ମୁମ୍ବାଇ: ଟି-୨୦ ବିଶ୍ୱକପ୍ ୨୦୨୬ର ଦ୍ୱିତୀୟ ସେମିଫାଇନାଲରେ ଦୁଇ ଶକ୍ତିଶାଳୀ ଦଳ ଭାରତ ଓ ଇଂଲଣ୍ଡ ମଧ୍ୟରେ ମହାସମର ହେବାକୁ ଯାଉଛି। କିନ୍ତୁ ଏହି ଗୁରୁତ୍ୱପୂର୍ଣ୍ଣ ମ୍ୟାଚ୍ ପୂର୍ବରୁ ଭାରତୀୟ ବୋଲିଂ କୋଚ୍ ମୋର୍ନେ ମୋର୍କେଲ କେତେକ ଗୁରୁତ୍ୱପୂର୍ଣ୍ଣ ଦିଗ ଉପରେ ଚିନ୍ତା ପ୍ରକଟ କରିଛନ୍ତି, ଯାହା ମ୍ୟାଚର ଗତିପଥ ବଦଳାଇ ଦେଇପାରେ।
ମୋର୍କେଲଙ୍କ କହିବା ଅନୁଯାୟୀ, ମୁମ୍ବାଇର ପାଣିପାଗ ଏବଂ ସନ୍ଧ୍ୟା ସମୟରେ ପଡ଼ୁଥିବା ଶିଶିର ବା ‘ଡିଉ ଫ୍ୟାକ୍ଟର’ ବୋଲରଙ୍କ ପାଇଁ ଏକ ବଡ଼ ସମସ୍ୟା ହୋଇପାରେ। ଯଦି ଦ୍ୱିତୀୟ ପାଳିରେ ଅଧିକ ଶିଶିର ପଡ଼େ, ତେବେ ବୋଲରଙ୍କ ପାଇଁ ବଲ୍ ଗ୍ରିପ୍ କରିବା କଷ୍ଟକର ହେବ ଏବଂ ସ୍ପିନରମାନେ ସେମାନଙ୍କର ପ୍ରଭାବ ହରାଇବେ। ଏହା ଟସ୍ର ଗୁରୁତ୍ୱକୁ ବଢ଼ାଇ ଦେଇଛି, ଯଦିଓ ମୋର୍କେଲ କହିଛନ୍ତି ଯେ ଟସ୍ ଆମ ନିୟନ୍ତ୍ରଣରେ ନାହିଁ, ତେଣୁ ଆମକୁ ସବୁ ପରିସ୍ଥିତି ପାଇଁ ପ୍ରସ୍ତୁତ ରହିବାକୁ ହେବ।
ୱାଙ୍ଖେଡେ ପିଚ୍ ସାଧାରଣତଃ ବ୍ୟାଟରଙ୍କୁ ସହାୟକ ହୋଇଥାଏ। ମୋର୍କେଲ ସୂଚନା ଦେଇଛନ୍ତି ଯେ ଏଠାରେ ‘ଏକ୍ସଟ୍ରା ବାଉନ୍ସ’ ରହିଛି, ଯାହା ଉଭୟ ବ୍ୟାଟର ଏବଂ ବୋଲରଙ୍କୁ ସୁଯୋଗ ଦେବ। ବୋଲରମାନେ ଯଦି ସଠିକ୍ ଲେନ୍ଥରେ ବୋଲିଂ କରନ୍ତି, ତେବେ ୱିକେଟ୍ ମିଳିବାର ସମ୍ଭାବନା ରହିଛି। ମାତ୍ର ସାମାନ୍ୟ ଭୁଲ ହେଲେ ଛୋଟ ବାଉଣ୍ଡ୍ରି ଯୋଗୁଁ ବ୍ୟାଟରମାନେ ବଡ଼ ସଟ୍ ଖେଳିବାରେ ସଫଳ ହେବେ।
ଭାରତୀୟ ଦଳର ଫିଲ୍ଡିଂ ମାନ ଏହି ଟୁର୍ଣ୍ଣାମେଣ୍ଟରେ ସେତେଟା ଭଲ ରହିନାହିଁ। ମୋର୍କେଲ ସ୍ୱୀକାର କରିଛନ୍ତି ଯେ କେତେକ ଗୁରୁତ୍ୱପୂର୍ଣ୍ଣ କ୍ୟାଚ୍ ଛାଡ଼ିବା ଏବଂ ମିସ୍-ଫିଲ୍ଡିଂ ଯୋଗୁଁ ଦଳ ପ୍ରତି ମ୍ୟାଚରେ ପ୍ରାୟ ୧୫-୨୦ ରନ୍ ଅଧିକ ଦେଉଛି। ସେମିଫାଇନାଲ୍ ଭଳି ଏକ ବଡ଼ ମଞ୍ଚରେ ଇଂଲଣ୍ଡ ଭଳି ଦଳ ବିରୁଦ୍ଧରେ ଏପରି ଭୁଲ ମହଙ୍ଗା ପଡ଼ିପାରେ।
ଯୁବ ଓପନର ଅଭିଷେକ ଶର୍ମାଙ୍କ ଖରାପ ଫର୍ମକୁ ନେଇ ଚର୍ଚ୍ଚା ହେଉଥିବା ବେଳେ ମୋର୍କେଲ ତାଙ୍କୁ ସମର୍ଥନ କରିଛନ୍ତି। ସେ କହିଛନ୍ତି ଯେ ଗତବର୍ଷ ଅଭିଷେକ ଏହି ପଡ଼ିଆରେ ଇଂଲଣ୍ଡ ବିରୁଦ୍ଧରେ ହିଁ ଏକ ଶତକ (୧୩୫ ରନ୍) ହାସଲ କରିଥିଲେ। ସେଥିପାଇଁ ତାଙ୍କୁ ସେହି ‘ଫିଲ୍-ଗୁଡ୍ ମୋମେଣ୍ଟ’କୁ ମନେ ପକାଇବାକୁ ଏବଂ ଆତ୍ମବିଶ୍ୱାସର ସହ ଖେଳିବାକୁ ପରାମର୍ଶ ଦିଆଯାଇଛି।
ସ୍ପିନ୍ ବିଭାଗରେ ବରୁଣ ଚକ୍ରବର୍ତ୍ତୀଙ୍କ ଭୂମିକା ଗୁରୁତ୍ୱପୂର୍ଣ୍ଣ ରହିବ। ମୋର୍କେଲ କହିଛନ୍ତି ଯେ ବରୁଣଙ୍କ ପାଖରେ ପ୍ରତିଟି ବଲ୍ରେ ୱିକେଟ୍ ନେବାର ଦକ୍ଷତା ଅଛି। ମାତ୍ର ତାଙ୍କୁ ନିଜର ଲେନ୍ଥ ଏବଂ କଣ୍ଟ୍ରୋଲ୍ ଉପରେ ଅଧିକ ଧ୍ୟାନ ଦେବାକୁ ହେବ, ଯେପରି ସେ ରନ୍ ଗତିକୁ ରୋକିବା ସହ ଇଂଲଣ୍ଡର ବିପଜ୍ଜନକ ମଧ୍ୟକ୍ରମକୁ ଅଡ଼ୁଆରେ ପକାଇପାରିବେ।
ୱାଙ୍ଖେଡେର ଛୋଟ ବାଉଣ୍ଡ୍ରି ଏବଂ ବ୍ୟାଟିଂ ଅନୁକୂଳ ପିଚ୍ ବୋଲରଙ୍କ ପାଇଁ ଏକ “ନାଇଟମେୟାର” ବା ଦୁଃସ୍ୱପ୍ନ ହୋଇପାରେ। ମୋର୍କେଲଙ୍କ ମତରେ, ଯେଉଁ ଦଳ ଚାପ ସମୟରେ ନିଜର ଧୈର୍ଯ୍ୟ ରଖିବ ଏବଂ ପରିସ୍ଥିତିକୁ ଶୀଘ୍ର ବୁଝିପାରିବ, ସେହି ଦଳ ହିଁ ଫାଇନାଲ୍ ଟିକେଟ୍ ହାସଲ କରିବ। ଭାରତକୁ ଯଦି ଜିତିବାକୁ ହୁଏ, ତେବେ ବୋଲିଂ ସହ ଫିଲ୍ଡିଂରେ ମଧ୍ୟ ଶତ ପ୍ରତିଶତ ଶ୍ରେଷ୍ଠ ପ୍ରଦର୍ଶନ କରିବାକୁ ପଡ଼ିବ।
Comments are closed.