ପୁଣି ଥରେ କରୋନା କବଳରେ ବଲିଉଡ, ଶାହାରୁଖ, କ୍ୟାଟ୍ରିନା ଏବଂ କରନ ଜୋହରଙ୍କ ସମେତ ଅନେକ ଷ୍ଟାର ଆକ୍ରାନ୍ତ

ବଲିଉଡ୍‌ ଶିଳ୍ପରେ କରୋନା କହର ଦେଖାଦେଇଛି । ସୁପରଷ୍ଟାର୍‌ ଶାହରୁଖ ଖାନ୍‌ ଓ ଅଭିନେତ୍ରୀ କ୍ୟାଟ୍ରିନା କୈଫ କୋଭିଡ ପଜିଟିଭ୍‌ ଚିହ୍ନଟ ହୋଇଛନ୍ତି । ଶନିବାର ଆଦିତ୍ୟ ରୟ କପୁର ଓ କାର୍ତ୍ତିକ ଆର‌୍ୟନ୍‌ ସଂକ୍ରମିତ ହୋଇଥିଲେ । ଏହା ପୂର୍ବରୁ ଅକ୍ଷୟ କୁମାର ବି ଆକ୍ରାନ୍ତ ହୋଇଥିଲେ । ତେବେ କ୍ୟାଟ୍ରିନା ଦ୍ୱିତୀୟ ଥର ପାଇଁ ସଂକ୍ରମିତ ହୋଇଥିବା ଜଣାପଡ଼ିଛି ।

ଅଭିନେତ୍ରୀ କ୍ୟାଟ୍ରିନା ଗତ ସପ୍ତାହରେ ଶ୍ରୀରାମ ରାଘବନଙ୍କ ‘ମେରି କ୍ରିସ୍‌ମାସ୍‌’ ଚଳଚ୍ଚିତ୍ର ନିମନ୍ତେ ଅଭିନେତା ବିଜୟ ସେତୁପତିଙ୍କ ସହ ସୁଟିଙ୍ଗ୍‌ ଆରମ୍ଭ କରିବାର ଥିଲା । କିନ୍ତୁ ନମୁନା ରିପୋର୍ଟ ପଜିଟିଭ୍‌ ଆସିବାରୁ ତାହା ବାତିଲ ହୋଇଯାଇଛି । ଏମିତି କି ଆବୁଧାବିରେ ଅନୁଷ୍ଠିତ ଏକ କାର୍ଯ୍ୟକ୍ରମରେ ସ୍ୱାମୀ ଭିକି କୌଶଲଙ୍କ ସହ ଯାଇପାରି ନ ଥିଲେ କ୍ୟାଟ୍ରିନା । ତେବେ ସେ ତାଙ୍କ ସଙ୍ଗରୋଧ ଅବଧି ଶେଷ କରିଛନ୍ତି ।

ଚଳଚ୍ଚିତ୍ର ନିର୍ମାତା କରନ ଜୋହରଙ୍କ ୫୦ତମ ଜନ୍ମଦିନ ଉତ୍ସବ କରୋନା ସୁପରସ୍ପ୍ରେଡର ସାଜିଥିବା ଗଣମାଧ୍ୟମ ରିପୋର୍ଟରୁ ଜଣାପଡ଼ିଛି । ଏହି ଉତ୍ସବରେ ୫୦ରୁ ଅଧିକ ସେଲିବ୍ରିଟି ଯୋଗଦେଇଥିଲେ । କିନ୍ତୁ କ୍ୟାଟ୍ରିନା ଜୁନ୍‌ ୧ ଓ କାର୍ତ୍ତିକ ଆର‌୍ୟନ ୪ରେ ସଂକ୍ରମିତ ହୋଇଥିଲେ, ଯେବେ କି କରନଙ୍କ ଜନ୍ମଦିନ ମେ ୨୫ରେ ପାଳିତ ହୋଇଥିଲା।