୨୪ ଘଣ୍ଟାରେ ଦେଶରେ ୧୪୨୯ ଆକ୍ରାନ୍ତ ଓ ୫୭ ମୃତ

ଦେଶରେ କରୋନା ଭାଇରସ ଦିନକୁ ଦିନ ନିଜର କାୟା ବିସ୍ତାର କରିବାରେ ଲାଗୁଛି । ଅନ୍ୟ ଦେଶଗୁଡ଼ିକ ତୁଳନାରେ ଭାରତରେ ସଂକ୍ରମଣ ହାର କମ୍‌ ଥିଲେ ବି ତାହା ଚିନ୍ତାଜନକ ବିଷୟ ପାଲଟିଛି। ଦେଶରେ ଗତ ୨୪ ଘଣ୍ଟା ମଧ୍ୟରେ ୧୪୨୯ ଜଣ ନୂଆ ଆକ୍ରାନ୍ତ ଚିହ୍ନଟ ହୋଇଥିବାବେଳେ ୫୭ ଜଣଙ୍କ ମୃତ୍ୟୁ ଘଟିଛି। କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରଣାଳୟ ସୂଚନା ଅନୁସାରେ, ଦେଶରେ ଏବେ ମୋଟ ସଂକ୍ରମିତଙ୍କ ସଂଖ୍ୟା ୨୪ ହଜାର ୫୦୬ରେ ପହଞ୍ଚିଥିବାବେଳେ ୭୭୫ ଜଣ ଏହି ମହାମାରୀ ଭୂତାଣୁରେ ପ୍ରାଣ ହରାଇଲେଣି। ୫ ହଜାର ୬୨ ଜଣ ଚିକିତ୍ସା ପରେ ସୁସ୍ଥ ହୋଇ ଘରକୁ ଫେରିଥିବାବେଳେ ୧୮ ହଜାର ୬୬୮ ଜଣ ଏବେ ଚିକିତ୍ସାଧୀନ ଅଛନ୍ତି। ସେହିଭଳି ଓଡିଶାରେ ଆକ୍ରାନ୍ତଙ୍କ ସଂଖ୍ୟା ୯୪ରେ ପହଞ୍ଚିଥିବାବେଳେ ୩ ଅଙ୍କ ଛୁଇଁବା ପାଇଁ ଆଉ ମାତ୍ର ଅଳ୍ପ ସଂଖ୍ୟା ବାକି ରହିଛି । ଏହି ଆକ୍ରାନ୍ତଙ୍କ ମଧ୍ୟରେ ୩୩ ଜଣ ସୁସ୍ଥ ହୋଇ ଘରକୁ ଫେରିଥିବାବେଳେ ସେମାନଙ୍କ ମଧ୍ୟରୁ ଜଣକର ମୃତ୍ୟୁ ଘଟିଛି ।

ତେବେ ପୂର୍ବ ଭଳି ମହାରାଷ୍ଟ୍ର ଦେଶରେ ସର୍ବାଧିକ କ୍ଷତିଗ୍ରସ୍ତ ରାଜ୍ୟ ଭାବେ ଶୀର୍ଷରେ ରହିଛି। ଶୁକ୍ରବାର ସକାଳ ସୁଦ୍ଧା ମହାରାଷ୍ଟ୍ରରେ ସର୍ବାଧିକ ୬୮୧୭ ଜଣ ସଂକ୍ରମିତ ହୋଇଥିବାବେଳେ ୩୦୧ ଜଣଙ୍କର ମୃତ୍ୟୁ ଘଟିଛି। ଏହା ପଛକୁ ରହିଛି ଗୁଜରାଟ। ଗୁଜରାଟରେ ବର୍ତ୍ତମାନ ସୁଦ୍ଧା ଆକ୍ରାନ୍ତଙ୍କ ସଂଖ୍ୟା ୨୮୧୫ରେ ପହଞ୍ଚିଛି। ମୃତ୍ୟୁ ସଂଖ୍ୟା ୧୨୭ ଛୁଇଁଛି। ସେହିପରି ରାଜଧାନୀ ନୂଆଦିଲ୍ଲୀରେ ୨୫୧୪ ଆକ୍ରାନ୍ତ ହୋଇଥିବାବେଳେ ୫୩ ଜଣଙ୍କ ମୃତ୍ୟୁ ଘଟିଛି, ରାଜସ୍ଥାନରେ ୨୦୩୪ ଆକ୍ରାନ୍ତ ଓ ୩୨ ମୃତ, ମଧ୍ୟପ୍ରଦେଶରେ ୧୮୪୬ ଆକ୍ରାନ୍ତ ଓ ୯୨ ମୃତ, ତାମିଲନାଡୁରେ ୧୭୫୫ ସଂକ୍ରମିତ, ୨୨ ମୃତ ଏବଂ ଉତ୍ତର ପ୍ରଦେଶରେ ୧୬୨୧ ଆକ୍ରାନ୍ତ ହୋଇଥିବାବେଳେ ୨୫ ଜଣ ପ୍ରାଣ ହରାଇଛନ୍ତି।