ନୂଆଦିଲ୍ଲୀ: ୨୦୨୬ ଟି-୨୦ ବିଶ୍ୱକପ୍ର ସୁପର-୮ ପର୍ଯ୍ୟାୟରେ ଭାରତକୁ ଏକ ଶକ୍ତ ଧକ୍କା ଲାଗିଛି। ରବିବାର ଅହମ୍ମଦାବାଦରେ ଖେଳାଯାଇଥିବା ଏକ ରୋମାଞ୍ଚକର ମ୍ୟାଚ୍ରେ ଦକ୍ଷିଣ ଆଫ୍ରିକା ୭୬ ରନ୍ରେ ଭାରତକୁ ପରାସ୍ତ କରିଛି। ତେବେ ଏହି ପରାଜୟ ପଛରେ ଷ୍ଟାର୍ ସ୍ପୋର୍ଟସର ଏକ ବିବାଦୀୟ ବିଜ୍ଞାପନ ମୁଖ୍ୟ ଚର୍ଚ୍ଚାର ବିଷୟ ପାଲଟିଛି।
କ’ଣ ଥିଲା ସେହି ବିଜ୍ଞାପନ? ମ୍ୟାଚ୍ ପୂର୍ବରୁ ପ୍ରସାରିତ ଏକ ବିଜ୍ଞାପନରେ ଦକ୍ଷିଣ ଆଫ୍ରିକାର ଖେଳାଳି ଓ ପ୍ରଶଂସକଙ୍କୁ ପରିହାସ କରାଯାଇଥିଲା। ଏଥିରେ ଜଣେ ଦକ୍ଷିଣ ଆଫ୍ରିକୀୟ ପ୍ରଶଂସକ ‘କପ୍କେକ୍’ ଖାଉଥିବା ବେଳେ ଗଳାରେ ଅଟକି ଯାଉଥିବା (Choking) ଦେଖାଯାଇଥିଲା, ଯାହା ଦକ୍ଷିଣ ଆଫ୍ରିକାର ପୁରୁଣା ‘ଚୋକର୍ସ’ ବା ଗୁରୁତ୍ୱପୂର୍ଣ୍ଣ ମ୍ୟାଚ୍ରେ ହାରିଯିବା ଇତିହାସକୁ ସୂଚାଉଥିଲା। ଏହି ବିଜ୍ଞାପନକୁ ନେଇ ସୋସିଆଲ ମିଡିଆରେ ଭାରତୀୟ ଏବଂ ବିଦେଶୀ ପ୍ରଶଂସକମାନେ ତୀବ୍ର ଅସନ୍ତୋଷ ପ୍ରକାଶ କରିଥିଲେ।
ମଇଦାନରେ ଜବାବ ଦେଲା ଦକ୍ଷିଣ ଆଫ୍ରିକା: ଏହି ଅପମାନର ଜବାବ ଦକ୍ଷିଣ ଆଫ୍ରିକା ଟିମ୍ ବ୍ୟାଟ୍ ଏବଂ ବଲ୍ରେ ଦେଇଛି। ପ୍ରଥମେ ବ୍ୟାଟିଂ କରି ଦକ୍ଷିଣ ଆଫ୍ରିକା ୧୮୭ ରନ୍ର ଏକ ବିଶାଳ ସ୍କୋର ଛିଡ଼ା କରିଥିଲା। ଡେଭିଡ୍ ମିଲର ଏବଂ ଡେୱାଲ୍ଡ ବ୍ରେଭିସ୍ଙ୍କ ଦମଦାର ବ୍ୟାଟିଂ ଭାରତୀୟ ବୋଲରଙ୍କୁ ନାକେଦମ୍ କରିଦେଇଥିଲା। ଜବାବରେ ଭାରତୀୟ ବ୍ୟାଟିଂ ଲାଇନଅପ୍ ସମ୍ପୂର୍ଣ୍ଣ ବିପର୍ଯ୍ୟୟର ସମ୍ମୁଖୀନ ହୋଇଥିଲା। ଏଡେନ୍ ମାର୍କରାମଙ୍କ ନେତୃତ୍ୱରେ ଦକ୍ଷିଣ ଆଫ୍ରିକାର ବୋଲରମାନେ ଭାରତକୁ ୨୦ ଓଭର ପୂର୍ବରୁ ହିଁ ଅଲଆଉଟ୍ କରିଦେଇଥିଲେ।
ସମାଲୋଚନାର ଶିକାର ବ୍ରଡକାଷ୍ଟର: କ୍ରୀଡ଼ାବିତ୍ମାନଙ୍କ ମତରେ, ଏହି ବିଜ୍ଞାପନ ଦକ୍ଷିଣ ଆଫ୍ରିକା ଦଳକୁ ଅଧିକ ଉତ୍ସାହିତ କରିଦେଇଥିଲା। ଭାରତୀୟ ବ୍ରଡକାଷ୍ଟରଙ୍କ ଏଭଳି “ଅହଂକାରୀ” ବିଜ୍ଞାପନ ଦଳ ପାଇଁ ବୁମେରାଂ ସାବ୍ୟସ୍ତ ହୋଇଛି। ବିରୋଧ ପରେ ଷ୍ଟାର୍ ସ୍ପୋର୍ଟସ ଏହି ବିଜ୍ଞାପନକୁ ହଟାଇ ଦେଇଛି, କିନ୍ତୁ ମଇଦାନରେ ଭାରତକୁ ମିଳିଥିବା ପରାଜୟ ପ୍ରଶଂସକଙ୍କୁ ବହୁତ ମର୍ମାହତ କରିଛି।
ଏହି ପରାଜୟ ପରେ ଭାରତ ପାଇଁ ସେମିଫାଇନାଲ୍ ରାସ୍ତା କଠିନ ହୋଇଯାଇଛି। ବାକି ରହିଥିବା ମ୍ୟାଚ୍ଗୁଡ଼ିକରେ ବଡ଼ ବ୍ୟବଧାନରେ ବିଜୟୀ ହେବା ଭାରତ ପାଇଁ ଜରୁରୀ ହୋଇପଡ଼ିଛି।
Comments are closed.