ଦୀର୍ଘ ୫୫ ବର୍ଷ ପରେ ଭାରତ-ବାଂଲାଦେଶ ମଧ୍ୟରେ ଚାଲିବ ଟ୍ରେନ

ଦୀର୍ଘ ୫୫ ବର୍ଷ ପରେ ଭାରତ ଏବଂ ବାଂଲାଦେଶ ମଧ୍ୟରେ ରେଳ ପଥ ଖୋଲିବାକୁ ଯାଉଛି । ଡିସେମ୍ବର ୧୭ ରେ ପଶ୍ଚିମବଙ୍ଗର ହାଲଡିବାରୀ ଏବଂ ପଡୋଶୀ ବାଂଲାଦେଶର ଚିଲହାଟି ମଧ୍ୟରେ ରେଳ ପଥର ଉଦଘାଟନ ହେବ । ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏବଂ ବାଂଲାଦେଶ ପ୍ରଧାନମନ୍ତ୍ରୀ ଶେଖ ହସିନା ଏହାର ଶୁଭ ଉଦଘାଟନ କରିବେ । ଉତ୍ତର-ପୂର୍ବ ସୀମାନ୍ତ ରେଳ ବିଭାଗର ଅଧିକାରୀମାନେ ଏହି ସୂଚନା ଦେଇଛନ୍ତି ।

୧୯୬୫ ମସିହାରେ ଭାରତ ଏବଂ ପୂର୍ବ ପାକିସ୍ଥାନ ମଧ୍ୟରେ ରେଳ ସଂଯୋଗ ଭାଙ୍ଗିବା ପରେ କୋଚ ବିହାରର ହାଲଡିବାରୀ ଠାରୁ ଉତ୍ତର ବାଂଲାଦେଶର ଚିଲହାଟି ପର୍ଯ୍ୟନ୍ତ ରେଳ ଲାଇନ ଖରାପ ହୋଇଯାଇଥିଲା । ଏନଏଫଆର ମୁଖ୍ୟ ଜନସମ୍ପର୍କ ଅଧିକାରୀ ସୁଭାନ ଚନ୍ଦା କହିଛନ୍ତି ଯେ ଡିସେମ୍ବର ୧୭ ରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏବଂ ତାଙ୍କ ବାଂଲାଦେଶୀ ପ୍ରତିପକ୍ଷ ଶେଖ ହସିନା ହାଲଡିବାରୀ-ଚିଲହାଟୀ ରେଳ ମାର୍ଗକୁ ଉଦଘାଟନ କରିବେ । ସୁଭାନ୍ ଚନ୍ଦା କହିଛନ୍ତି ଯେ ଚିରହାଟୀରୁ ହାଲଡିବାରୀ ପର୍ଯ୍ୟନ୍ତ ଏକ ମାଲବାହୀ ଟ୍ରେନ୍ ଚଳାଚଳ କରିବ, ଯାହାକି ଏନଆରଏଫର କାଟିହର ବିଭାଗ ଅଧୀନରେ ଅଛି । କଭିହାର ଡିଭିଜନାଲ ରେଲୱେ ମ୍ୟାନେଜର ରବିନ୍ଦ୍ର କୁମାର ଭର୍ମା କହିଛନ୍ତି ଯେ ରେଳ ମନ୍ତ୍ରଣାଳୟ ମଙ୍ଗଳବାର ଦିନ ରେଳ ମାର୍ଗ ଖୋଲିବା ନିଷ୍ପତ୍ତି ସମ୍ପର୍କରେ ଅଧିକାରୀମାନଙ୍କୁ ସୂଚନା ଦେଇଛି ।

NFR ସୂତ୍ରରୁ ପ୍ରକାଶ ଯେ ଅନ୍ତର୍ଜାତୀୟ ସୀମାଠାରୁ ହାଲଡିବାରୀ ରେଳ ଷ୍ଟେସନ ପର୍ଯ୍ୟନ୍ତ ଦୂରତା ୪.୫ କିଲୋମିଟର ଥିବାବେଳେ ବାଂଲାଦେଶର ଚିଲହାଟୀର ଦୂରତା ଜିରୋ ପଏଣ୍ଟଠାରୁ ୭.୫ କିଲୋମିଟର ଦୂରରେ । ବର୍ତ୍ତମାନର ବାଂଲାଦେଶର ଅଞ୍ଚଳ ଦେଇ ଯାଇଥିବା ସିଲିଗୁରି ଏବଂ କୋଲକାତା ମଧ୍ୟରେ ଥିବା ପୁରୁଣା ବ୍ରଡ ଗେଜ୍ ରେଳ ମାର୍ଗରେ ଉଭୟ ହାଲଡିବାରୀ ଏବଂ ଚିଲହାଟି ଷ୍ଟେସନ ଥିଲା । ଏହି ମାର୍ଗରେ ଯାତ୍ରୀବାହୀ ଟ୍ରେନ୍ ସେବା ଆରମ୍ଭ ହେବା ସହିତ କୋଲକାତା ଠାରୁ ଜଲପାଇଗୁରୀ ଯାଉଥିବା ଲୋକଙ୍କୁ ମାତ୍ର ସାତ ଘଣ୍ଟା ଲାଗିବ । ଏହା ପୂର୍ବରୁ ଏହା ୧୨ ଘଣ୍ଟା ଲାଗୁଥିଲା ।