ଭୁବନେଶ୍ୱର: ରାଜ୍ୟ ସରକାରଙ୍କ ମାନ୍ୟବର ଶିଳ୍ପ, ଶକ୍ତି ଏବଂ ଏମ୍ଏସ୍ଏମ୍ଇ ମନ୍ତ୍ରୀ ଶ୍ରୀ ପ୍ରତାପ କେଶରୀ ଦେବଙ୍କ ଦ୍ୱାରା ଫଣ୍ଡଷ୍ଟାକ ୨.୦ ର ଶୁଭାରମ୍ଭ କରାଯାଇଛି, ଯାହାକି ଷ୍ଟାର୍ଟଅପ-ନିବେଶକଙ୍କୁ ଯୋଡ଼ିବା ପାଇଁ ରାଜ୍ୟ ସରକାରଙ୍କ ଷ୍ଟାର୍ଟଅପ୍ ଓଡ଼ିଶାର ଏକ ଫ୍ଲାଗସିପ କାର୍ଯ୍ୟକ୍ରମ । ଏହା ବିଭିନ୍ନ ଆଞ୍ଜେଲ ନେଟୱର୍କ ଏବଂ ଭେଂଚର ପୁଞ୍ଜିପତି ଫାର୍ମଗୁଡ଼ିକରୁ ପାଣ୍ଠି ସଂଗ୍ରହ କରିବାକୁ ଇଚ୍ଛା ରଖିଥିବା ଷ୍ଟାର୍ଟଅପ୍ଗୁଡ଼ିକୁ ସହାୟତା କରିବା ପାଇଁ ଲକ୍ଷ୍ୟ ରଖିଛି । ଏହି ଅବସରରେ ମାନ୍ୟବର ମନ୍ତ୍ରୀ ଯୁବଗୋଷ୍ଠୀଙ୍କ ମନରେ ଉଦ୍ୟମିତା ସଂସ୍କୃତିର ସଂସ୍ଥାପନ ଏବଂ ଇକୋସିଷ୍ଟମରେ ରହିଥିବା ବ୍ୟବଧାନଗୁଡ଼ିକୁ ଦୂର କରିବା ଉପରେ ଗୁରୁତ୍ୱାରୋପ କରିଛନ୍ତି । ସେ ମତ ଦେଇଛନ୍ତି ଯେ ଫଣ୍ଡଷ୍ଟାକ ଭଳି କାର୍ଯ୍ୟକ୍ରମ ମାଧ୍ୟମରେ ଓଡ଼ିଶାର ଷ୍ଟାର୍ଟଅପ୍ ଇକୋସିଷ୍ଟମ ଏକ ଏଭଳି ପ୍ଲାଟଫର୍ମର ନିର୍ମାଣ କରିବ ଯାହା ଷ୍ଟାର୍ଟଅପ୍ ଏବଂ ନିବେଶକମାନଙ୍କ ମଧ୍ୟରେ ଏକ ନିମଜ୍ଜିତ ସମ୍ପର୍କ ସ୍ଥାପନ କରିବ । ସେ ମଧ୍ୟ ଓଡ଼ିଶାର ଏକାଧିକ ଶିଳ୍ପ କ୍ଷେତ୍ରର ସମାବେଶୀ ଅଭିବୃଦ୍ଧି ସମ୍ପର୍କରେ କହିଛନ୍ତି ଏବଂ ଭାରତର ପରବର୍ତି ଶିଳ୍ପ କେନ୍ଦ୍ର ହେବା ପାଇଁ ରାଜ୍ୟରେ ସମସ୍ତ ଆବଶ୍ୟକୀୟ ଭିତିଭୂମି ରହିଥିବା ମଧ୍ୟ ସେ କହିଛନ୍ତି । ସେ କହିଛନ୍ତି ଯେ ଫଣ୍ଡଷ୍ଟ୍ୟାକ ୨.୦ କେବଳ ପ୍ରଥମ ପଦକ୍ଷେପ ଏବଂ ଆମନ୍ତ୍ରିତ ନିବେଶକଙ୍କ ପ୍ୟାନେଲରୁ ଅନୁରୋଧ କରାଯାଇଥିବା ପରାମର୍ଶଗୁଡ଼ିକ ଷ୍ଟାର୍ଟଅପ୍ ଓଡ଼ିଶାକୁ ରାଜ୍ୟର ଇକୋସିଷ୍ଟମକୁ ବିକାଶ କରିବାରେ ଆହୁରି ସାହାଯ୍ୟ କରିବ ।
ଷ୍ଟାର୍ଟଅପ ଓଡ଼ିଶା, କାର୍ଯ୍ୟନିର୍ବାହୀ ଅଧ୍ୟକ୍ଷ ଡା.ଓମକାର ରାଏ କହିଛନ୍ତି ଯେ ଫଣ୍ଡଷ୍ଟାକ ୨.୦ ଏକ ଅନନ୍ୟ କାର୍ଯ୍ୟକ୍ରମ ଯାହାକୁ ଅଭିଳାଷାକୁ ସୁଯୋଗରେ ପରିଣତ କରିବା ପାଇଁ କଳ୍ପନା କରାଯାଇଛି । ସେ ଆହୁରି ମଧ୍ୟ କହିଛନ୍ତି ଯେ ଫଣ୍ଡଷ୍ଟାକ କେବଳ ଏକ ପ୍ଲାଟଫର୍ମ ନୁହେଁ ଯାହା ଷ୍ଟାର୍ଟଅପ୍ଗୁଡ଼ିକ ପାଇଁ ନିବେଶକୁ ସହଜ କରିଥାଏ ବରଂ ଦକ୍ଷତା ନିର୍ମାଣ ଏବଂ ନିବେଶ ପ୍ରସ୍ତୁତି ପାଇଁ ଏକ ଫୋରମ ଯାହା ଅଂଶଗ୍ରହଣକାରୀ ଷ୍ଟାର୍ଟଅପଗୁଡ଼ିକୁ ଘରୋଇ ନିବେଶକମାନଙ୍କ ଠାରୁ ପାଣ୍ଠି ସଂଗ୍ରହ କରିବାକୁ ସକ୍ଷମ କରିଥାଏ । ଯାହା ବଦଳରେ ଷ୍ଟାର୍ଟଅପଗୁଡ଼ିକୁ ବିକାଶ ପଥରେ ଆଗକୁ ବଢ଼ିବାରେ ଏବଂ ବ୍ୟବସାୟ ବଢ଼ାଇବାରେ ସାହାଯ୍ୟ କରିଥାଏା
ସେହିଭଳି ଆଇଏସ ତଥା ଏମ୍ଏସ୍ଏମ୍ଇ ପ୍ରମୁଖ ସଚିବ ଶ୍ରୀମତି ରଞ୍ଜନା ଚୋପ୍ରା ଓଡ଼ିଶାର ପ୍ରଗତୀଶୀଳ ତଥା ନିବେଶକ ସହଯୋଗୀ ଇକୋସିଷ୍ଟମ ବିଷୟରେ ନିଜ ମତ ରଖିଛନ୍ତି ଏବଂ କହିଛନ୍ତି ଯେ ଫଣ୍ଡଷ୍ଟାକ ୨.୦ ମାଧ୍ୟମରେ ରାଜ୍ୟ ଷ୍ଟାର୍ଟଅପ ସମ୍ପ୍ରଦାୟକୁ ମେକ ଇନ ଓଡ଼ିଶା କନକ୍ଲେଭ ପାଇଁ ପ୍ରସ୍ତୁତ କରିବ, ଯାହାକି ସାରା ବିଶ୍ୱର ନିବେଶକମାନଙ୍କୁ ଓଡ଼ିଶାକୁ ଆଣିବାର ଯୋଜନା କରିଛି ।
ଫଣ୍ଡଷ୍ଟାକର ପ୍ରଥମ ସଂସ୍କରଣ ୨୦୨୧ ରେ ଭର୍ଚୁଆଲ ଭାବେ ଆୟୋଜିତ ହୋଇଥିଲା ଏବଂ ଏହା ଏକ ଜ୍ଞାନ ବିତରଣ କାର୍ଯ୍ୟକ୍ରମ ଥିଲା ଯେଉଁଠାରେ ୨୦୦ ରୁ ଅଧିକ ଷ୍ଟାର୍ଟଅପ ୨୦ରୁ ଅଧିକ ପ୍ରତିଷ୍ଠିତ ଆଞ୍ଜେଲ ନିବେଶକମାନଙ୍କ ଠାରୁ ବ୍ୟବସାୟିକ ଅର୍ନ୍ତଦୃଷ୍ଟି ହାସଲ କରିଛନ୍ତି ।
ଫଣ୍ଡଷ୍ଟାକ୍ ର ଦ୍ୱିତୀୟ ସଂସ୍କରଣକୁ ଚଳିତ ବର୍ଷ ୨୬ ଅଗଷ୍ଟ ୨୦୨୨ରେ ଓଡ଼ିଶାର ମାନ୍ୟବର ମୁଖ୍ୟମନ୍ତ୍ରୀ ଶ୍ରୀଯୁକ୍ତ ନବୀନ ପଟ୍ଟନାୟକ ଦ୍ୱାରା ଘୋଷଣା କରାଯାଇଥିଲା । ଚଳିତବର୍ଷ ନଭେମ୍ବର ୩୦ ରୁ ଡିସେମ୍ବର ୪ ପର୍ଯ୍ୟନ୍ତ ଆୟୋଜିତ ହେବାକୁ ଥିବା ଆଗାମୀ ବିଶାଳ ଗ୍ଲୋବାଲ ଇନଭେଷ୍ଟର ମିଟ, ମେକ୍ ଇନ୍ ଓଡ଼ିଶା ୨୦୨୨ ପାଇଁ ଏକ ଅଗ୍ରଗାମୀ ଭାବେ ଷ୍ଟାର୍ଟଅପ୍ ପାଇଁ ପୁଞ୍ଜି ବିନିଯୋଗକୁ ଆକର୍ଷିତ କରିବା ପାଇଁ ଚଳିତବର୍ଷ ଏହା ଏକ ଦୁଇ ଦିନବ୍ୟାପୀ ପିଚିଙ୍ଗ ଏବଂ ନେଟୱର୍କି କାର୍ଯ୍ୟକ୍ରମ ଥିଲା । ଏକ ଗଠନମୂଳକ ଚୟନ ପ୍ରକ୍ରିୟା ମାଧ୍ୟମରେ ୧୦୦ ରୁ ଅଧିକ ଷ୍ଟାର୍ଟଅପଙ୍କ ଅଂଶଗ୍ରହଣ ସହିତ ଷ୍ଟାର୍ଟଅପ ଓଡ଼ିଶା ପକ୍ଷରୁ ଏହି ଉଚ୍ଚାକାଂକ୍ଷା କାର୍ଯ୍ୟକ୍ରମକୁ ଭୌତିକ ରୂପେ କରିବାକୁ କଳ୍ପନା କରିଥିଲା । ସୁପର ୫୦ ଷ୍ଟାର୍ଟଅପଙ୍କର ଏକ ତାଲିକାଭୁକ୍ତ ଦଳ ନିବେଶକଙ୍କ ସମ୍ମୁଖରେ ଉପସ୍ଥାପିତ ହୋଇଥିଲେ । ସେଥିମଧ୍ୟରୁ ୨୦ ଟି ଷ୍ଟାର୍ଟଅପ ଏକ ଗଭୀର ନେଟୱର୍କି ଇଭେଂଟ ପାଇଁ ମନୋନୀତ ହୋଇଥିଲେ, ଯେଉଁଥିରେ ସମଗ୍ର ଦେଶର ବିଭିନ୍ନ ସ୍ଥାନରୁ ଆସିଥିବା ୨୦ରୁ ଅଧିକ ନିବେଶକ ଭୁବନେଶ୍ୱରରେ ପହଂଚିଥିଲେ ।
ଷ୍ଟାର୍ଟଅପ ଓଡ଼ିଶା ସିଇଓ, ଏମଡି. ସାଦ୍ଦିକ ଆଲମ, ଆଇଏଏସଙ୍କ ଦ୍ୱାରା ସ୍ୱାଗତ ସମ୍ବୋଧନ ଏବଂ କାର୍ଯ୍ୟକ୍ରମର ସଂକ୍ଷିପ୍ତ ପରିଚୟ ସହିତ ଆରମ୍ଭ ହୋଇଥିବା ଏହି ଉଦଘାଟନୀ ସମାରୋହରେ ଓଡ଼ିଶାର ଷ୍ଟାର୍ଟଅପ ଇକୋସିଷ୍ଟମ ଏବଂ ଫଣ୍ଡଷ୍ଟାକ ୨.୦ ପାଇଁ ଏବଂ ଆଗକୁ ରାଜ୍ୟରେ ବିନିଯୋଗର ପରିସର ସମ୍ବନ୍ଧରେ ନିବେଶକ ଏବଂ ବରିଷ୍ଠ ସରକାରୀ ଅଧିକାରୀଙ୍କ ମଧ୍ୟରେ ଏକ ପାରସ୍ପରିକ ଅଧିବେଶନ ହୋଇଥିଲା । ଏହି ଅଧିବେଶନ ସମୟରେ ଓଡ଼ିଶା ଷ୍ଟାର୍ଟଅପ୍ ଗ୍ରୋଥ ଫଣ୍ଡ(ଫଣ୍ଡସ୍ ଅଫ ଫଣ୍ଡ)କୁ ଷ୍ଟାର୍ଟଅପ ଓଡ଼ିଶା, ଇଭାନଜେଲିଷ୍ଟ ଡା. ସଞ୍ଜୁକ୍ତା ବଢ଼ାଇଙ୍କ ଦ୍ୱାରା ଉପସ୍ଥାପନା କରାଯାଇଥିଲା ।
ପ୍ୟାନେଲ ଆଲୋଚନା ଏବଂ ପିଚିଙ୍ଗ ଅଧିବେଶନ ସମୟରେ ଏହି ଷ୍ଟାର୍ଟଅପ ନିବେଶକମାନଙ୍କ ଠାରୁ ବ୍ୟବସାୟୀକ ଗତିଶୀଳତା ଏବଂ ଫଣ୍ଡିଙ୍ଗ ଇକୋସିଷ୍ଟମ କ୍ଷେତ୍ରରେ ବହୁ ଆବଶ୍ୟକୀୟ ଜ୍ଞାନ ହାସଲ କରିଥିଲା ।
ଦ୍ୱିତୀୟ ଦିନରେ ଫଣ୍ଡଷ୍ଟାକ ଏହାର ଆଧାରକୁ ପୁରୀକୁ ସ୍ଥାନାନ୍ତରିତ କରିଥିଲା । ପୁରୀ ଶ୍ରୀ ଜଗନ୍ନାଥ ମନ୍ଦିର ଦର୍ଶନ ପରେ ନିବେଶକମାନେ ଏକ ରାଉଣ୍ଡଟେବୁଲ ବୈଠକ ପାଇଁ ପୁରୀ ସ୍ଥିତ ମେଫେୟାର ହେରିଟେଜ ରିସୋର୍ଟ ଠାରେ ପହଂଚିଥିଲେ । ଯେଉଁଠାରେ ଏକ ଫ୍ରିହୁଇଲିଙ୍ଗ ଅଧିବେଶନରେ ନିବେଶକମାନେ ଘରୋଇ ଇକ୍ୟୁଇଟି ନିବେଶକୁ ଆକର୍ଷିତ କରି ଓଡ଼ିଶାରେ ଷ୍ଟାର୍ଟଅପ ଇକୋସିଷ୍ଟମର ବିକାଶକୁ ତ୍ୱରାନ୍ୱିତ କରିବା ଲାଗି ସେମାନଙ୍କ ମତାମତ ରଖିଥିଲେ । ଦୁଇ ଦିନର ଏହି ବିଶାଳ ଆକର୍ଷଣୀୟ କାର୍ଯ୍ୟକ୍ରମ ଚୟନିତ ଷ୍ଟାର୍ଟଅପ ଏବଂ ନିବେଶକଙ୍କ ମଧ୍ୟରେ ହୋଇଥିବା ୱାନ ଅନ ୱାନ ମିଟିଙ୍ଗ ସହିତ ସମାପନ ହୋଇଥିଲା ।
ଫଣ୍ଡଷ୍ଟାକ ୨.୦ ଇକୋସିଷ୍ଟମକୁ ପାଣ୍ଠି ପ୍ରଦାନ ଉପରେ ସ୍ୱଦେଶୀ ଷ୍ଟାର୍ଟଅପମାନଙ୍କୁ ଅତ୍ୟାବଶକୀୟ ପହଂଚ ପ୍ରଦାନ କରିବାର ଲକ୍ଷ୍ୟ ରଖିଛି ଏବଂ ସେମାନଙ୍କୁ ନୂତନ ଯୁଗର ଉଦ୍ୟୋଗର ଗତିଶୀଳତାକୁ ବୁଝିବାରେ ସାହାଯ୍ୟ କରିବାକୁ ଚାହୁଁଛି । ଏହି ଅଭ୍ୟାସ ୨୦୨୫ ସୁଦ୍ଧା ୫୦୦୦ ଷ୍ଟାର୍ଟଅପକୁ ସାମିଲ କରିବା ଏବଂ ଭାରତର ସର୍ବୋତମ ଷ୍ଟାର୍ଟଅପ କେନ୍ଦ୍ର ହେବାର ଲକ୍ଷ୍ୟ ହାସଲ କରିବା ପାଇଁ ଷ୍ଟାର୍ଟଅପ ଓଡ଼ିଶା ଦ୍ୱାରା କ୍ରମରେ ରହିଥିବା ଅନେକ କାର୍ଯ୍ୟକ୍ରମଗୁଡ଼ିକ ମଧ୍ୟରୁ ଅନ୍ୟତମ ।
Comments are closed.