ସାପକୁ କାମୁଡି ଚୋବାଇ ଖାଇଲା ମଦ୍ୟପ ବ୍ୟକ୍ତି, ଭିଡିଓ ଭାଇରାଲ

କରୋନା ମହାମାରୀ ସଂକ୍ରମଣକୁ ରୋକିବା ପାଇଁ କେନ୍ଦ୍ର ସରକାର ସାରା ଦେଶରେ ଲକଡାଉନ ଜାରି ରଖିଛନ୍ତି। ଗତ ଦୁଇଟି ପର‌୍ୟ୍ୟାୟ ଲକଡାଉନ୍ ଅପେକ୍ଷା ତୃତୀୟ ପର‌୍ୟ୍ୟାୟ ଲକଡାଉନ ଏବେ ପୂର୍ବ ଅପେକ୍ଷା କୋହଳ ରହିଛି। ସରକାର ମଦ ଦୋକାନ ଗୁଡିକ ଖୋଲିବା ପରେ ଲୋକଙ୍କ ଭିତରେ ଖୁବ୍ ଉତ୍ସାହ ବଢିଯାଇଛି। ଲମ୍ବା ଲାଇନରେ ଠିଆ ହୋଇ ପେଟି ପେଟି ମଦ କିଣିକି ନେଇଯାଉଛନ୍ତି। ତେବେ ମଦ ନିଶରେ ଜଣେ ଶ୍ରମିକ ଏଭଳି କାଣ୍ଡ କରିଦେଇଛନ୍ତି ଯେ, ଯାହାକୁ ଶୁଣିବା ପରେ ଆପଣମାନେ ଆଶ୍ଚର୍ଯ୍ୟ ହୋଇଯିବେ। କର୍ଣ୍ଣାଟକର କୋଲାର ଜିଲ୍ଲାରେ ଜଣେ ଶ୍ରମିକ ମଦ ନିଶାରେ ଏକ ସାପକୁ କାମୁଡି ମାରିଦେଇଛନ୍ତି। କୋଲାର ମୁସ୍ତର ଅଞ୍ଚଳରେ ଜଣେ ଶ୍ରମିକ ମଦ ଦୋକାନରେ ବସି ମଦ ପିଇବା ପରେ ଦୋକାନରୁ ଏକ ବୋତଲ ଧରି ଘରକୁ ଫେରୁଥିଲେ। ତେବେ ଆସିବା ବେଳେ ତାଙ୍କ ବାଇକର ଚକରେ ଏକ ସାପ ଦେଖିବାକୁ ପାଇଥିଲେ। ତେବେ ଶ୍ରମିକ ଜଣକ ଚକରୁ ସାପକୁ ବାହାର କରି ନିଜ ବେକରେ ପକାଇ ଦେଇଥିଲେ। ଏହାପରେ ସେ ବାଇକ ଚଲାଇବାରେ ଲାଗିଥିଲେ। ଏହି ସମୟରେ ସାପଟି ଶ୍ରମିକଙ୍କୁ କାମୁଡି ଦେଇଥିଲେ।

କିଛି ସମୟରେ ଶ୍ରମିକ ଜଣକ ରାସ୍ତା ମଝିରେ ବାଇକ୍ ରୋକି ସାପକୁ କାମୁଡିବା ଆରମ୍ଭ କରିଦେଇଥିଲେ। ସେ ସାପକୁ ଚୋବେଇ ଚୋବେଇ ମାରି ଦେଇଥିଲେ। ସାପକୁ କାମୁଡି ମାରିବା ପରେ ମଧ୍ୟ ଶ୍ରମିକ ଜଣକୁ କିଛି ଅସୁବିଧା ହୋଇନଥିଲା କିମ୍ବା ସେ ଡାକ୍ତରଙ୍କ ପାଖକୁ ଯାଇନଥିଲେ। ସେଠାରେ ଥିବା ଲୋକ ଏତେ ଡରି ଯାଇଥିଲେ ଯେ, ସେମାନେ ସେହି ଶ୍ରମିକର ପାଖକୁ ଯାଇନଥିଲେ। କିଛି ଲୋକ ଏହି ସମ୍ପୂର୍ଣ୍ଣ ଘଟଣାର ଭିଡିଓ ମୋବାଇଲରେ ତିଆରି କରି ସୋସିଆଲ ମିଡିଆରେ ଅପଲୋଡ୍ କରିଦେଇଥିଲେ, ଯେଉଁଠାରୁ ଭିଡିଓ ଏବେ ଭାଇରାଲ ହୋଇଛି।