ପଞ୍ଜାବ ନିର୍ବାଚନ ପୂର୍ବରୁ ନବଜୋତ କୌର ସିଦ୍ଧୁ ଗଠନ କଲେ ନୂଆ ପାର୍ଟି, ରାଘବ ଚଢ଼ା ଓ ରାହୁଲ ଗାନ୍ଧୀଙ୍କ ପାଇଁ କହିଲେ ବଡ଼ କଥା

ନୂଆଦିଲ୍ଲୀ: କଂଗ୍ରେସର ପୂର୍ବତନ ସାଂସଦ ତଥା ନବଜୋତ ସିଂହ ସିଦ୍ଧୁଙ୍କ ପତ୍ନୀ ନବଜୋତ କୌର ସିଦ୍ଧୁ ବୁଧବାର ଏକ ସାମ୍ବାଦିକ ସମ୍ମିଳନୀ କରିଛନ୍ତି। ଏହି ସମୟରେ ସେ ଆସନ୍ତା ବର୍ଷ ପଞ୍ଜାବରେ ହେବାକୁ ଥିବା ବିଧାନସଭା ନିର୍ବାଚନ ପୂର୍ବରୁ ଏକ ନୂଆ ପାର୍ଟି ଘୋଷଣା କରିଛନ୍ତି। ସେ ଏହି ନୂଆ ଦଳର ନାମ ‘ଭାରତୀୟ ରାଷ୍ଟ୍ରବାଦୀ ପାର୍ଟି’ ରଖିଛନ୍ତି।

ଏହି ଅବସରରେ ଗଣମାଧ୍ୟମ ପ୍ରତିନିଧିମାନେ ତାଙ୍କୁ ଆମ୍ ଆଦମୀ ପାର୍ଟି (ଆପ୍) ର ରାଜ୍ୟସଭା ସାଂସଦ ରାଘବ ଚଢ଼ାଙ୍କ ବିଷୟରେ ପଚାରିଥିଲେ। ସୂଚନାଯୋଗ୍ୟ ଯେ, ନିକଟରେ ଆପ୍ ରାଘବ ଚଢ଼ାଙ୍କୁ ରାଜ୍ୟସଭା ଉପନେତା ପଦରୁ ହଟାଇ ଦେଇଥିଲା। ଏହା ପରେ ରାଘବ ଚଢ଼ା ପାଲଟା ଜବାବ ଦେବାରୁ ଆପ୍ ନେତାମାନେ ତାଙ୍କୁ ଟାର୍ଗେଟ୍ କରିଥିଲେ।

ରାଘବ ଚଢ଼ାଙ୍କ ସହ ଜଡିତ ଏକ ପ୍ରଶ୍ନର ଉତ୍ତରରେ ନବଜୋତ କୌର ସିଦ୍ଧୁ କହିଛନ୍ତି ଯେ, “ମୋତେ ଲାଗୁଛି ରାଘବ ଚଢ଼ା ଜଣେ ଭଲ ମଣିଷ। କିନ୍ତୁ ସେ ଯାହା କରିବାକୁ ଚାହୁଁଛନ୍ତି କରନ୍ତୁ, ସେ ବିଷୟରେ ମୋତେ ଜଣାନାହିଁ। ସେ ବହୁତ ଭଲ ପ୍ରସଙ୍ଗମାନ ଉଠାଇଛନ୍ତି। ସେ ମୋଦୀ ହୁଅନ୍ତୁ, ରାହୁଲ ଗାନ୍ଧୀ କିମ୍ବା ପ୍ରିୟଙ୍କା ଗାନ୍ଧୀ ହୁଅନ୍ତୁ, ଯିଏ ଭଲ କାମ କରିବେ, ମୁଁ ତାଙ୍କୁ ପ୍ରଶଂସା କରିବି।”

ନବଜୋତ କୌର ସିଦ୍ଧୁ ଆହୁରି ମଧ୍ୟ କହିଛନ୍ତି, “ମୁଁ ଆଜି ବି ରାହୁଲ ଗାନ୍ଧୀଙ୍କୁ ନିଜର ଭାଇ ଏବଂ ପ୍ରିୟଙ୍କା ଗାନ୍ଧୀଙ୍କୁ ନିଜର ଭଉଣୀ ବୋଲି ମାନେ। ମୁଁ ତାଙ୍କୁ ବହୁତ ଭଲପାଏ। ମୋଦୀଜୀଙ୍କ ପ୍ରତି ମଧ୍ୟ ମୋର ସମ୍ମାନ ଅଛି। ସମସ୍ତଙ୍କ ପାଇଁ ମୋ ମନରେ ସମ୍ମାନ ଅଛି। ସୁଖବୀର ସିଂହ ବାଦଲଙ୍କ ପାଇଁ ଅଛି, ଭଗବନ୍ତ ମାନଙ୍କ ପାଇଁ ବି ଅଛି, କିନ୍ତୁ କେବଳ ଭଲ କାମ ପାଇଁ। ଯାହା ଭୁଲ ତାହା ସବୁବେଳେ ଭୁଲ। ମୋ ଭିତରେ ବି କିଛି ଭୁଲ୍ ଥାଇପାରେ। ମୁଁ ଲୋକଙ୍କର ଭଲ ଦିଗ ଦେଖେ। ପଞ୍ଜାବରେ କ’ଣ ହେଉଛି ତାହା ରାହୁଲ ଗାନ୍ଧୀଙ୍କୁ ଜଣାଇବା ପାଇଁ ମୁଁ ବହୁତ ଚେଷ୍ଟା କରିଥିଲି, କିନ୍ତୁ ମୋ କଥା ଶୁଣିବାକୁ କେହି ନଥିଲେ। କେ.ସି ଭେଣୁଗୋପାଳ ଜୀ ମୋତେ ରାହୁଲ ଗାନ୍ଧୀଙ୍କ ସହ ଭେଟିବାକୁ ଦେଇନଥିଲେ।”