କରୋନା ସଂକ୍ରମିତଙ୍କ ଚିକିତ୍ସା ପାଇଁ ଆଗକୁ ଆସିଲେ ତବଲିଗୀ, ନିଜ ପ୍ଲାଜମା ଦାନ କଲେ ଜମାତି ସଦସ୍ୟ

କରୋନା ଆକ୍ରାନ୍ତଙ୍କ ଚିକିତ୍ସାରେ ପ୍ଲାଜମା ଥେରାପିରୁ ସଫଳତା ମିଳୁଥିବା ଡାକ୍ତରମାନେ କହୁଛନ୍ତି। ତେଣୁ ସଂକ୍ରମିତଙ୍କ ଚିକିତ୍ସା ଲାଗି ପ୍ଲାଜମା ଦାନ କରିବାକୁ ଡାକ୍ତରମାନେ ଆହ୍ବାନ କରୁଛନ୍ତି। ଯେଉଁମାନେ କରୋନାରେ ଆକ୍ରାନ୍ତ ହୋଇ ସୁସ୍ଥ ହୋଇଛନ୍ତି ସେମାନଙ୍କଠାରୁ ପ୍ଲାଜମା ସଂଗ୍ରହ କରାଯାଇ ଅନ୍ୟ ଆକ୍ରାନ୍ତଙ୍କ ଚିକିତ୍ସାରେ ବ୍ୟବାହାର କରାଯିବ। ଏହି ପରିପ୍ରେକ୍ଷୀରେ ହରିୟାଣାରେ ଜଣେ ତବଲିଗୀ ଜମାତ ସଦସ୍ୟ ପ୍ଲାଜମା ଦାନ କରି ଚର୍ଚ୍ଚାକୁ ଆସିଛନ୍ତି। ଏପରି କି ଦରକାର ପଡ଼ିଲେ ସେ ୧୦ ଥର ପ୍ଲାଜମା ଦାନ କରିବେ ବୋଲି କହିଛନ୍ତି।

ଏହି ତବଲିଗୀ ଜମାତ ସଦସ୍ୟ ଜଣକ ହେଉଛନ୍ତି ଅରଶଦ ଅହମ୍ମଦ। ସେ କହିଛନ୍ତି, ମୋ​‌ତେ ହସ୍ପିଟାଲ ନିଜ ଘର ଭଳି ଲାଗିଥିଲା। ଡାକ୍ତର ଏବଂ ନର୍ସମାନେ ମୋର ଭଲ ଦେଖାଶୁଣା କରିଥିଲେ। ନିଜ ପରିବାରର ସଦସ୍ୟ ପରି ବ୍ୟବହାର କରିଥିଲେ। ମୁଁ କରୋନା ବିରୋଧୀ ଲଢ଼େଇରେ ସାମିଲ ହୋଇ ୨ ଥର ପ୍ଲାଜମା ଦାନ କରିଛି। ଆଗକୁ ଦରକାର ପଡ଼ିଲେ ଆହୁରି ୧୦ ଥର ଦାନ କରିବି। ସୂଚନାଯୋଗ୍ୟ, ଅଶରଦ ଦିଲ୍ଲୀର ଜବଲିଗୀ ଜମାତରେ ସାମିଲ ହୋଇଥିଲେ। ସେଠାରୁ ଫେରିବା ପରେ ସେ କରୋନାରେ ଆକ୍ରାନ୍ତ ହୋଇଥିଲେ। ଚିକିତ୍ସା ପରେ ସେ ଏବେ ସୁସ୍ଥ ହୋଇଛନ୍ତି। ତାଙ୍କର ପରୀକ୍ଷା ରିପୋର୍ଟ ନେଗେଟିଭ ଆସିଛି। ଆମ ସମସ୍ତଙ୍କୁ ସରକାରଙ୍କୁ ସହଯୋଗ କରିବା ଦରକାର ବୋଲି ସେ କହିଛନ୍ତି।