୍ୟକ ଅଗ୍ନିଶମ କର୍ମଚାରୀ ନିଆଁ ଲିଭାଇବାରେ ନିୟୋଜିତ ଥିଲେ ।