ଆଜି ଭାରତ-ଶ୍ରୀଲଙ୍କା ପ୍ରଥମ ଟି-ଟ୍ୱେଣ୍ଟି: ରୋହିତଙ୍କ ଫୋକସ୍ରେ ମିଡିଲ୍ ଅର୍ଡର୍, ତ୍ରୁଟି ସୁଧାରିବା ଲକ୍ଷ୍ୟରେ ଶ୍ରୀଲଙ୍କା
ଆଜି ଘରୋଇ ଭାରତ ଓ ଶ୍ରୀଲଙ୍କା ମଧ୍ୟରେ ଟି-ଟ୍ୱେଣ୍ଟି ସିରିଜର ପ୍ରଥମ ମ୍ୟାଚ୍ ଲକ୍ଷ୍ନୌ ସ୍ଥିତ ‘ଭାରତ ରତ୍ନ’ ଅଟଳ ବିହାରୀ ବାଜପେୟୀ ଏକନ କ୍ରିକେଟ୍ ଷ୍ଟାଡିୟମରେ ଖେଳାଯିବ । ଉଭୟ ଦଳ ଏହି ମ୍ୟାଚ୍ ପାଇଁ ଜୋରଦାର ପ୍ରସ୍ତୁତି କରିଛନ୍ତି । ୱେଷ୍ଟଇଣ୍ଡିଜ୍ ବିପକ୍ଷରେ ଉଭୟ ଦିନିକିଆ ଓ ଟି-ଟ୍ୱେଣ୍ଟି ସିରିଜ ମୂଳପୋଛ କରିବା ପରେ ଭାରତୀୟ ଦଳର ମନୋବଳ ଦ୍ୱିଗୁଣିତ ହୋଇଛି । କିନ୍ତୁ ଆହତ ସମସ୍ୟା ଦଳକୁ ଚିନ୍ତାରେ ପକାଇଛି । ମ୍ୟାଚ୍ର ଦିନକ ପୂର୍ବରୁ ଇନ୍ ଫର୍ମ ବ୍ୟାଟର ସୂର୍ଯ୍ୟକୁମାର ଯାଦବ ସମ୍ପୂର୍ଣ୍ଣ ସିରିଜରୁ ବାଦ ପଡ଼ିଛନ୍ତି । ଇଣ୍ଡିଜ ବିପକ୍ଷ ଅନ୍ତିମ ଟି-ଟ୍ୱେଣ୍ଟିରେ ତାଙ୍କ ହାତରେ ଆଘାତ ଲାଗିଥିଲା । ତାଙ୍କ ପୂର୍ବରୁ ଦୀପକ ଚହର ମଧ୍ୟ ବାଦ ପଡ଼ିଥିଲେ । ଭ୍ରମଣକାରୀ ଶ୍ରୀଲଙ୍କା ଦଳ ଘରୋଇ ଦଳକୁ କଡ଼ା ଟକ୍କର ଦେବାକୁ ରଣନୀତି ପ୍ରସ୍ତୁତ କରିଛି । ଅଷ୍ଟ୍ରେଲିଆ ବିପକ୍ଷରେ ଅନ୍ତିମ ଟି-ଟ୍ୱେଣ୍ଟି ଜିତିବା ପରେ ଦଳ ଫର୍ମକୁ ଫେରିଛି । ପୂର୍ବ ପ୍ରଦର୍ଶନ ଭାରତ ବିପକ୍ଷରେ ଦୋହରାଇବା ନେଇ ଦଳ ଲକ୍ଷ୍ୟ ରଖିଛି ।ଗୁରୁବାର ମ୍ୟାଚ୍ ରାତି ୭.୦୦ଟାରୁ ଆରମ୍ଭ ହେବ ।
ମଧ୍ୟକ୍ରମରେ ପରୀକ୍ଷା ନିରୀକ୍ଷା
ରୋହିତ ଶର୍ମା ସ୍ଥାୟୀ ଅଧିନାୟକ ଭାବେ ୱେଷ୍ଟଇଣ୍ଡିଜ୍ ବିପକ୍ଷ ସିରିଜରୁ ଅଭିଯାନ ଆରମ୍ଭ କରିଥିଲେ । ତାଙ୍କ ନେତୃତ୍ୱରେ ଦଳ ୩ ମ୍ୟାଚ୍ ବିଶିଷ୍ଟ ଦିନିକିଆ ଓ ଟି-ଟ୍ୱେଣ୍ଟି ସିରିଜକୁ ମୂଳପୋଛ କରିଥିଲା । ତାଙ୍କ ନିକଟରେ ଆଉ ଏକ ଘରୋଇ ସିରିଜ ହାତେଇବାର ସୁଯୋଗ ରହିଛି । ବିରାଟ କୋହଲି ଓ ରିଷଭ ପନ୍ତଙ୍କୁ ବିଶ୍ରାମ ଦିଆଯାଇଥିବାରୁ ଭାରତ ମଧ୍ୟକ୍ରମରେ ପରୀକ୍ଷା ନିରୀକ୍ଷା କରିବା ନିଶ୍ଚିତ ରହିଛି । ରୋହିତ ଶର୍ମାଙ୍କ ସହ ଋତୁରାଜ ଗାଏକୱାଡଙ୍କୁ ଓପନିଂ ସୁଯୋଗ ମିଳିପାରେ । ଇଶାନ କିଷନ, ଶ୍ରେୟାସ ଆୟର ଓ ପ୍ରତ୍ୟାବର୍ତ୍ତନ କରିଥିବା ସଞ୍ଜୁ ସାମସନ୍ ଯଥାକ୍ରମେ ୩ରୁ ୫ନଂ ସ୍ଥାନରେ ବ୍ୟାଟିଂ କରିବେ ।
ଆଗକୁ ଟି-ଟ୍ୱେଣ୍ଟି ବିଶ୍ୱକପ୍ ରହିଛି । ପନ୍ତଙ୍କ ପରେ ଦ୍ୱିତୀୟ ୱିକେଟ୍ କିପର ଭାବେ ଟିମ୍ ମ୍ୟାନେଜମେଣ୍ଟ ସାମସନଙ୍କୁ ଖେଳାଇବାକୁ ଯୋଜନା ରଖିଛି । ସୂର୍ଯ୍ୟକୁମାରଙ୍କ ଅନୁପସ୍ଥିତିରେ ଦୀପକ ହୁଡ଼ାଙ୍କୁ ସୁଯୋଗ ମିଳିପାରେ । ଭେଙ୍କଟେଶ ଆୟର ଷଷ୍ଠ ସ୍ଥାନ ପକ୍କା କରି ସାରିଛନ୍ତି । ସେ ଗତ ସିରିଜରେ ଏହି ସ୍ଥାନରେ ବ୍ୟାଟିଂ କରି ସଫଳ ହୋଇଥିଲେ । ପ୍ରତ୍ୟାବର୍ତ୍ତନ କରିଥିବା ଯଶପ୍ରୀତ ବୁମ୍ରାଙ୍କ ସମେତ ଭୁବନେଶ୍ୱର କୁମାର ଓ ହର୍ଷଲ ପଟେଲ ପେସ୍ ବିଭାଗ ସମ୍ଭାଳିବେ । ଅଲରାଉଣ୍ଡର ରବୀନ୍ଦ୍ର ଜାଡ଼େଜା ଦଳକୁ ଫେରିଥିବାରୁ ୟୁଝବେନ୍ଦ୍ର ଚହଲ ଓ ରବି ବିଷ୍ଣୋଇଙ୍କ ମଧ୍ୟରୁ ଜଣଙ୍କୁ ସୁଯୋଗ ମିଳିବ। ରୋହିତ, ଭେଙ୍କଟେଶଙ୍କ ଉପରେ ସମସ୍ତଙ୍କ ନଜର ରହିବ ।
ତ୍ରୁଟି ସୁଧାରିବା ଲକ୍ଷ୍ୟରେ ଶ୍ରୀଲଙ୍କା
ଭ୍ରମଣକାରୀ ଶ୍ରୀଲଙ୍କା ଦଳ ଗତ ଅଷ୍ଟ୍ରେଲିଆ ଗସ୍ତରେ ୪-୧ରେ ଟି-ଟ୍ୱେଣ୍ଟି ସିରିଜ ପରାଜିତ ହୋଇଥିଲା । ବ୍ୟାଟିଂ ବିଭାଗର ପ୍ରଦର୍ଶନ ଅତ୍ୟନ୍ତ ନୈରାଶ୍ୟଜନକ ରହିଥିଲା । ଲକ୍ଷ୍ନୌରେ ପହଞ୍ଚିବା ପରେ ଡାସୁନ ଶଣକାଙ୍କ ନେତୃତ୍ତ୍ୱାଧିନ ଶ୍ରୀଲଙ୍କା ଦଳ ବ୍ୟାଟିଂରେ ତ୍ରୁଟି ସୁଧାରିବା ଉପରେ ଅଧିକ ଗୁରୁତ୍ୱ ଦେଇଛି । କରୋନା ସଂକ୍ରମିତ ହୋଇଥିବା ତାରକା ସ୍ପିନର ୱାନିଣ୍ଡୁ ହାସାରଙ୍ଗା ସମ୍ପୂର୍ଣ୍ଣ ଫିଟ୍ ନଥିବାରୁ ସିରିଜରୁ ବାଦ ପଡ଼ିଛନ୍ତି ।
ସମ୍ଭାବ୍ୟ ଏକାଦଶ
ଭାରତ: ରୋହିତ ଶର୍ମା (ଅଧିନାୟକ), ଋତୁରାଜ ଗାଏକୱାଡ୍, ଇଶାନ କିଷନ, ଶ୍ରେୟାସ ଆୟର, ସଞ୍ଜୁ ସାମସନ୍, ଭେଙ୍କଟେଶ ଆୟର, ରବୀନ୍ଦ୍ର ଜାଡ଼େଜା, ହର୍ଷଲ ପଟେଲ, ଯଶପ୍ରୀତ ବୁମରା, ଭୁବନେଶ୍ୱର କୁମାର/ମହମ୍ମଦ ସିରାଜ, ରବି ବିଷ୍ଣୋଇ/ୟୁଝବେନ୍ଦ୍ର ଚହଲ ।
ଶ୍ରୀଲଙ୍କା: ପଥୁମ ନିଶଙ୍କା, କାମିଲ ମିସାରା, ଚରିଥ ଆଶାଲଙ୍କା, କୁଶଲ ମେଣ୍ଡିସ୍, ଜନିଥ ଲିୟାନାଗେ, ଡାସୁନ ଶଣକା, ଚାମିକା କରୁଣାରତ୍ନେ, ଦୁଷ୍ମନ୍ତ ଚାମିରା, ଜେଫେରୀ ଭାଣ୍ଡରସେ, ମହେଶ ତୀକ୍ଷଣା, ଲାହିରୁ କୁମାରା
Comments are closed.