ସଂସ୍କାର, ଟିକସ ପଦକ୍ଷେପ ଏବଂ ଅଭିବୃଦ୍ଧି ଫୋକସ୍ ପାଇଁ ସିଆଇଆଇ ଓଡ଼ିଶା ୨୦୨୫-୨୬ ଆର୍ଥିକ ବର୍ଷର ବଜେଟକୁ ପ୍ରଶଂସା କରିଛି

ଭୁବନେଶ୍ୱର : ଭାରତୀୟ ଶିଳ୍ପ ମହାସଂଘ (ସିଆଇଆଇ) ଓଡ଼ିଶା ରାଜ୍ୟ ପରିଷଦ ପକ୍ଷରୁ କେନ୍ଦ୍ର ବଜେଟ୍ ୨୦୨୫-୨୬କୁ ସ୍ୱାଗତ କରିବା ସହ, ଏଥିରେ ସଂସ୍କାର, ଅର୍ଥନୈତିକ ଅଭିବୃଦ୍ଧି, ନିଯୁକ୍ତି ସୃଷ୍ଟି ଏବଂ ଷ୍ଟାର୍ଟଅପ୍ ଏବଂ ଏମ୍ଏସ୍ଏମ୍ଇପାଇଁ ସହାୟତା ଉପରେ ଗୁରୁତ୍ୱ ଦିଆଯିବାକୁ ପ୍ରଶଂସା କରାଯାଇଛି। ସିଆଇଆଇ ଦ୍ୱାରା ଆୟୋଜିତ ବଜେଟ୍ ୨୦୨୫-୨୬ର ଲାଇଭ୍ ଭିଉ ଅଧିବେଶନରେ ଶିଳ୍ପନେତା ଏବଂ ବିଶେଷଜ୍ଞମାନେ ବଜେଟ୍ର ପ୍ରମୁଖ ଦିଗ ଉପରେ ଆଲୋକପାତ କରି ଏହାକୁ ପ୍ରଗତିଶୀଳ ଏବଂ ଅଭିବୃଦ୍ଧି ଭିତ୍ତିକ ବୋଲି ବର୍ଣ୍ଣନା କରିଥିଲେ।

ଗରିବ, ଯୁବବର୍ଗ, କୃଷକ ଓ ମହିଳାଙ୍କ ସମେତ ସମାଜର ସମସ୍ତ ବର୍ଗର କଲ୍ୟାଣ ଉପରେ ଗୁରୁତ୍ବ ଦେଇ ବଜେଟର ସାମଗ୍ରିକ ଆଭିମୁଖ୍ୟକୁ ସିଆଇଆଇ ଓଡ଼ିଶା ରାଜ୍ୟ ପରିଷଦର ଅଧ୍ୟକ୍ଷ ଡ ପ୍ରଦୀପ୍ତ ମହାନ୍ତି ପ୍ରଶଂସା କରିଥିଲେ। ବଜେଟରେ ପାଞ୍ଚଟି କ୍ଷେତ୍ର ଟିକସ, ନଗର ଉନ୍ନୟନ, ଖଣି, ଆର୍ଥିକ କ୍ଷେତ୍ର ଏବଂ ଶକ୍ତି ଏବଂ ନିୟାମକ ସଂସ୍କାର ସହିତ ପ୍ରମୁଖ ଅଭିବୃଦ୍ଧି କ୍ଷେତ୍ର କୃଷି, ନିବେଶ, ଏମଏସଏମଇ ଏବଂ ରପ୍ତାନିକୁ ପ୍ରାଥମିକତା ଦିଆଯିବା ସହିତ, ଗୁରୁତ୍ୱପୂର୍ଣ୍ଣ ଟିକସ ରିହାତି ପ୍ରଦାନ କରାଯାଇଛି ବୋଲି ସେ ଗୁରୁତ୍ୱାରୋପ କରିଥିଲେ ।

ସିଆଇଆଇ ଓଡ଼ିଶା ରାଜ୍ୟ ପରିଷଦର ପୂର୍ବତନ ଅଧ୍ୟକ୍ଷ ଶଶି ଶେଖର ମହାନ୍ତି ମୋଦୀ ୩.୦ ବଜେଟକୁ ପରିବର୍ତନଶୀଳ ଓ ନିଯୁକ୍ତି ଭିତ୍ତିକ ବୋଲି ବର୍ଣ୍ଣନା କରିଥିଲେ। ଭିତ୍ତିଭୂମି କ୍ଷେତ୍ରରେ ସରକାରଙ୍କ ୧୦.୫ ଲକ୍ଷ କୋଟି ଟଙ୍କାରୁ ଅଧିକ ପୁଞ୍ଜି ବ୍ୟୟ ସହ ଏମ୍ଏସ୍ଏମ୍ଇ ଓ ଷ୍ଟାର୍ଟଅପ୍ କ୍ଷେତ୍ରରେ ଗୁରୁତ୍ୱପୂର୍ଣ୍ଣ ସଂସ୍କାର ଉପରେ ଗୁରୁତ୍ୱାରୋପ କରିଛନ୍ତି। ଏହି ପଦକ୍ଷେପ ଶିଳ୍ପ ପୁଞ୍ଜିନିବେଶକୁ ପ୍ରୋତ୍ସାହିତ କରିବ ଏବଂ ଭାରତର ଅର୍ଥନୈତିକ ବିକାଶକୁ ତ୍ୱରାନ୍ୱିତ କରିବ ବୋଲି ସେ କହିଛନ୍ତି।

ସିଆଇଆଇ ଓଡ଼ିଶା ରାଜ୍ୟ ପରିଷଦର ପୂର୍ବତନ ଅଧ୍ୟକ୍ଷ ସଞ୍ଜୟ ପଟ୍ଟନାୟକ ଅର୍ଥନୈତିକ ସଶକ୍ତୀକରଣ ଉପରେ ନିଜର ମତ ବ୍ୟକ୍ତ କରି କହିଥିଲେ ଯେ ବ୍ୟବସାୟ କରିବାରେ ସୁଗମତା, ଗୁରୁତ୍ୱପୂର୍ଣ୍ଣ ଖଣିଜ ପଦାର୍ଥର ଉପଲବ୍ଧତା ଏବଂ ଏକ ଦୃଢ଼ ମଧ୍ୟବିତ୍ତ ଶ୍ରେଣୀ ଦ୍ୱାରା ଏକ ଦେଶର ପ୍ରଗତି ହୋଇଥାଏ । ପ୍ରଶାସନ ସୁଯୋଗକୁ ପ୍ରୋତ୍ସାହିତ କରିବା, ଯୋଗାଯୋଗ ବୃଦ୍ଧି ଏବଂ ଆର୍ଥିକ ସଂସ୍କାର ସମୃଦ୍ଧିର ମୁଖ୍ୟ ଚାଳକ ବୋଲି ସେ ଗୁରୁତ୍ୱାରୋପ କରିଥିଲେ l

ସିଆଇଆଇ ନ୍ୟାସନାଲ କାଉନସିଲର ସଦସ୍ୟ ସ୍ୱୟଂ ପ୍ରକାଶ ବରାଳ ଭାରତର ଅର୍ଥନୈତିକ ଗତିପଥକୁ ଚଳାଇବାରେ ଏମଏସଏମଇ ଏବଂ ଷ୍ଟାର୍ଟଅପର ଗୁରୁତ୍ୱପୂର୍ଣ୍ଣ ଭୂମିକା ଉପରେ ଆଲୋକପାତ କରିଥିଲେ । ସେ ଦର୍ଶାଇଥିଲେ ଯେ ସେମାନଙ୍କର ପହଂଚବୃଦ୍ଧି, ଅଭିନବତାକୁ ପ୍ରୋତ୍ସାହିତ କରିବା ଏବଂ ଆର୍ଥିକ ସହାୟତା ବୃଦ୍ଧି କେବଳ ଅର୍ଥନୈତିକ ଅଭିବୃଦ୍ଧିକୁ ପ୍ରୋତ୍ସାହିତ କରେ ନାହିଁ ବରଂ ନିଯୁକ୍ତି ଏବଂ ଉଦ୍ୟୋଗମଧ୍ୟ ସୃଷ୍ଟି କରେ, ଯାହା ଭାରତକୁ ୫ ଟ୍ରିଲିୟନ ଡଲାର ଅର୍ଥନୀତିରେ ପରିଣତ କରିବା ପଥରେ ଅବସ୍ଥାପିତ କରିବ ।

ସିଆଇଆଇ ଓଡ଼ିଶା ରାଜ୍ୟ ପରିଷଦ ଅର୍ଥନୈତିକ ଭିତ୍ତିଭୂମିକୁ ସୁଦୃଢ଼ କରିବା, ନିଯୁକ୍ତି ସୃଷ୍ଟି କରିବା ଏବଂ ସ୍ଥାୟୀ ଅଭିବୃଦ୍ଧିକୁ ତ୍ୱରାନ୍ୱିତ କରିବା ପାଇଁ କେନ୍ଦ୍ର ବଜେଟର ଦକ୍ଷତା ଉପରେ ନିଜର ବିଶ୍ୱାସ ଦୋହରାଇଛି, ଯାହା ଭାରତର ବିକାଶ ଯାତ୍ରାରେ ଏକ ଗୁରୁତ୍ୱପୂର୍ଣ୍ଣ ପଦକ୍ଷେପରେ ପରିଣତ କରିଛି ।