ଖାଇବାକୁ ନପାଇ ରାସ୍ତା କଡରେ ପଡିଥିବା ମୃତ କୁକୁରର ମାଂସ ଖାଇଲେ ପ୍ରବାସୀ ଶ୍ରମିକ, ଭିଡିଓ ଭାଇରାଲ

ଦିଲ୍ଲୀ-ଯୋଧପୁର ରାଜରାସ୍ତାରେ ମାନବିକତାକୁ ଲଜ୍ଜିତ କରୁଥିବାର ଏକ ଦୃଶ୍ୟ ଦେଖିବାକୁ ମିଳିଛି । ନିଜର କ୍ଷୁଧା ମେଣ୍ଟାଇବାକୁ ଯାଇ ଜଣେ ବ୍ୟକ୍ତି ରାସ୍ତା କଡରେ ମରିପଡିଥିବା କୁକୁରର ମାଂସ ଖାଉଥିବାର ଦେଖିବାକୁ ମିଳିଛି । ସେହି ରାସ୍ତା ଦେଇ ଅତିକ୍ରମ କରୁଥିବା ଜଣେ ସହୃଦୟବାନ ବ୍ୟକ୍ତିଙ୍କ ନଜର ଯେତେବେଳେ ଏହି ଘଟଣା ଉପରେ ପଡିଲା ସେତେବେଳେ ସେ ଗାଡିରୁ ଓହ୍ଲାଇ ଉକ୍ତ ବ୍ୟକ୍ତିଙ୍କୁ ଖାଦ୍ୟ ଦେଇଥିଲେ । ଏହି ଘଟଣାଟି ରାଜସ୍ଥାନ ଶାହପୁରର ବୋଲି ଜାଣିବାକୁ ମିଳିଛି ।

ପ୍ରଦ୍ୟୁମ୍ନ ସିଂହ ନାମକ ଜଣେ ବ୍ୟକ୍ତି ଏହି ଦୃଶ୍ୟକୁ ନିଜ ଫୋନରେ କଏଦ କରିଥିଲେ , ଯିଏକି ଦିଲ୍ଲୀ ଅଭିମେଖୁ ଯାଉଥିଲେ । ଭିଡିଓଟିକୁ କଏଦ କରୁଥିବା ସମୟରେ ସେ କହୁଛନ୍ତି, ଜଣେ ବ୍ୟକ୍ତି ରାସ୍ତା କଡରେ କୁକୁର ମାଂସ ଖାଉଛନ୍ତ ।
ସେ ଉକ୍ତ ବ୍ୟକ୍ତି ଜଣଙ୍କୁ ପଚାରିଥିଲେ ଯେ, ତୁମ ପାଖରେ ଖାଇବା ପାଇଁ ଭୋଜନ ନାହିଁ କି? ତୁମେ କ’ଣ ଖାଉଛ? ଏହାକୁ ଖାଇ ମରିଯିବ । ସେ ତାଙ୍କୁ ଗାଳି ଦେବା ସହ ରାସ୍ତା କଡକୁ ଆସି ଅପେକ୍ଷା କରିବା ପାଇଁ ମଧ୍ୟ କହିଥିଲେ । ଏହା ପରେ ବ୍ୟକ୍ତି ଜଣ ତାଙ୍କ ପାଖକୁ ଯାଇ ଖାଦ୍ୟ ପାନୀୟ ଦେଲେ ।