‘ରାଧେ ଶ୍ୟାମ’ରେ ପ୍ରଭାସଙ୍କ ସହ ନଜର ଆସିବେ ପୂଜା

ସିନେ ଦୁନିଆରେ ପ୍ରବେଶକୁ ଭାଗ୍ୟ ବୋଲି କହନ୍ତି ଅଭିନେତ୍ରୀ ପୂଜା ହେଗ୍‌ଡେ । ଭାରତର ଭିନ୍ନ ଭିନ୍ନ ଫିଲ୍ମ ଇଣ୍ଡଷ୍ଟ୍ରିରେ କାମ କରିବା ତାଙ୍କ ନିଷ୍ପତ୍ତି ଥିଲା । ଖୁବ୍‌ଶୀଘ୍ର ବହୁଭାଷୀ ଫିଲ୍ମ ‘ରାଧେ ଶ୍ୟାମ’ରେ ବାହୁବଲୀ ପ୍ରଭାସଙ୍କ ସହ ନଜର ଆସିବେ ପୂଜା । ବିଭିନ୍ନ ସିନେ ଇଣ୍ଡଷ୍ଟ୍ରି ସହ ଜଡ଼ିତ ରହିବା ତାଙ୍କ ପାଇଁ ଅନେକ କ୍ଷେତ୍ରରେ ଲାଭପ୍ରଦ ହୋଇଛି । ପୂଜା କହନ୍ତି ‘ସୁଯୋଗ ଓ କଠିନ ପରିଶ୍ରମର ଯେତେବେଳେ ମିଳନ ହୁଏ, ଜଣେ କଳାକାର ନିଜକୁ ଭାଗ୍ୟଶାଳୀ ମନେକରେ । ମୁଁ ସର୍ବଦା ଭାରତୀୟ ଅଭିନେତ୍ରୀ ହେବାକୁ ଚାହୁଁଥିଲି । କିନ୍ତୁ କୌଣସି ଗୋଟିଏ ଭାଷା ମଧ୍ୟରେ ସୀମିତ ହୋଇ ରହିବାକୁ ଚାହୁଁନଥିଲି । କେବଳ ଗୋଟିଏ ସିଦ୍ଧାନ୍ତ ଉପରେ ମୁଁ କାମ କରେ । ବିଷୟବସ୍ତୁ ମୋତେ ଉତ୍ସାହିତ କଲେ ହିଁ, ଫିଲ୍ମ ସାଇନ୍‌ କରେ । ଏଥିରେ ଭାଷା ପ୍ରତିବନ୍ଧକ ହୁଏ ନାହିଁ । ଭାଷାଗତ ପ୍ରତିବନ୍ଧକ ଦ୍ୱାରା ବାନ୍ଧିହୋଇ ରହିବାକୁ ମୁଁ କେବେ ଚାହିଁନାହିଁ । ଭିନ୍ନ ଭିନ୍ନ ଭାଷାରେ କାମ କରିବା ଦ୍ୱାରା ବିଭିନ୍ନ ଭାଷାର ଲୋକଙ୍କ ସଂସ୍ପର୍ଶରେ ରହିବାର ସୁଯୋଗ ମିଳେ । ପ୍ରତ୍ୟେକ ଫିଲ୍ମରେ ନିଜର ଡାଏଲଗ୍‌ ମୁଁ ନିଜେ ଡବ୍‌ କରେ । ଆଗକୁ ଯଦି ଏକ ସୁନ୍ଦର ମରାଠୀ ଫିଲ୍ମ ମିଳେ, ତେବେ ମୁଁ ବହୁତ ଉତ୍ସାହର ସହ କାମ କରିବି । ତା’ର ବଜେଟ୍‌ ମୋ ପାଇଁ ଆଦୌ ସମସ୍ୟା ନୁହେଁ ।

୨୦୧୮ ମସିହାରେ ପୂଜା ଓ ପ୍ରଭାସ ‘ରାଧେ ଶ୍ୟାମ’ ଫିଲ୍ମର କାମ ଆରମ୍ଭ କରିଥିଲେ । ଏଥିରେ ନିଜର ପ୍ରେରଣା ଭୂମିକାକୁ ନେଇ ପୂଜା ଖୁବ୍‌ ଉତ୍ସାହିତ ଥିଲେ, ଯାହାର ଅନେକ ରଙ୍ଗ ଓ ଅନେକ ଜଟିଳତା ରହିଛି । କାହାଣୀରେ ତାଙ୍କ ଚରିତ୍ରର ବଳିଷ୍ଠ ଉପସ୍ଥିତି ରହିଛି । ଦର୍ଶକ ଯଦି ଫିଲ୍ମକୁ ଦେଖନ୍ତି, ତେବେ ଜାଣିପାରିବେ ଯେ ଦୀର୍ଘ ବର୍ଷ ଧରି ଫିଲ୍ମର ପ୍ରସ୍ତୁତି ପ୍ରକ୍ରିୟା ମଧ୍ୟରେ କଳାକାର ଭାବେ ତାଙ୍କର ଗୁରୁତ୍ୱପୂର୍ଣ୍ଣ ବିକାଶ ହୋଇଛି । ଫିଲ୍ମର ପ୍ରେରଣା ଚରିତ୍ର ତାଙ୍କୁ ଜଣେ କଳାକାର ଓ ଜଣେ ବ୍ୟକ୍ତି ଭାବେ ପରିପକ୍ୱ କରିଛି । ଫିଲ୍ମରେ ଅନେକ ସିନ୍‌ ରହିଛି, ସେଥିରୁ ଏହାର ପ୍ରମାଣ ପାଇପାରିବେ ସିନେପ୍ରେମୀ । ‘ରାଧେ ଶ୍ୟାମ’ ଜରିଆରେ ସମଗ୍ର ବିଶ୍ୱକୁ ନିଜର ବୃଦ୍ଧି ଦେଖାଇବାକୁ ଖୁବ୍‌ ଉତ୍ସାହିତ ବୋଲି ପୂଜା କହିଛନ୍ତି ।