ବିବାହ ଉତ୍ସବରେ ସିଢିରୁ ଖସିପଡ଼ିଲେ ମୁଖ୍ୟମନ୍ତ୍ରୀ ଶିବରାଜ ସିଂହ ଚୌହାନ

ମଧ୍ୟପ୍ରଦେଶ ମୁଖ୍ୟମନ୍ତ୍ରୀ ଶିବରାଜ ସିଂହ ଚୌହାନ ଏକ ବିବାହ ଉତ୍ସବରେ ଝୁଣ୍ଟିପଡ଼ି ପାହାଚରେ ଖସି ପଡ଼ିଛନ୍ତି । ଏହି ସମୟରେ ନିକଟରେ ଥିବା ସୁରକ୍ଷାକର୍ମୀମାନେ ତାଙ୍କୁ ଉଠାଇବା ସହ ସମସ୍ତେ ପୁଣି ଆଗକୁ ବଢିଥିଲେ । ଉତ୍ତରାଖଣ୍ଡ ଉଧମ ସିଂହ ନଗରର କାଶୀପୁର ସ୍ଥିତ ଏକ ବଡ଼ ହୋଟେଲରେ ଏଭଳି ଏକ ଘଟଣା ଘଟିଛି । ଏହି ଭିଡ଼ିଓ ଏବେ ସୋସିଆଲ ମିଡ଼ିଆରେ ଖୁବ୍ ଭାଇରାଲ ହେବାରେ ଲାଗିଛି ।

ଜିଲ୍ଲାର କାଶୀପୁରୁରେ ସୋମବାର ଭାରତୀୟ ଜନତା ପାର୍ଟିର ରାଷ୍ଟ୍ରୀୟ ସହ ମହାମନ୍ତ୍ରୀ ସଂଗଠନ ଶିବ ପ୍ରକାଶଙ୍କ ଭଣଜାର ବିବାହ ଭୋଜିର କାର୍ଯ୍ୟକ୍ରମ ଥିଲା । ଏହି ଅବସରରେ ଦେଶର କେତେକ ରାଜ୍ୟରୁ ବିଜେପିର ମୁଖ୍ୟମନ୍ତ୍ରୀ ଏବଂ କେତେକ ବଡ଼ ନେତା ଆସିଥିଲେ । ଏହି ଉତ୍ସବରେ ମଧ୍ୟପ୍ରଦେଶ ସିଏମ୍ ଶିବରାଜ ସିଂହ ଚୌହାନ ବି ସାମିଲ ଥିଲେ ।

ଏହି ସମୟରେ ଦେଖାଯାଇଥିଲା କି ସିଏମ୍ ଶିବରାଜ ଯେଉଁଭଳି ଭାବେ ଭୋଜିରେ ଯୋଗଦେଇ ଆସିଲେ ସେହି ସମୟରେ ହଠାତ୍ ସିଢି ଉପରେ ଗୋଡ଼ ଖସିଯିବାରୁ ପଡ଼ିଯାଇଥିଲେ । ଏହାଦ୍ବାରା ସାଥିରେ ଥିବା ବିଜେପି କାର୍ଯ୍ୟକର୍ତ୍ତା ଏବଂ ସୁରକ୍ଷାକର୍ମୀଙ୍କ ମଧ୍ୟରେ ଚାଞ୍ଚଲ୍ୟ ଖେଳିଯାଇଥିଲା । ମାତ୍ର ସୁରକ୍ଷା କର୍ମୀମାନେ ତାଙ୍କୁ ସଙ୍ଗେ ସଙ୍ଗେ ଉଠାଇ ପୁଣି ଆଗକୁ ବଢିଥିଲେ ।