ନୂଆଦିଲ୍ଲୀ,୦୮/୦୨:ଲକ୍ଷ ଲକ୍ଷ ଟ୍ରେନ ଯାତ୍ରୀଙ୍କ ପାଇଁ ଆଶ୍ୱସ୍ତିକର ଖବର।ରେଳବାଇର ନୂଆ ନିଷ୍ପତ୍ତି । ଯାତ୍ରୀମାନେ ଦୀର୍ଘଦିନ ଧରି ଦାବି କରୁଥିଲେ ଯେ କେତେକ ଟ୍ରେନ ସୁପରଫାଷ୍ଟ ଟ୍ୟାଗ୍ ରଖିଥିଲେ ମଧ୍ୟ ବହୁତ ଷ୍ଟେସନରେ ରହୁଥିବାରୁ ସେମାନଙ୍କ ଗତି ସାଧାରଣ ଏକ୍ସପ୍ରେସ୍ ଟ୍ରେନ ପରି ହୋଇଯାଇଛି। ଏହାକୁ ଧ୍ୟାନରେ ରଖି ରେଳବାଇ ଏବେ ୧୦ଟି ପ୍ରମୁଖ ଟ୍ରେନରୁ ସୁପରଫାଷ୍ଟ ମାନ୍ୟତା ହଟାଇବାକୁ ନିଷ୍ପତ୍ତି ନେଇଛି।
କେବେ ଲାଗୁ ହେବ ନୂଆ ବ୍ୟବସ୍ଥା?
ଏହି ନୂଆ ବ୍ୟବସ୍ଥା ୧୩ ରୁ ୧୬ ଏପ୍ରିଲ ମଧ୍ୟରେ ପର୍ଯ୍ୟାୟକ୍ରମେ କାର୍ଯ୍ୟକାରୀ ହେବ। ସୁପରଫାଷ୍ଟ ଟ୍ୟାଗ୍ ହଟିବା ସହିତ ଏହି ଟ୍ରେନଗୁଡ଼ିକ ଏବେ ଜେନେରାଲ ଏକ୍ସପ୍ରେସ୍ ବର୍ଗ ଅଧୀନରେ ଚଳାଚଳ କରିବ। ଟ୍ରେନ ନମ୍ବରରେ ମଧ୍ୟ ପରିବର୍ତ୍ତନ ଆସିବ।
କେଉଁ କେଉଁ ଟ୍ରେନ ପ୍ରଭାବିତ?
ସୁପରଫାଷ୍ଟ ମାନ୍ୟତା ହଟୁଥିବା ଟ୍ରେନମାନଙ୍କ ମଧ୍ୟରେ —
ପ୍ରୟାଗରାଜ ରାମବାଗ–ହାଓଡ଼ା ବିଭୂତି ଏକ୍ସପ୍ରେସ୍
ହାଓଡ଼ା–କାଲକା ନେତାଜୀ ଏକ୍ସପ୍ରେସ୍
ହାଓଡ଼ା–ଡେରାଡୁନ କୁମ୍ଭ ଏକ୍ସପ୍ରେସ୍
ହାଓଡ଼ା–ଡେରାଡୁନ ଉପାସନା ଏକ୍ସପ୍ରେସ୍
ହାଓଡ଼ା–ଜମ୍ମୁ ତାୱି ହିମଗିରି ଏକ୍ସପ୍ରେସ୍
ଏହି ସମସ୍ତ ଟ୍ରେନରେ ବହୁତ ଷ୍ଟପେଜ୍ ଥିବାରୁ ଯାତ୍ରା ସମୟ ସୁପରଫାଷ୍ଟ ମାନକ ସହିତ ସାମଞ୍ଜସ୍ୟ ନଥିଲା। ଉଦାହରଣ ସ୍ୱରୂପ, ବିଭୂତି ଏକ୍ସପ୍ରେସ୍ ୩୧ଟି ଷ୍ଟେସନରେ ଏବଂ ନେତାଜୀ ଏକ୍ସପ୍ରେସ୍ ୩୮ଟି ଷ୍ଟେସନରେ ରହୁଥାଏ।
ଯାତ୍ରୀଙ୍କୁ କେତେ ମିଳିବ ଲାଭ?
ସୁପରଫାଷ୍ଟ ଟ୍ୟାଗ୍ ହଟିବା ସହିତ ଅତିରିକ୍ତ ସୁପରଫାଷ୍ଟ ଚାର୍ଜ୍ ଆଦାୟ ହେବ ନାହିଁ।ସ୍ଲିପର ଶ୍ରେଣୀରେ ପ୍ରାୟ ୩୦ ଟଙ୍କା କମିବ।
2AC/3AC କୋଚ୍ରେ ପ୍ରାୟ ୪୫ ଟଙ୍କା ସେଭିଂ ହେବ। ପରିବାର ସହ ଯାତ୍ରା କରୁଥିବା ଯାତ୍ରୀ ଓ ଦୈନିକ ଯାତ୍ରୀଙ୍କ ପାଇଁ ଏହା ଏକ ଲାଭଦାୟକ ପଦକ୍ଷେପ।
କାହିଁକି ନିଆଯାଇଲା ଏହି ନିଷ୍ପତ୍ତି?
ରେଳବାଇର ନିୟମ ଅନୁଯାୟୀ, ସୁପରଫାଷ୍ଟ ଟ୍ରେନର ଗତି ନିର୍ଦ୍ଧାରିତ ମାନକ ଅନୁଯାୟୀ ହେବା ଆବଶ୍ୟକ। କିନ୍ତୁ ବହୁତ ଷ୍ଟପେଜ୍ ଥିବାରୁ ଏହି ଟ୍ରେନଗୁଡ଼ିକ ସେହି ମାନକ ପୂରଣ କରୁନଥିଲେ। ଯାତ୍ରୀମାନଙ୍କ ଅଭିଯୋଗ ଓ ଦାବିକୁ ଧ୍ୟାନରେ ରଖି ଏହି ପଦକ୍ଷେପ ନିଆଯାଇଛି।
Comments are closed.