ଭଦ୍ରକ: ଭଦ୍ରକ ଜିଲ୍ଲାରେ ଏକ ଅତ୍ୟନ୍ତ ନିନ୍ଦନୀୟ ଘଟଣା ସାମ୍ନାକୁ ଆସିଛି। ଜଣେ ସପ୍ତମ ଶ୍ରେଣୀର ଛାତ୍ରୀଙ୍କୁ ବିଳମ୍ବିତ ରାତିରେ ସ୍କୁଲ ପରିସର ମଧ୍ୟରେ ଅସଦାଚରଣ କରିଥିବା ଅଭିଯୋଗରେ ଜଣେ ହିନ୍ଦୀ ଶିକ୍ଷକଙ୍କୁ ପୋଲିସ ଅଟକ ରଖିଛି।
ରିପୋର୍ଟ ଅନୁଯାୟୀ, ଭଦ୍ରକ ଜିଲ୍ଲା ବାସୁଦେବପୁର ବ୍ଲକସ୍ଥିତ ପିଏମ୍ ଶ୍ରୀ ଜବାହର ନବୋଦୟ ବିଦ୍ୟାଳୟର ହିନ୍ଦୀ ଶିକ୍ଷକ ବିଳମ୍ବିତ ରାତିରେ ଜଣେ ଛାତ୍ରୀଙ୍କୁ ଅସଦାଚରଣ କରିବାକୁ ଚେଷ୍ଟା କରିଥିଲେ। ଏଥିସହିତ ସେ ଏହି ବିଷୟରେ କାହାକୁ କହିଲେ ଭୟଙ୍କର ପରିଣତି ଭୋଗିବାକୁ ପଡ଼ିବ ବୋଲି ଛାତ୍ରୀଙ୍କୁ ଧମକ ମଧ୍ୟ ଦେଇଥିଲେ।
ତେବେ ଛାତ୍ରୀଜଣକ କୌଶଳକ୍ରମେ ତାଙ୍କ କବଳରୁ ଖସି ଆସି ଜଣେ ବୃଦ୍ଧାଙ୍କ ପାଖରେ ଆଶ୍ରୟ ନେଇଥିଲେ। ଛାତ୍ରୀଙ୍କଠାରୁ ସବୁ ଶୁଣିବା ପରେ ବୃଦ୍ଧାଜଣକ ଗ୍ରାମବାସୀଙ୍କୁ ଜଣାଇଥିଲେ। ଏହାପରେ ଉତ୍ତ୍ୟକ୍ତ ଗ୍ରାମବାସୀ ସ୍କୁଲ ଘେରାଉ କରିବା ସହ କାସିଆ ମେରାଇନ୍ ପୋଲିସକୁ ଖବର ଦେଇ ଶିକ୍ଷକଙ୍କ ବିରୋଧରେ କଡ଼ା କାର୍ଯ୍ୟାନୁଷ୍ଠାନ ଦାବି କରିଥିଲେ।
ପୋଲିସ ଘଟଣାସ୍ଥଳରେ ପହଞ୍ଚି ଛାତ୍ରୀଙ୍କ ପରିବାର ପକ୍ଷରୁ ଦିଆଯାଇଥିବା ଅଭିଯୋଗ ଆଧାରରେ ଶିକ୍ଷକଙ୍କୁ ଅଟକ ରଖିଛି। ଅନ୍ୟପକ୍ଷରେ, ଅଭିଯୁକ୍ତ ଶିକ୍ଷକ ନିଜକୁ ନିର୍ଦ୍ଦୋଷ ବୋଲି କହିଛନ୍ତି। ପୋଲିସ ପକ୍ଷରୁ ଅଧିକ ପଚରାଉଚରା ଓ ଘଟଣାର ତଦନ୍ତ ଜାରି ରହିଛି।
Comments are closed.