ଦେଶରେ ୬୫୩୧ ନୂଆ ଆକ୍ରାନ୍ତ ଚିହ୍ନଟ, ଓମିକ୍ରନ ଆକ୍ରାନ୍ତଙ୍କ ସଂଖ୍ୟା ୫୭୮କୁ ବୃଦ୍ଧି

ଦେଶରେ ଗତ ୨୪ ଘଣ୍ଟା ମଧ୍ୟରେ ୬୩୫୧ ଜଣ ନୂଆ କରୋନା ରୋଗୀଙ୍କୁ ଚିହ୍ନଟ କରାଯାଇଛି। ସେମାନଙ୍କ ମଧ୍ୟରେ ଓମିକ୍ରନ ପ୍ରକରଣରେ ଆକ୍ରାନ୍ତଙ୍କ ସଂଖ୍ୟା ୫୭୮କୁ ବୃଦ୍ଧିପାଇଛି। ଏହି ସମୟରେ ମଧ୍ୟରେ ୭୧୪୧ ଜଣ କରୋନାରୁ ସୁସ୍ଥ ହୋଇଛନ୍ତି। ସଂପ୍ରତି ଆରୋଗ୍ୟ ହାର ୯୮.୪୦% ରହିଥିବା ଜଣାଯାଇଛି। ଦିଲ୍ଲୀରେ ସର୍ବାଧିକ ୧୪୨ ଜଣ ଓମିକ୍ରନ ପ୍ରକରଣରେ ସଂକ୍ରମିତ ହୋଇଥିବାବେଳେ ମହାରାଷ୍ଟ୍ର ୧୪୧, କେରଳ ୫୭, ଗୁଜରାଟ ୪୯, ରାଜସ୍ଥାନ ୪୩, ତେଲେଙ୍ଗନା ୪୧, ତାମିଲନାଡୁ ୩୪ ଓ କର୍ଣ୍ଣାଟକରେ ୩୧ ଜଣ ଏହି ପ୍ରକରଣରେ ଆକ୍ରାନ୍ତ ହୋଇଛନ୍ତି। ସେହିଭଳି ମଧ୍ୟପ୍ରଦେଶରେ ୯, ଆନ୍ଧ୍ରପ୍ରଦେଶ ୬, ପଶ୍ଚିମବଙ୍ଗ ୬, ହରିଆଣା ୪, ଓଡ଼ିଶା ୪, ଚଣ୍ଡିଗଡ ୩, ଜମ୍ମୁ କାଶ୍ମୀର ୩, ଉତ୍ତରପ୍ରଦେଶ ୩, ହିମାଚଳପ୍ରଦେଶ ୧ ଓ ଲଦାଖରେ ଜଣେ ଚିହ୍ନଟ ହୋଇଛନ୍ତି। ମହାରାଷ୍ଟ୍ରରେ ସର୍ବାଧିକ ୪୨ ଜଣ ଓମିକ୍ରନ ଆକ୍ରାନ୍ତ ସୁସ୍ଥ ହୋଇସାରିଥିବାବେଳେ ରାଜସ୍ଥାନରୁ ୩୦ ଓ ଦିଲ୍ଲୀରେ ୨୩ ଜଣ ସୁସ୍ଥ ହୋଇଛନ୍ତି। ଇତିମଧ୍ୟରେ ଦେଶରେ ୧,୪୧,୭୦,୨୫,୬୫୪ ପାନ କୋଭିଡ ଟିକା ଦିଆଯାଇସାରିଛି। ଗତ ୨୪ ଘଣ୍ଟା ମଧ୍ୟରେ ୨୯ ଲକ୍ଷ ପାନରୁ ଅଧିକ ଟିକା ଦିଆଯାଇଥିବା କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରଣାଳୟ ସୂତ୍ରରୁ ଜଣାଯାଇଛି। ଏପର୍ଯ୍ୟନ୍ତ ମୋଟ ୬୭.୨୯ କୋଟି ନମୁନା ପରୀକ୍ଷା କରାଯାଇସାରିଛି। କୋଭିଡରୁ ୩,୪୨,୩୭,୪୯୫ ଜଣ ସୁସ୍ଥ ହୋଇସାରିଛନ୍ତି।