ଗୌତମ ଗମ୍ଭୀର ଭାରତୀୟ ଦଳର ମୁଖ୍ୟ ପ୍ରଶିକ୍ଷକ ଦାୟିତ୍ୱ ନେବା ପରେ ଦଳ ସୀମିତ ଓଭର କ୍ରିକେଟରେ ଅଦ୍ଭୁତପୂର୍ବ ସଫଳତା ପାଇଛି। ୨୦୨୪ ଟି-୨୦ ବିଶ୍ୱକପ ପରଠାରୁ ଭାରତ କୌଣସି ଟି-୨୦ ସିରିଜ୍ ହାରିନାହିଁ ଏବଂ ୨୦୨୫ ଚାମ୍ପିୟନ୍ସ ଟ୍ରଫି ସହ ୨୦୨୬ ଟି-୨୦ ବିଶ୍ୱକପ୍ ମଧ୍ୟ ନିଜ ନାମରେ କରିଛି। କିନ୍ତୁ ଏହାର ଓଲଟା ଚିତ୍ର ଟେଷ୍ଟ କ୍ରିକେଟରେ ଦେଖିବାକୁ ମିଳିଛି, ଯେଉଁଠି ଦଳର ପ୍ରଦର୍ଶନ ଅତି ନୈରାଶ୍ୟଜନକ ରହିଛି। ବାଂଲାଦେଶ ଏବଂ ୱେଷ୍ଟଇଣ୍ଡିଜ୍ ବିପକ୍ଷରେ ସିରିଜ୍ ଜିତିବା ବ୍ୟତୀତ ଭାରତ ଅନ୍ୟ କୌଣସି ବଡ଼ ସଫଳତା ପାଇନାହିଁ। ନ୍ୟୁଜିଲାଣ୍ଡ ଦଳ ଭାରତ ଗସ୍ତରେ ଆସି ଘରୋଇ ମାଟିରେ ଭାରତକୁ ୩-୦ରେ ହରାଇଥିବା ବେଳେ, ଦଳ ୨୦୨୪-୨୫ ବର୍ଡର-ଗାଭାସ୍କର ଟ୍ରଫି ମଧ୍ୟ ହାରିଛି। ସେହିପରି ଇଂଲଣ୍ଡ ବିପକ୍ଷ ୫ ମ୍ୟାଚ୍ ବିଶିଷ୍ଟ ସିରିଜ୍ ୨-୨ରେ ବରାବର ରହିଥିବା ବେଳେ ଦକ୍ଷିଣ ଆଫ୍ରିକା ଭାରତକୁ ୨-୦ରେ ହ୍ୱାଇଟୱାଶ୍ କରିଛି।
ନିଜର ପ୍ରଶିକ୍ଷକ କାଳରେ ଟେଷ୍ଟ କ୍ରିକେଟରେ ଏହି ବିଫଳତାକୁ ନେଇ ଗୌତମ ଗମ୍ଭୀର ମୁହଁ ଖୋଲିଛନ୍ତି। ସେ କହିଛନ୍ତି ଯେ, ଭାରତୀୟ ଟେଷ୍ଟ ଦଳ ଏବେ ଏକ ପରିବର୍ତ୍ତନ (Transition) ଦେଇ ଗତି କରୁଛି। ନ୍ୟୁଜିଲାଣ୍ଡ ବିପକ୍ଷରେ ଖେଳିଥିବା ଦଳ ଏବଂ ଦକ୍ଷିଣ ଆଫ୍ରିକା ବିପକ୍ଷ ଦଳ ମଧ୍ୟରେ ଅନେକ ପାର୍ଥକ୍ୟ ରହିଛି। ଅନୁଭବ କମ ଥିଲେ ମଧ୍ୟ ସେ ନିଜେ ଦଳର ବିଫଳତା ପାଇଁ ଦାୟିତ୍ୱ ଗ୍ରହଣ କରିବାକୁ ପ୍ରସ୍ତୁତ ବୋଲି ପ୍ରକାଶ କରିଛନ୍ତି। ସେ କହିଛନ୍ତି ଯେ, ସମାଲୋଚନା ସ୍ୱାଭାବିକ, କିନ୍ତୁ ଏହି ଦଳ ହିଁ ଇଂଲଣ୍ଡରେ ଚମତ୍କାର ପ୍ରଦର୍ଶନ କରିଥିଲା।
ଉଲ୍ଲେଖଯୋଗ୍ୟ ଯେ, ବିରାଟ କୋହଲି ଏବଂ ରୋହିତ ଶର୍ମା ୨୦୨୫ ମେ’ ମାସରେ ଅବସର ନେବା ପରେ ଦଳରେ ବଡ଼ ଶୂନ୍ୟସ୍ଥାନ ସୃଷ୍ଟି ହୋଇଛି। ବର୍ଡର-ଗାଭାସ୍କର ଟ୍ରଫିରେ ରୋହିତ ଶର୍ମାଙ୍କ ଖରାପ ଫର୍ମ ଯୋଗୁଁ ସେ ନିଜକୁ ପଞ୍ଚମ ଟେଷ୍ଟରୁ ଦୂରେଇ ରଖିଥିଲେ। ପରେ ଚୟନ କମିଟି ଜସପ୍ରୀତ ବୁମରାଙ୍କୁ ଅଣଦେଖା କରି ଶୁଭମନ ଗିଲଙ୍କୁ ନୂଆ ଟେଷ୍ଟ ଅଧିନାୟକ ଏବଂ ଋଷଭ ପନ୍ତଙ୍କୁ ଉପ-ଅଧିନାୟକ ଭାବେ ନିଯୁକ୍ତ କରିଥିଲେ। ଗିଲଙ୍କ ନେତୃତ୍ୱରେ ଦଳ ଇଂଲଣ୍ଡରେ ଭଲ ଖେଳିଥିଲେ ମଧ୍ୟ ଦକ୍ଷିଣ ଆଫ୍ରିକା ବିପକ୍ଷରେ ପରାସ୍ତ ହୋଇଛି।
Comments are closed.