ରୁଷ ଏବଂ ପାକିସ୍ତାନର ନିକଟତରତା କ୍ରମାଗତ ଭାବେ ବୃଦ୍ଧି ପାଉଛି | ମିଳିତ ସାମରିକ ଅଭ୍ୟାସ ପାଇଁ ରୁଷର ଏକ ଦଳ ଗୁରୁବାର ଦିନ ପାକିସ୍ତାନରେ ପହଞ୍ଚିଛନ୍ତି। ପାକିସ୍ତାନ ଏବଂ ରୁଷର ସେନାର ଏହି ମିଳିତ ସାମରିକ ଅଭ୍ୟାସର ନାମ DRUHZBA-5 (ଧ୍ରୁଜବା) ରଖାଯାଇଛି |
ପାକିସ୍ତାନ ସେନା ଟୁଇଟ୍ କରି ଏ ବିଷୟରେ ସୂଚନା ଦେଇଛି। ପାକ୍ ସେନା ଦ୍ବାରା ଜାରି ଏକ ବିବୃତ୍ତିରେ କୁହାଯାଇଛି ଯେ ଏହା ହେଉଛି ପାକିସ୍ତାନ ଏବଂ ରୁଷ ମଧ୍ୟରେ ପଞ୍ଚମ ମିଳିତ ସାମରିକ ଅଭ୍ୟାସ। ଏହି ମିଳିତ ଅଭ୍ୟାସ ଦୁଇ ସପ୍ତାହ ପର୍ଯ୍ୟନ୍ତ ଚାଲିବ | ବିବୃତ୍ତିରେ କୁହାଯାଇଛି ଯେ ଆତଙ୍କବାଦ ମୁକାବିଲା କରିବାରେ ଉଭୟ ଦେଶର ସୈନ୍ୟବାହିନୀର ଅଭିଜ୍ଞତା ବାଣ୍ଟିବା ଏହି ଅଭ୍ୟାସର ଉଦ୍ଦେଶ୍ୟ।
ପାକିସ୍ତାନ ସେନାର ମିଡିଆ ୱିଙ୍ଗ ଅନୁଯାୟୀ, ଏହି ସାମରିକ ଅଭ୍ୟାସରେ ସ୍କାଇ ଡାଇଭିଂ ଏବଂ ବନ୍ଧକଙ୍କୁ ମୁକ୍ତ କରିବା ଭଳି କାର୍ଯ୍ୟକଳାପ ରହିବ। ପ୍ରତିବର୍ଷ ପାକିସ୍ତାନ-ରୁଷର ମିଳିତ ସାମରିକ ଅଭ୍ୟାସ ଦ୍ରୁଜବା ଅନୁଷ୍ଠିତ ହୋଇଥାଏ। ୨୦୧୬ ପରଠାରୁ ପାକିସ୍ତାନ ଏବଂ ରୁଷର ବାହିନୀ ମିଳିତ ଅଭ୍ୟାସ କରୁଛନ୍ତି। ଏଥିରେ ଆତଙ୍କବାଦ ବିରୋଧୀ ଏବଂ ସ୍ୱତନ୍ତ୍ର ସାମରିକ କାର୍ଯ୍ୟ ମଧ୍ୟ ଅନ୍ତର୍ଭୁକ୍ତ |
ତେବେ ପାକିସ୍ତାନ ସହ ରୁଷର ଏହି ସାମରିକ ଭାଗିଦାରୀକୁ ନେଇ ଭାରତ ବିରୋଧ ପ୍ରଦର୍ଶନ କରିଛି। ଭାରତ ବାରମ୍ବାର ରୁଷ ଆଗରେ ଆପତ୍ତି କରିଛି ଯେ ଆତଙ୍କବାଦକୁ ସୁରକ୍ଷା ଦେଉଥିବା ପାକିସ୍ତାନ ସହ ସହଯୋଗ କରିବା ଭୁଲ ଏବଂ ଏହାଦ୍ୱାରା ସମସ୍ୟା ବୃଦ୍ଧି ପାଇବ।
ତେବେ ରୁଷ ଭାରତର ଆପତ୍ତି ଉପରେ ଅଣଦେଖା କରିଆସୁଛି। ଚଳିତ ବର୍ଷ ସେପ୍ଟେମ୍ବରରେ ପାକିସ୍ତାନର ସେନା ମଧ୍ୟ ରୁଷର ଆସତରାଖାନରେ ‘କାୱାକଜ୍ ୨୦୨୦’ ସାମରିକ ଅଭ୍ୟାସରେ ଭାଗ ନେଇଥିଲା। ଗତ ବର୍ଷ ପାକିସ୍ତାନ ରୁଷର ସାମରିକ ଅଭ୍ୟାସ ସେନ୍ତରରେ ୨୦୧୯ ରେ ଅଂଶଗ୍ରହଣ କରିଥିଲା। ଏହି ସାମରିକ ଅଭ୍ୟାସରେ କାଜାଖସ୍ତାନ, କିର୍ଗିଜସ୍ଥାନ, ତାଜିକିସ୍ତାନ ଏବଂ ଉଜବେକିସ୍ତାନ ମଧ୍ୟ ଅଂଶଗ୍ରହଣ କରିଥିଲେ।
ଶୀତଳ ଯୁଦ୍ଧ ସମୟରେ ପାକିସ୍ତାନ ଆମେରିକାର ରୁଷ ବିରୋଧୀ ଅର୍ଥାତ ଆମେରିକା ସପକ୍ଷରେ ଥିଲା। ତେବେ ଉଭୟଙ୍କ ମଧ୍ୟରେ ବଢ଼ୁଥିବା ନୂଆ ବିଶ୍ୱସ୍ତରୀୟ ଘନିଷ୍ଠତା ଭାରତ ପାଇଁ ଚିନ୍ତାର ବିଷୟ ହୋଇଛି | ପାକିସ୍ତାନ ଏବଂ ରୁଷ ମଧ୍ୟରେ ସାମରିକ ଭାଗିଦାରୀ ମଧ୍ୟ ମଜବୁତ ହେଉଛି।
Comments are closed.