ପୁଣି ଫେରିଲା ନାଇଟ କର୍ଫ୍ୟୁ, ଏହି ସମସ୍ତ ସହରରେ ଲାଗୁ ହେଲା କଟକଣା

ସାରା ଦେଶରେ କରୋନା ମାମଲା ବଢିବାରେ ଲାଗିଛି । ମହାରାଷ୍ଟ୍ର, ଗୁଜୁରାଟ ଭଳି ରାଜ୍ୟରେ ସ୍ଥିତି ପୁଣି ବିଗିଡିବାକୁ ବସିଲାଣି । ଏହା ମଧ୍ୟରେ ଗୁଜୁରାଟ ସରକାର ମଙ୍ଗଳବାର ନୂଆ ଗାଇଡଲାଇନ୍ ଜାରି କରିଛନ୍ତି । ଏଥିରେ ଅହମ୍ମଦାବାଦ, ବଦୋଦରା, ସୁରଟ ଓ ରାଜକୋଟରେ ମାର୍ଚ୍ଚ ୩୧ ଯାଏଁ ନାଇଟ୍ କର୍ଫ୍ୟୁ ଲାଗୁ ହେବା ନେଇ ନିର୍ଦ୍ଦେଶ ଦିଆଯାଇଛି ।

ନାଇଟ୍ କର୍ଫ୍ୟୁ ୧୭ ତାରିଖରୁ ଲାଗୁ ହେବ । ରାତି ୧୦ରୁ ସକାଳ ୬ ଯାଏଁ ସମସ୍ତ ପରିବହନ ସେବା ଓ ଯାତାୟତ ଏବଂ ଦୋକାନ ବଜାର ବନ୍ଦ ରହିବ । କେବଳ ଅତ୍ୟାବଶ୍ୟକ ସେବା ହିଁ ଚାଲୁ ରହିବ ।

ଗୁଜୁରାଟର ମନ୍ତ୍ରୀ ଈଶ୍ୱର ପଟେଲ ମଧ୍ୟ କୋଭିଡ୍ ଆକ୍ରାନ୍ତ ହୋଇଛନ୍ତି । ଦୁଇ ଦିନ ପୂର୍ବରୁ ତାଙ୍କଠାରେ ଲକ୍ଷଣ ଦେଖିବାକୁ ମିଳିଥିଲା । ଏହାପରେ ସେ ଟେଷ୍ଟ୍ କରିଥିଲେ । ଟେଷ୍ଟ ରିପୋର୍ଟ ପଜିଟିଭ୍ ଆସିଥିଲା । ଯେତେବେଳେ ତାଙ୍କଠାରେ ସାମାନ୍ୟ ଲକ୍ଷଣ ଦେଖାଯାଇଥିଲା ସେ ଟିକାର ପ୍ରଥମ ଡୋଜ୍ ନେଇଥିଲେ । ଏବେ ତାଙ୍କୁ ଅହମ୍ମଦାବାଦର ସଂଯୁକ୍ତ ରାଷ୍ଟ୍ର ମେହେଟା ହସ୍ପିଟାଲରେ ଭର୍ତ୍ତି କରାଯାଇଛି ।

ସୋମବାର ରାଜ୍ୟରେ ୮୯୦ ମାମଲା ଚିହ୍ନଟ ହୋଇଥିଲା । ଏହାକୁ ଦେଖିବା ପରେ ଭାରତ-ଇଂଲଣ୍ଡ ତୃତୀୟ ଟି୨୦ ମ୍ୟାଚ୍ ବିନା ଦର୍ଶକରେ ଖେଳାଯିବା ନେଇ ନିଷ୍ପତ୍ତି ହୋଇଥିଲା । କେବଳ ଗୁଜୁରାଟ ନୁହେଁ ଅନେକ ରାଜ୍ୟରେ ମାମଲା ବଢୁଥିବାରୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ସମସ୍ତ ମୁଖ୍ୟମନ୍ତ୍ରୀଙ୍କ ସହ ବୈଠକ ଡାକିଛନ୍ତି । ବୁଧବାର ଦିନ ସାଢେ ୧୨ଟାରୁ ବୈଠକ ହେବ । କୁହାଯାଉଛି ଯେ, ବୈଠକରେ ପ୍ରଧାନମନ୍ତ୍ରୀ କରୋନା ସଂକ୍ରମଣ ରୋକିବା ପାଇଁ ବିଭିନ୍ନ ପଦକ୍ଷେପ ଓ ଟିକାକରଣ ଉପରେ ଚର୍ଚ୍ଚା କରିପାରନ୍ତି ।