ପାର୍ବଣର ଉତ୍ସାହ କମିବା ପରେ ଅନେକ ଲୋକ ନିଜ ଶରୀରରେ ଏକ ନୀରବ ପରିବର୍ତନ ଲକ୍ଷ୍ୟ କରିଥାନ୍ତି, ତାଙ୍କର କିଛି କିଲୋଗ୍ରାମ ଓଜନ ବଢିବା ସହ ଶକ୍ତି ସାମାନ୍ୟ ହ୍ରାସ ପାଇଥାଏ । ଏହି ପରିବର୍ତନ କ୍ଷତିହୀନ ମନେ ହୋଇଥାଏ । କିନ୍ତୁ ଯେତେବେଳେ ଜଣେ ବ୍ୟକ୍ତି ଗର୍ଭଧାରଣ ପାଇଁ ପ୍ରସ୍ତୁତ ହେଉଥାନ୍ତି କିମ୍ବା ଆଇଭିଏଫ ବିଷୟରେ ଚିନ୍ତା କରିଥାନ୍ତି, ସେତେବେଳେ ଓଜନରେ ସାମାନ୍ୟ ବୃଦ୍ଧି ମଧ୍ୟ ହରମୋନ ଓ ମେଟାବଲିଜିମ୍ ଆଧାରିତ ଶରୀରର କାର୍ଯ୍ୟଗୁଡିକୁ ପ୍ରଭାବିତ କରିବା ଆରମ୍ଭ କରିପାରେ ବୋଲି ବିର୍ଲା ଫର୍ଟିଲିଟି ଆଣ୍ଡ ଆଇଭିଏଫ, ଭୁବନେଶ୍ୱରର ଫର୍ଟିଲିଟି ସ୍ପେଶାଲିଷ୍ଟ ଡଃ ରୋହଣି ନାୟକ କହିଛନ୍ତି ।
ଯେତେବେଳେ ସାମାନ୍ୟ ବୃଦ୍ଧି ଗୁରୁତ୍ୱପୂର୍ଣ୍ଣ ହୋଇଥାଏ
ଏକ କିମ୍ବା ଦୁଇ କିଲୋର ସ୍ୱଳ୍ପାବଧି ଓଜନ ବୃଦ୍ଧି ପ୍ରଜନନ କ୍ଷମତାକୁ ଖୁବ୍ କମ୍ ପ୍ରଭାବିତ କରିଥାଏ । ଏହି ଚିନ୍ତା ସେତେବେଳେ ଆରମ୍ଭ ହୋଇଥାଏ ଯେତେବେଳେ ଶରୀରର ଓଜନ ବଡି ମାସ ଇଣ୍ଡେକ୍ସ (ବିଏମଆଇ)କୁ ନିରନ୍ତର ଭାବେ ସୁସ୍ଥ ପରିସରରୁ ଆଗକୁ ବଢାଇଥାଏ । ଗବେଷଣା ଦର୍ଶାଇଛି ଯେ, ୩୦ରୁ ଅଧିକ ବିଏମଆଇ ଥିବା ଜଣେ ମହିଳାଙ୍କ ଆଇଭିଏଫ ସଫଳତା ହାର, ସୁସ୍ଥ ରେଞ୍ଜରେ ଥିବା ମହିଳାଙ୍କ ତୁଳନାରେ ୨୦ରୁ ୩୦% ହ୍ରାସ ପାଇପାରେ । ଏପରିକି ଶରୀରରେ ୫ରୁ ୧୦% ଓଜନ ବୃଦ୍ଧି, ବିଶେଷ କରି ଅନିୟମିତ ଋତୁଚକ୍ର କିମ୍ବା ପିସିଓଏସରେ ପ୍ରଭାବିତ ମହିଳାଙ୍କଠାରେ ଓଭୁଲେଶନ ଶୈଳୀକୁ ବାଧାପ୍ରାପ୍ତ କରିପାରେ ।
ଫ୍ୟାଟ୍ ଟିସ୍ୟୁ ହରମୋନ ଦୃଷ୍ଟିରୁ ସକ୍ରିୟ ଅଟେ । ଏହା ବୃଦ୍ଧି ହେବା ସହିତ ଏଷ୍ଟ୍ରୋଜେନ ସ୍ତର ମଧ୍ୟ ବୃଦ୍ଧି ହୋଇଥାଏ ଯାହା ସାଧାରଣ ଓଭୁଲେଶନ ସଙ୍କେତକୁ ଦ୍ୱନ୍ଦରେ ପକାଇଥାଏ । ଚକ୍ରଗୁଡିକ ଲମ୍ବା ହୋଇପାରେ, ଡିମ୍ବାଣୁର ମାନ ସାମାନ୍ୟ ହ୍ରାସ ପାଇପାରେ ଏବଂ ପ୍ରଜନନ ଔଷଧ ପ୍ରତି ପ୍ରତିକ୍ରିୟା କମ୍ ପୂର୍ବାନୁମାନଯୋଗ୍ୟ ହୋଇପାରେ ।
ପୁରୁଷମାନେ ମଧ୍ୟ ଏହି ପ୍ରଭାବରୁ ମୁକ୍ତ ନୁହନ୍ତି
ଓଜନ ବୃଦ୍ଧି ସ୍ପର୍ମ ବା ଶୁକ୍ରାଣୁର ମାନକୁ ମଧ୍ୟ ପ୍ରଭାବିତ କରିଥାଏ । ବୃହତ ଜନସଂଖ୍ୟା ଅଧ୍ୟୟନଗୁଡିକ ଅଧିକ ଓଜନ ଓ ମେଦବହୁଳତାକୁ ୧୫ରୁ ୨୦% କମ୍ ସ୍ପର୍ମ କନ୍ସେନ୍ଟ୍ରେଶନ ଓ ମୋଟିଲିଟି ସହ ଯୋଡିଛନ୍ତି । ପେଟରେ ଅଧିକ ଚର୍ବି ସ୍କ୍ରୋଟାଲ ତାପମାତ୍ରକୁ ବୃଦ୍ଧି କରିଥାଏ ଏବଂ ଟେଷ୍ଟୋଷ୍ଟେରୋନ ସନ୍ତୁଳନକୁ ପରିବର୍ତନ କରିଥାଏ, ଯାହା ସମୟକ୍ରମେ ଶୁକ୍ରାଣୁର ମାନକୁ ନିମ୍ନ କରିଥାଏ । ଆଇଭିଏଫ ଆରମ୍ଭ କରୁଥିବା ଦମ୍ପତିଙ୍କ ପାଇଁ ଏହା ଭୃଣ ବିକାଶ ଓ ଫର୍ଟିଲାଇଜେଶନ ରେଟ୍କୁ ବହୁମାତ୍ରାରେ ପ୍ରଭାବିତ କରିପାରେ ।
ଆଇଭିଏଫ ପୂର୍ବରୁ ସମୟ କାହିଁକି ଗୁରୁତ୍ୱପୂର୍ଣ୍ଣ
ଗର୍ଭଧାରଣ କରିବା କିମ୍ବା ଚିକିତ୍ସା ସହ ଆଗକୁ ବଢିବା ପାଇଁ ଓଜନ ସଠିକ ରହିବା ଜରୁରୀ ନୁହେଁ । ଯାହା ଗୁରୁତ୍ୱପୂର୍ଣ୍ଣ ତାହା ହେଉଛି ମେଟାବୋଲିକ ସ୍ଥିରତା । ଚିକିତ୍ସା କେନ୍ଦ୍ରଗୁଡିକ ପ୍ରାୟତଃ ବିଏମାଇ ଏକ ନିୟନ୍ତ୍ରିତ ରେଞ୍ଜ ମଧ୍ୟରେ ଥିବା ବେଳେ ଉଭୟ ଗର୍ଭାଶୟ ପ୍ରତିକ୍ରିୟା, ସୁରକ୍ଷିତ ଷ୍ଟିମୁଲେଶନ ଚକ୍ର ଓ ସହଜ ଭୃଣ ସ୍ଥାନାନ୍ତର ପରିଲକ୍ଷିତ କରିଥାନ୍ତି । ଏପରିକି ସାମାନ୍ୟ ଓଜନ ହ୍ରାସ- ଶରୀରର ଓଜନର ୫%- ଅନେକ ରୋଗୀଙ୍କଠାରେ ଓଭୁଲେଶନ ଏବଂ ଇନ୍ସୁଲିନ ସମ୍ବେଦନଶୀଳତାକୁ ଉନ୍ନତ କରୁଥିବା ଦେଖାଯାଇଛି ।
ଭବିଷ୍ୟତ ଦିଗରେ ଏକ ବାସ୍ତବ ମାର୍ଗ
ପାର୍ବଣ ସମୟର ଖାଦ୍ୟଗୁଡିକ ପ୍ରଜନନ କ୍ଷମତାକୁ ଫେରାଇ ଆଣିନଥାନ୍ତି । ଯାହା ସାହାଯ୍ୟ କରିଥାଏ ତାହା ହେଉଛି ସ୍ଥିର ଦିନଚର୍ଯ୍ୟାକୁ ଫେରିଆସିବା, ଯେପରିକି ସନ୍ତୁଳିତ ଆହାର ସେବନ କରିବା, ନିୟମିତ ଚାଲିବା, ନିଦ୍ରା ଶୃଙ୍ଖଳା ଏବଂ ଅତ୍ୟଧିକ ଜଟିଳ ଡାଏଟିଂକୁ ଏଡାଇବା । ଶରୀର ଅତ୍ୟଧିକତା ପରିବର୍ତେ ସ୍ଥିରତାକୁ ଅଧିକ ଭଲ ପ୍ରତିକ୍ରିୟା ଦେଇଥାଏ । ଆଗାମୀ ମାସଗୁଡିକରେ ଆଇଭିଏଫର ଯୋଜନା ରଖିଥିବା ଯେକୌଣସି ବ୍ୟକ୍ତିଙ୍କ ପାଇଁ ପ୍ରାରମ୍ଭିକ ପର୍ଯ୍ୟାୟରେ, ଧୀରେ ଧୀରେ ଓଜନ ହ୍ରାସ କରିବା, ଶାରୀରିକ ଓ ଭାବନାତ୍ମକ ଭାବେ ଏକ ଶାନ୍ତ ଓ ଅଧିକ ଅନୁମାନଯୋଗ୍ୟ ଚିକିତ୍ସା ଯାତ୍ରା ସୃଷ୍ଟି କରିଥାଏ ।
Comments are closed.