ଅନନ୍ତ ଅମ୍ବାନୀ-ରାଧିକା ମର୍ଚ୍ଚାଣ୍ଟଙ୍କ ନିର୍ବନ୍ଧ ସମ୍ପନ୍ନ

ଉଦ୍ୟୋଗପତି ମୁକେଶ ଓ ନୀତା ଅମ୍ବାନୀଙ୍କ ସାନ ପୁଅ ଅନନ୍ତ ଅମ୍ବାନୀଙ୍କ ‘ରୋକା’ ସେରିମନି ତଥା ନିର୍ବନ୍ଧ ଶୈଳ ଓ ବୀରେନ୍ ମର୍ଚ୍ଚାଣ୍ଟଙ୍କ କନ୍ୟା ରାଧିକା ମର୍ଚ୍ଚାଣ୍ଟଙ୍କ ସହ ଶେଷ ହୋଇଛି । ରାଜସ୍ଥାନର ନାଥଦ୍ୱାରାସ୍ଥିତ ଶ୍ରୀନାଥଜୀଙ୍କ ମନ୍ଦିରରେ ଉଭୟ ପରିବାରର ସମସ୍ତ ସଦସ୍ୟ ଏବଂ ବନ୍ଧୁବାନ୍ଧବଙ୍କ ଉପସ୍ଥିତିରେ ନିର୍ବନ୍ଧ ସମ୍ପନ୍ନ ହୋଇଥିବାବେଳେ ମନ୍ଦିରର ପୁରୋହିତମାନେ ଉଭୟଙ୍କୁ ଆଶୀର୍ବାଦ ପ୍ରଦାନ କରିଛନ୍ତି । ଅନନ୍ତ ଓ ରାଧିକା ଭବିଷ୍ୟତର ଦାମ୍ପତ୍ୟ ଜୀବନକୁ ମଙ୍ଗଳମୟ କରିବା ପାଇଁ ପ୍ରଭୁ ଶ୍ରୀନାଥଜୀଙ୍କ ଆଶୀର୍ବାଦ କାମନା କରି ସାରା ଦିନଟି ମନ୍ଦିରରେ ଅତିବାହିତ କରିଥିଲେ । ଏଥିସହିତ ଉଭୟ ମନ୍ଦିରର ପାରମ୍ପରିକ ରାଜଭୋଗ-ଶୃଙ୍ଗାର ଉତ୍ସବରେ ମଧ୍ୟ ଅଂଶଗ୍ରହଣ କରିଥିଲେ ।
ଗତ କିଛି ବର୍ଷ ଧରି ପରସ୍ପରକୁ ଜାଣିଥିବା ଅନନ୍ତ ଓ ରାଧିକା ଆଗାମୀ ମାସ ବିବାହ ପରେ ଆନୁଷ୍ଠାନିକ ଭାବେ ଦାମ୍ପତ୍ୟ ଜୀବନର ଯାତ୍ରା ଆରମ୍ଭ କରିବେ । ଦାମ୍ପତ୍ୟ ଜୀବନର ଯାତ୍ରାକୁ ସୁଖରେ ଅତିବାହିତ କରିବା ନିମେନ୍ତ ଉଭୟ ପରିବାରର ପ୍ରତ୍ୟେକ ସଦସ୍ୟଙ୍କ ଆଶୀର୍ବାଦ ଓ ଶୁଭେଚ୍ଛା କାମନା କରିଛନ୍ତି ।
ଅନନ୍ତ ଅମ୍ବାନୀ ୟୁଏସଏ(ଯୁକ୍ତରାଷ୍ଟ୍ର ଆମେରିକା)ରେ ଅବସ୍ଥିତ ବ୍ରାଉନ୍ ବିଶ୍ୱବିଦ୍ୟାଳୟରୁ ଶିକ୍ଷା ସମାପ୍ତ କରିବା ପରଠାରୁ ରିଲାଏନ୍ସ ଉଦ୍ୟୋଗର ଜିଓ ପ୍ଲାଟଫର୍ମ ତଥା ରିଲାଏନ୍ସ ରିଟେଲ ଭେଞ୍ଚର୍ସର ବୋର୍ଡ ଗୁଡ଼ିକରେ ସଦସ୍ୟ ଭାବେ କାର୍ଯ୍ୟ କରିବା ସହିତ ବିଭିନ୍ନ ପଦ ପଦବୀରେ ସୁଚାରୂ ରୂପେ ନିଜର ଦାୟିତ୍ୱ ନିର୍ବାହ କରିଛନ୍ତି । ବର୍ତ୍ତମାନ ସେ ଆରଆଇଏଲର ଶକ୍ତି ବ୍ୟବସାୟର ନେତୃତ୍ୱ ନେଉଛନ୍ତି । ଅନ୍ୟପଟେ ନ୍ୟୁୟର୍କ ବିଶ୍ୱବିଦ୍ୟାଳୟରୁ ସ୍ନାତକ ହାସଲ କରିଥିବା ରାଧିକା ଏବେ ଏନକୋର ହେଲଥେକୟାର ବୋର୍ଡ(ପରିଚାଳନା ମଣ୍ଡଳୀ)ର ନିର୍ଦ୍ଦେଶିକା ଭାବେ କାର୍ଯ୍ୟରତ ଅଛନ୍ତି ।