ପୂର୍ବତ୍ତନ ମହିଳା ଅଧିନାୟକଙ୍କ ସହ ଯୌନ ଉତ୍ପୀଡନ ମାମଲାରେ ବିସିବିର ବଡ କାର୍ଯ୍ୟାନୁଷ୍ଠାନ, ପୂର୍ବତ୍ତନ ଚୟନକର୍ତ୍ତାଙ୍କୁ ବ୍ୟାନ

ଢାକା: ବାଂଲାଦେଶ କ୍ରିକେଟରେ ଏକ ବଡ଼ ଧରଣର ବିବାଦର ଅନ୍ତ ଘଟିଛି। ବାଂଲାଦେଶ ମହିଳା କ୍ରିକେଟ ଦଳର ପୂର୍ବତନ ଅଧିନାୟିକା ତଥା ଷ୍ଟାର୍ ପେସର ଜାହାନାରା ଆଲମଙ୍କ ଦ୍ୱାରା ଅଣାଯାଇଥିବା ସାଙ୍ଘାତିକ ଯୌନ ନିର୍ଯାତନା ଅଭିଯୋଗର ସତ୍ୟତା ମିଳିବା ପରେ ବୋର୍ଡ କଠୋର ଆଭିମୁଖ୍ୟ ଗ୍ରହଣ କରିଛି। ବାଂଲାଦେଶ କ୍ରିକେଟ ବୋର୍ଡ (BCB) ରବିବାର ଦିନ ପୂର୍ବତନ ଜାତୀୟ ଖେଳାଳି ତଥା ପୂର୍ବତନ ଚୟନକର୍ତ୍ତା ମଞ୍ଜୁରୁଲ ଇସଲାମଙ୍କ ଉପରେ ଆଜୀବନ ବାସନ୍ଦାଦେଶ ଜାରି କରିଛି।

କ’ଣ ଥିଲା ସମ୍ପୂର୍ଣ୍ଣ ଘଟଣା?

ଏହି ବିବାଦର ସୂତ୍ରପାତ ୨୦୨୨ ମହିଳା ଦିନିକିଆ ବିଶ୍ୱକପ୍ ସମୟରୁ ହୋଇଥିଲା। ସେହି ସମୟରେ ମଞ୍ଜୁରୁଲ ଇସଲାମ ବାଂଲାଦେଶ ମହିଳା ଦଳର ଚୟନକର୍ତ୍ତା ଏବଂ ମ୍ୟାନେଜର ଭାବେ କାର୍ଯ୍ୟ କରୁଥିଲେ। ଗତ ନଭେମ୍ବର ମାସରେ ଜାହାନାରା ଆଲମ ଏକ ସାକ୍ଷାତକାରରେ ମଞ୍ଜୁରୁଲଙ୍କ ବିରୋଧରେ ଅଶୋଭନୀୟ ବ୍ୟବହାର ଏବଂ ଯୌନ ନିର୍ଯାତନାର ଅଭିଯୋଗ ଆଣିଥିଲେ। ଜାହାନାରାଙ୍କ ଅନୁଯାୟୀ, ମଞ୍ଜୁରୁଲ ତାଙ୍କୁ ଅନୁଚିତ ଶାରୀରିକ ସ୍ପର୍ଶ କରିବା ସହ ଅଶ୍ଳୀଳ ପ୍ରଶ୍ନ ପଚାରୁଥିଲେ। ଏପରିକି ଦଳର ଅନ୍ୟ କେତେକ ଖେଳାଳି ମଧ୍ୟ ତାଙ୍କର ଏଭଳି ବ୍ୟବହାରରେ ଅସନ୍ତୁଷ୍ଟ ଥିବା କଥା ଜାହାନାରା ପ୍ରକାଶ କରିଥିଲେ।

ତଦନ୍ତ କମିଟିର ରିପୋର୍ଟ

ଜାହାନାରାଙ୍କ ଅଭିଯୋଗ ପରେ BCB ପକ୍ଷରୁ ଏକ ସ୍ୱତନ୍ତ୍ର ତଦନ୍ତ କମିଟି ଗଠନ କରାଯାଇଥିଲା। ଜଷ୍ଟିସ୍ ତାରିଖ ଉଲ୍ ହାକିମଙ୍କ ନେତୃତ୍ୱରେ ଗଠିତ ଏହି କମିଟି ଜାହାନାରାଙ୍କ ଦ୍ୱାରା ଦିଆଯାଇଥିବା ଚାରୋଟି ନିର୍ଦ୍ଦିଷ୍ଟ ଅଭିଯୋଗର ଯାଞ୍ଚ କରିଥିଲା। ତଦନ୍ତ ପରେ କମିଟି ଜଣାଇଛି ଯେ, ଚାରୋଟି ଅଭିଯୋଗ ମଧ୍ୟରୁ ଦୁଇଟିରେ ମଞ୍ଜୁରୁଲଙ୍କ ବିରୋଧରେ ପ୍ରାଥମିକ ପ୍ରମାଣ ମିଳିଛି। ତାଙ୍କର ବ୍ୟବହାର ବୃତ୍ତିଗତ ସୀମା ଲଂଘନ କରିଥିବା ଏବଂ ସୁପ୍ରିମକୋର୍ଟଙ୍କ ଗାଇଡଲାଇନ୍ ଅନୁଯାୟୀ ଏହା ‘ଯୌନ ନିର୍ଯାତନା’ ଶ୍ରେଣୀଭୁକ୍ତ ବୋଲି କମିଟି ରିପୋର୍ଟ ଦେଇଛି।

BCB ର ନିଷ୍ପତ୍ତି

ରବିବାର ଦିନ ଶେର-ଏ-ବାଂଲା ଷ୍ଟାଡିୟମରେ ଅନୁଷ୍ଠିତ ବୋର୍ଡ ବୈଠକରେ ଏହି ନିଷ୍ପତ୍ତି ନିଆଯାଇଥିଲା। BCB ପକ୍ଷରୁ ଜାରି କରାଯାଇଥିବା ବିବୃତ୍ତି ଅନୁଯାୟୀ:

“ସ୍ୱାଧୀନ ତଦନ୍ତ କମିଟିର ରିପୋର୍ଟ ଆଧାରରେ ବୋର୍ଡ ପୂର୍ବତନ କ୍ରିକେଟର ମଞ୍ଜୁରୁଲ ଇସଲାମଙ୍କୁ କୌଣସି ବି ପ୍ରକାର କ୍ରିକେଟ କାର୍ଯ୍ୟକଳାପରେ ସାମିଲ ହେବା ପାଇଁ ବାରଣ କରିଛି। ସେ ପ୍ରତ୍ୟକ୍ଷ କିମ୍ବା ପରୋକ୍ଷ ଭାବେ ବୋର୍ଡ ଅଧୀନରେ କୌଣସି ପଦବୀରେ ରହିପାରିବେ ନାହିଁ।”

ମଞ୍ଜୁରୁଲଙ୍କ ଚୁକ୍ତି ଅବଧି ଜୁନ୍ ୨୦୨୫ରେ ଶେଷ ହୋଇଥିଲେ ମଧ୍ୟ ଏହି ବାସନ୍ଦାଦେଶ ତାଙ୍କୁ ଭବିଷ୍ୟତରେ କୌଣସି ବି ଭୂମିକା ଗ୍ରହଣ କରିବାରୁ ବାରଣ କରିବ। ବର୍ତ୍ତମାନ ସେ ଚୀନ୍ ମହିଳା କ୍ରିକେଟ ଦଳର ପ୍ରଶିକ୍ଷକ ଭାବେ କାର୍ଯ୍ୟ କରୁଥିଲେ, କିନ୍ତୁ ଏହି କାର୍ଯ୍ୟାନୁଷ୍ଠାନ ପରେ ତାଙ୍କ କ୍ୟାରିୟର ପ୍ରତି ବିପଦ ସୃଷ୍ଟି ହୋଇଛି।

ମହିଳା କ୍ରିକେଟରେ ସୁରକ୍ଷା ଉପରେ ଗୁରୁତ୍ୱ

ଏହି ଘଟଣା ସାମ୍ନାକୁ ଆସିବା ପରେ ବାଂଲାଦେଶ କ୍ରିକେଟ ବୋର୍ଡ ମହିଳା ଖେଳାଳିଙ୍କ ସୁରକ୍ଷାକୁ ଅଧିକ କଡ଼ାକଡ଼ି କରିବା ପାଇଁ ପଦକ୍ଷେପ ନେଉଛି। ବୋର୍ଡ ପକ୍ଷରୁ ଏକ ‘ଅଭିଯୋଗ କମିଟି’ ମଧ୍ୟ ଗଠନ କରାଯାଇଛି, ଯାହାର ନେତୃତ୍ୱ ବୋର୍ଡ ନିର୍ଦ୍ଦେଶକ ରୁବାବା ଦୌଲା ନେଉଛନ୍ତି। ଏହାଦ୍ୱାରା ଭବିଷ୍ୟତରେ କୌଣସି ଖେଳାଳି ଏଭଳି ପରିସ୍ଥିତିର ସମ୍ମୁଖୀନ ହେଲେ ସେମାନେ ସିଧାସଳଖ ଅଭିଯୋଗ କରିପାରିବେ।

ଏହା ବ୍ୟତୀତ BCB ଆସନ୍ତା ଏପ୍ରିଲ ୪ରୁ ୧୪ ପର୍ଯ୍ୟନ୍ତ ପ୍ରଥମ ଥର ପାଇଁ ମହିଳା ବାଂଲାଦେଶ ପ୍ରିମିୟର ଲିଗ୍ (WBPL) ଆୟୋଜନ କରିବାକୁ ଘୋଷଣା କରିଛି। ଏହା ମହିଳା କ୍ରିକେଟରଙ୍କ ମନୋବଳ ବଢ଼ାଇବା ପାଇଁ ଏକ ସକାରାତ୍ମକ ପଦକ୍ଷେପ ବୋଲି କୁହାଯାଉଛି।

ଜାହାନାରା ଆଲମ ବର୍ତ୍ତମାନ ଅଷ୍ଟ୍ରେଲିଆରେ ରହୁଛନ୍ତି ଏବଂ ସେଠାରେ କ୍ଲବ କ୍ରିକେଟ ଖେଳିବା ସହ କୋଚିଂ କୋର୍ସ କରୁଛନ୍ତି। ତାଙ୍କର ଏହି ସାହସିକ ପଦକ୍ଷେପ ପାଇଁ ସୋସିଆଲ ମିଡିଆରେ ଅନେକ ଲୋକ ତାଙ୍କୁ ପ୍ରଶଂସା କରୁଛନ୍ତି।