ଆମେରିକାର ନବ ନିର୍ବାଚିତ ରାଷ୍ଟ୍ରପତି ବିଡେନଙ୍କ ସହ କଥାହେଲେ ପିଏମ ନରେନ୍ଦ୍ର ମୋଦୀ, କରୋନା ଓ ଜଳବାୟୁ ପରିବର୍ତନ ଉପରେ ବିଶେଷ ଆଲୋଚନା

ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ମଙ୍ଗଳବାର ଆମେରିକାର ନବନିର୍ବାଚିତ ରାଷ୍ଟ୍ରପତି ଜୋ ବିଡେନଙ୍କ ସହ ଆଲୋଚନା କରିଛନ୍ତି। ଦୁଇ ବରିଷ୍ଠ ନେତା କରୋନା ଭାଇରସ ମହାମାରୀ ଠାରୁ ଆରମ୍ଭ କରି ଜଳବାୟୁ ପରିବର୍ତ୍ତନ ପର୍ଯ୍ୟନ୍ତ ବିଭିନ୍ନ ଦ୍ୱିପାକ୍ଷିକ ପ୍ରସଙ୍ଗ ଉପରେ ଆଲୋଚନା କରିଥିଲେ ଏବଂ ଦୁଇ ଦେଶ ମଧ୍ୟରେ ରଣନୀତିକ ଦ୍ୱିପାକ୍ଷିକ ଭାଗିଦାରୀ ବଜାୟ ରଖିବା ପାଇଁ ଦୃଢ ପ୍ରତିଶ୍ରୁତି ଦେଇଥିଲେ। ଏହି ସମୟ ମଧ୍ୟରେ ଚୀନ୍ ବିରୋଧରେ ଭାରତ-ପ୍ରଶାନ୍ତ ମହାସାଗରରେ ଦୁଇ ଦେଶ ମଧ୍ୟରେ ଚାଲିଥିବା ସହଯୋଗକୁ ପ୍ରଧାନମନ୍ତ୍ରୀ ମୋଦୀ ବିଡେନଙ୍କୁ ମନେ ପକାଇ ଦେଇଛନ୍ତି। ବିଡେନ ତାଙ୍କୁ ସମ୍ପୂର୍ଣ୍ଣ ସହଯୋଗ କରିବେ ବୋଲି ଆଶ୍ୱାସନା ଦେଇଛନ୍ତି।

ଆମେରିକାର ରାଷ୍ଟ୍ରପତି ନିର୍ବାଚନରେ ​​ବିଡେନଙ୍କ ବିଜୟ ପରେ ଦୁଇ ନେତାଙ୍କ ମଧ୍ୟରେ ଏହା ହେଉଛି ପ୍ରଥମ ବାର୍ତ୍ତାଳାପ। ଫୋନରେ ଆମେରିକାର ନବନିର୍ବାଚିତ ରାଷ୍ଟ୍ରପତି ଜୋ ବିଡେନଙ୍କୁ ଅଭିନନ୍ଦନ ଜଣାଇଥିବା ମୋଦୀ ଟୁଇଟ୍ କରି କହିଛନ୍ତି । ଏଥିସହିତ ଅନେକ ଗୁରୁତ୍ବପୂର୍ଣ୍ଣ ବିଷୟ ଉପରେ ତାଙ୍କ ସହ ଆଲୋଚନା ମଧ୍ୟ କରିଛନ୍ତି । ପ୍ରଧାନମନ୍ତ୍ରୀ ମୋଦୀ ଆମେରିକାର ନିର୍ବାଚିତ ଉପରାଷ୍ଟ୍ରପତି କମଲା ହାରିସଙ୍କୁ ମଧ୍ୟ ଅଭିନନ୍ଦନ ଜଣାଇଛନ୍ତି। ସେ କହିଛନ୍ତି, ତାଙ୍କର ସଫଳତା ଭାରତୀୟ ଆମେରିକୀୟ ସମ୍ପ୍ରଦାୟ ପାଇଁ ଗର୍ବର ବିଷୟ ଏବଂ ପ୍ରେରଣା ଅଟେ | ଏହି ସମ୍ପ୍ରଦାୟ ଭାରତ-ଆମେରିକା ସମ୍ପର୍କର ଏକ ଗୁରୁତ୍ୱପୂର୍ଣ୍ଣ ଉତ୍ସ ଅଟେ। ‘

ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟରୁ ଜାରି ହୋଇଥିବା ଏକ ବିବୃତ୍ତିରେ କୁହାଯାଇଛି ଯେ ପ୍ରଧାନମନ୍ତ୍ରୀ ମୋଦୀ ୨୦୧୪ ଏବଂ ୨୦୧୬ ରେ ଆମେରିକା ଗସ୍ତ ସମୟରେ ବିଡେନଙ୍କ ସହ ହୋଇଥିବା ସାକ୍ଷାତକୁ ମନେ ପକାଇଛନ୍ତି। ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟ ପକ୍ଷରୁ କୁହାଯାଇଛି ଯେ ୨୦୧୬ ରେ ମୋଦୀ ଯେତେବେଳେ ଆମେରିକା କଂଗ୍ରେସର ମିଳିତ ଅଧିବେଶନକୁ ସମ୍ବୋଧିତ କରିଥିଲେ ସେତେବେଳେ ବିଡେନ ଏହାର ଅଧ୍ୟକ୍ଷତା କରିଥିଲେ। ଭାରତ-ଆମେରିକାର ସାମଗ୍ରିକ ବିଶ୍ୱ ରଣନୀତିକ ଭାଗିଦାରୀକୁ ବିସ୍ତାର କରିବାକୁ ଦୁଇ ନେତା ମିଳିତ ଭାବେ କାର୍ଯ୍ୟ କରିବାକୁ ସହମତ ହୋଇଥିଲେ।

ଦୁଇ ନେତା କୋଭିଡ-୧୯ ରୋକିବା, ସୁଲଭ ଟିକା ଉପଲବ୍ଧତା, ଜଳବାୟୁ ପରିବର୍ତ୍ତନ ଏବଂ ଭାରତ-ପ୍ରଶାନ୍ତ ମହାସାଗରରେ ସହଯୋଗ ଉପରେ ଆଲୋଚନା କରିଥିଲେ। ମୋଦୀ ଏବଂ ବିଡେନଙ୍କ ମଧ୍ୟରେ ଆଲୋଚନା ପୂର୍ବରୁ ବୈଦେଶିକ ମନ୍ତ୍ରୀ ଏସ ଜୟଶଙ୍କର କହିଛନ୍ତି ଯେ ବିଡେନ ପ୍ରଶାସନରେ ଭାରତ ଏବଂ ଆମେରିକା ମଧ୍ୟରେ ସମ୍ପର୍କ ଆହୁରି ବିସ୍ତାର ହେବ।

ଏହି ଚୁକ୍ତି ବିଶ୍ବର ଦୁଇଟି ବୃହତ ଗଣତାନ୍ତ୍ରିକ ରାଷ୍ଟ୍ର ମଧ୍ୟରେ ସମ୍ପର୍କକୁ ଗଭୀର କରିବା ପାଇଁ ଏକ ଦୃଢ଼ ମୂଳଦୁଆ| ବାରାକ ଓବାମା ରାଷ୍ଟ୍ରପତି ଥିବାବେଳେ ଭାରତ ଏବଂ ଆମେରିକା ମଧ୍ୟରେ ରଣନୀତିକ ତଥା ପ୍ରତିରକ୍ଷା ସମ୍ପର୍କରେ ଏକ ବ୍ୟାପକ ବିସ୍ତାର ହୋଇଥିଲା ଏବଂ ଉପରାଷ୍ଟ୍ରପତି ଭାବରେ ବିଡେନ ଏଥିରେ ପ୍ରମୁଖ ଭୂମିକା ଗ୍ରହଣ କରିଥିଲେ। ତାଙ୍କ ନିର୍ବାଚନ ପ୍ରଚାର ସମୟରେ ବିଡେନ ଆମେରିକା-ଭାରତ ସହଭାଗୀତା ଉପରେ ତାଙ୍କର ଆଭିମୁଖ୍ୟ ଉପରେ ଆଲୋଚନା କରିଥିଲେ।