ଚାମ୍ପିୟନ୍ସ ଟ୍ରଫି ପ୍ରଦାନ ଉତ୍ସବରେ ପିସିବି ଅଧିକାରୀଙ୍କ ଅନୁପସ୍ଥିତିକୁ ନେଇ ବିବାଦ, କ୍ଷୋଭ ପ୍ରକଟ କଲେ ସୋଏବ
ରବିବାର ଦୁବାଇରେ ଚାମ୍ପିୟନ୍ସ ଟ୍ରଫି ଫାଇନାଲର ସମାପନୀ ସମାରୋହରେ ପାକିସ୍ତାନ କ୍ରିକେଟ୍ ବୋର୍ଡର ଅଧିକାରୀମାନଙ୍କୁ ଆଇସିସି ପକ୍ଷରୁ ମଞ୍ଚରେ ନିମନ୍ତ୍ରଣ କରାଯାଇ ନ ଥିବାରୁ ବିବାଦ ସୃଷ୍ଟି ହୋଇଥିଲା। ଏକ ସୂତ୍ରରୁ ପ୍ରକାଶ ଯେ ପିସିବିର ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ ସୁମେର ଅହମ୍ମଦ ପଡ଼ିଆରେ ଉପସ୍ଥିତ ଥିଲେ କିନ୍ତୁ ତାଙ୍କୁ ସମାରୋହକୁ ଡକାଯାଇ ନଥିଲା। ସେ ଟୁର୍ଣ୍ଣାମେଣ୍ଟ ନିର୍ଦ୍ଦେଶକ ମଧ୍ୟ ଅଛନ୍ତି।
ମିଳିଥିବା ସୂଚନା ଅନୁଯାୟୀ, ପିସିବି ଅଧ୍ୟକ୍ଷ ମୋହସିନ ନକଭି ଦୁବାଇ ଯାଇ ପାରିନଥିଲେ କାରଣ ତାଙ୍କର ଗୃହମନ୍ତ୍ରୀ ଭାବରେ କିଛି କାମ ଥିଲା, କିନ୍ତୁ ପିସିବି ସିଇଓଙ୍କୁ ଫାଇନାଲରେ ପାକିସ୍ତାନର ପ୍ରତିନିଧିତ୍ୱ କରିବା ଏବଂ ପୁରସ୍କାର ବିତରଣ ପାଇଁ ପଠାଯାଇଥିଲା। କୌଣସି କାରଣରୁ କିମ୍ବା ଭୁଲ ବୁଝାମଣା କାରଣରୁ ତାଙ୍କୁ ମଞ୍ଚକୁ ଡକାଯାଇ ନ ଥିଲା ଯେଉଁଠାରୁ ଆଇସିସି ସଭାପତି ଜୟ ଶାହା, ବିସିସିଆଇ ସଭାପତି ରୋଜର ବିନ୍ନି ଏବଂ ସମ୍ପାଦକ ଦେବଜିତ୍ ସାଇକିଆ ଖେଳାଳିମାନଙ୍କୁ ପଦକ, ଟ୍ରଫି ଏବଂ ଜ୍ୟାକେଟ୍ ପ୍ରଦାନ କରିଥିଲେ। ମଞ୍ଚରେ ଆୟୋଜକ ପାକିସ୍ତାନର କୌଣସି ପ୍ରତିନିଧି ନଥିଲେ। ପିସିବି ଆଇସିସି ନିକଟରେ ଏହି ପ୍ରସଙ୍ଗ ଉଠାଇପାରେ। ସୂତ୍ରରୁ ପ୍ରକାଶ ଯେ ବୋଧହୁଏ ସିଇଓ ଚୂଡ଼ାନ୍ତ ସମାରୋହ ଆୟୋଜନ ପାଇଁ ଦାୟିତ୍ୱରେ ଥିବା ଆଇସିସି ଅଧିକାରୀଙ୍କ ସହ ଠିକ୍ ଭାବରେ ଯୋଗାଯୋଗ କରିପାରିନଥିଲେ ଏବଂ ସେଥିପାଇଁ ତାଙ୍କୁ ବାଦ୍ ଦିଆଯାଇଥିଲା। ତେଣୁ ଚାମ୍ପିୟନ୍ସ ଟ୍ରଫିର ଆୟୋଜକ ଭାବେ ପୋଡିୟମରେ ପାକିସ୍ତାନର କୌଣସି ପ୍ରତିନିଧି ନଥିଲେ।
ସୋଏବ ଅଖତର ନିଜର ଅସନ୍ତୋଷ ବ୍ୟକ୍ତ କରିଛନ୍ତି
ପୂର୍ବତନ ଦ୍ରୁତ ବୋଲର ସୋଏବ ଅଖତର ମଧ୍ୟ ଏକ୍ସରେ ଏକ ଭିଡିଓ ପୋଷ୍ଟ କରି କହିଛନ୍ତି, ‘ଭାରତ ଚାମ୍ପିୟନ୍ସ ଟ୍ରଫି ଜିତିଥିଲା, କିନ୍ତୁ ଫାଇନାଲ୍ ପରେ ପିସିବିର କୌଣସି ପ୍ରତିନିଧି ନଥିଲେ। ପାକିସ୍ତାନ ଆୟୋଜକ ଥିଲା। ମୁଁ ବୁଝିପାରୁନାହିଁ ପିସିବିର କେହି ସେଠାରେ କାହିଁକି ନଥିଲେ। କାହିଁକି କେହି ଟ୍ରଫି ଉପସ୍ଥାପନ କରିବାକୁ ଆସିନଥିଲେ, କାହିଁକି କେହି ପ୍ରତିନିଧିତ୍ୱ କରିବାକୁ ଆସିନଥିଲେ? ଏହା ପ୍ରକୃତରେ ମୋର ବୁଝାମଣା ବାହାରେ । ଏହା କେମିତି ହୋଇପାରେ ?? ଫାଇନାଲ ଏବଂ ପୁରସ୍କାର ବିତରଣରେ ଆୟୋଜକ ଦେଶର ପ୍ରତିନିଧିତ୍ୱ କେଉଁଠାରେ ଥିଲା?? ଏ ବିଷୟରେ ଗମ୍ଭୀରତାର ସହ ଚିନ୍ତା କରିବା ଉଚିତ୍ । ଏହା ଏକ ବିଶ୍ୱ ସ୍ତରୀୟ ମଞ୍ଚ ଥିଲା । ପିସିବି ଏଠାରେ ରହିବା କଥା, କିନ୍ତୁ ଦୁଃଖର କଥା, ମୁଁ କାହାକୁ ଦେଖିନଥିଲି। ଏହାକୁ ନେଇ ମୁଁ ବହୁତ ବ୍ୟଥିତ।
ହାଇବ୍ରିଡ୍ ମଡେଲ ବିସିସିଆଇ ସଭାପତି ବିନ୍ନି ଭାରତୀୟ ଖେଳାଳିଙ୍କୁ ଧଳା ଜ୍ୟାକେଟ୍ ଏବଂ ମ୍ୟାଚ୍ ଅଧିକାରୀଙ୍କୁ ପଦକ ପ୍ରଦାନ କରିଥିବା ବେଳେ ଆଇସିସି ସଭାପତି ଶାହ ରୋହିତ ଶର୍ମାଙ୍କୁ ଟ୍ରଫି ପ୍ରଦାନ କରିବା ସହ ଭାରତୀୟ ଖେଳାଳିଙ୍କୁ ପଦକ ପ୍ରଦାନ କରିଥିଲେ। ସୁରକ୍ଷା ଦୃଷ୍ଟିରୁ ଭାରତ ପାକିସ୍ତାନରେ ମ୍ୟାଚ୍ ଖେଳିବାକୁ ମନା କରିଦେଇଥିଲା। ପିସିବି ହାଇବ୍ରିଡ୍ ମଡେଲରେ ରାଜି ହୋଇ ଭାରତକୁ ଦୁବାଇରେ ମ୍ୟାଚ୍ ଖେଳିବାକୁ ଅନୁମତି ଦେଇଥିଲା।
Comments are closed.