ଭାରତ-ଇଂଲଣ୍ଡ ସେମିଫାଇନାଲ୍ ସମୟରେ ଜିଓହଟଷ୍ଟାର୍ରେ ନୂତନ ବିଶ୍ୱ ପ୍ରସାରଣ ରେକର୍ଡ ସୃଷ୍ଟି କଲା ଆଇସିସି ପୁରୁଷ ଟି-୨୦ ବିଶ୍ୱକପ୍ ୨୦୨୬
- ଭାରତ ବନାମ ଇଂଲଣ୍ଡ ସେମିଫାଇନାଲ୍ ମ୍ୟାଚ୍ରେ ଜିଓହଟଷ୍ଟାର୍ରେ ସର୍ବାଧିକ ୬୫.୨ ମିଲିୟନ୍ (୬.୫୨ କୋଟି) ଦର୍ଶକ ଏକାସାଙ୍ଗରେ ଦେଖିବାର ରେକର୍ଡ ହୋଇଛି।
- ଏହି ଦ୍ୱିତୀୟ ସେମିଫାଇନାଲ୍ ବିଶ୍ୱର ସବୁଠାରୁ ଅଧିକ ସିଧାପ୍ରସାରଣ ହୋଇଥିବା କାର୍ଯ୍ୟକ୍ରମ ପାଲଟିଛି।
- ଏହି ଡିଜିଟାଲ୍ ପ୍ଲାଟଫର୍ମରେ ସମୁଦାୟ ୬୧୯ ମିଲିୟନ୍ ଦର୍ଶନ ସଂଖ୍ୟା ରେକର୍ଡ କରାଯାଇଛି – ଯାହା ଯେକୌଣସି ଟି-୨୦ ମ୍ୟାଚ୍ ପାଇଁ ସର୍ବାଧିକ।
ଦୁବାଇ / ମୁମ୍ବାଇ/ ଭୁବନେଶ୍ବର :ଆଇସିସି ପୁରୁଷ ଟି-୨୦ ବିଶ୍ୱକପ୍ ୨୦୨୬ କ୍ରୀଡ଼ା, ଗଣମାଧ୍ୟମ ଏବଂ ସିଧାପ୍ରସାରଣ ଦୁନିଆରେ ନୂତନ ବିଶ୍ୱସ୍ତରୀୟ ମାନଦଣ୍ଡ ସ୍ଥାପନ କରିବା ଜାରି ରଖିଛି। ମାର୍ଚ୍ଚ ୫ ତାରିଖରେ ଅନୁଷ୍ଠିତ ଭାରତ ବନାମ ଇଂଲଣ୍ଡ ସେମିଫାଇନାଲ୍ ମ୍ୟାଚ୍ ଡିଜିଟାଲ୍ ଦର୍ଶକ ସଂଖ୍ୟା କ୍ଷେତ୍ରରେ ଏକ ଐତିହାସିକ ବିଶ୍ୱ କୀର୍ତ୍ତିମାନ ସ୍ଥାପନ କରିଛି।
ଭାରତର ପ୍ରମୁଖ ଷ୍ଟ୍ରିମିଂ ପ୍ଲାଟଫର୍ମ ଜିଓ ହଟଷ୍ଟାର୍, ଏହି ହାଇ-ଭୋଲଟେଜ୍ ମ୍ୟାଚ୍ ସମୟରେ ଏକାସାଙ୍ଗରେ ୬୫.୨ ନିୟୁତ ଦର୍ଶକଙ୍କ ସଂଖ୍ୟା ରେକର୍ଡ କରି ଏକ ଅଭୂତପୂର୍ବ ସଫଳତା ହାସଲ କରିଛି। ଏହା ବିଶ୍ୱର ଯେକୌଣସି ଡିଜିଟାଲ୍ ପ୍ଲାଟଫର୍ମରେ ଏକ ସିଧାପ୍ରସାରଣ କାର୍ଯ୍ୟକ୍ରମ ପାଇଁ ଏକକାଳୀନ ଦର୍ଶକ ସଂଖ୍ୟା କ୍ଷେତ୍ରରେ ଏକ ନୂଆ ବିଶ୍ୱ ରେକର୍ଡ ସ୍ଥାପନ କରିଛି। ଏହି ମ୍ୟାଚ୍ ଜିଓ ହଟଷ୍ଟାର୍ରେ ମୋଟ ୬୧୯ ନିୟୁତ ଭ୍ୟୁଜ୍ ସୃଷ୍ଟି କରିଛି, ଯାହା ଏହାକୁ ଇତିହାସର ସବୁଠାରୁ ଅଧିକ ଷ୍ଟ୍ରିମ୍ ହୋଇଥିବା ଟି-୨୦ ଆନ୍ତର୍ଜାତୀୟ ମ୍ୟାଚ୍ରେ ପରିଣତ କରିଛି।
ଏହି ରୋମାଞ୍ଚକର ପ୍ରତିଯୋଗିତା, ଯେଉଁଥିରେ ଦୁଇଟି ଯାକ ପାଳିକୁ ମିଶାଇ ମୋଟ ୪୯୯ ରନ୍ ସଂଗୃହିତ ହୋଇଥିଲା, ତାହା ଭାରତ ତଥା ଭାରତ ବାହାରେ ଥିବା ପ୍ରଶଂସକଙ୍କ ମନକୁ ବେଶ୍ ଆନ୍ଦୋଳିତ କରିଥିଲା। ଏହି ସମୟରେ ଏକକାଳୀନ ଦର୍ଶକଙ୍କ ସଂଖ୍ୟା ୨୦୨୪ ନଭେମ୍ବର ମାସରେ ଏକ ଆନ୍ତର୍ଜାତୀୟ ପ୍ରସାରଣ ମଞ୍ଚ ଦ୍ୱାରା ସ୍ଥାପିତ ହୋଇଥିବା ୬୫ ନିୟୁତର ପୁରାତନ ବିଶ୍ୱ ରେକର୍ଡକୁ ଅତିକ୍ରମ କରିଯାଇଥିଲା, ଯାହା ବିଭିନ୍ନ ବଜାରର ସମ୍ମିଳିତ ଦର୍ଶକଙ୍କୁ ନେଇ ସମ୍ଭବ ହୋଇଥିଲା। କିନ୍ତୁ ଜିଓ-ହଟଷ୍ଟାରର ଏହି ନୂତନ କୀର୍ତ୍ତିମାନ କେବଳ ଗୋଟିଏ ବଜାରର ଦର୍ଶକଙ୍କ ଦ୍ୱାରା ସୃଷ୍ଟି ହୋଇଛି, ଯାହା ସିଧାପ୍ରସାରଣ କ୍ଷେତ୍ରରେ ଏହାର ବିଶ୍ୱସ୍ତରୀୟ ନେତୃତ୍ୱ ଏବଂ ଅତ୍ୟଧିକ ଚାହିଦା ସମୟରେ ମଧ୍ୟ ସହଜ ଓ ନିରନ୍ତର ପ୍ରସାରଣ କରିବାର ଦକ୍ଷତାକୁ ପ୍ରମାଣିତ କରୁଛି। ଏହି ରେକର୍ଡ ଏକ ପ୍ରମୁଖ ଆନ୍ତର୍ଜାତୀୟ କ୍ରିକେଟ ପରିଷଦର ପ୍ରତିଯୋଗିତା ସୃଷ୍ଟିକରୁଥିବା ବ୍ୟାପକ ସଂଯୋଗର ଶକ୍ତିକୁ ମଧ୍ୟ ଦର୍ଶାଉଛି, ଯାହା ଭାରତୀୟ ଦଳର ଲୋକପ୍ରିୟତା, ଏକ “ଜିତିବା ଅନିର୍ବାର୍ଯ୍ୟ” ଥିବା ସେମିଫାଇନାଲର ଗୁରୁତ୍ୱ ଏବଂ ପ୍ରଶଂସକଙ୍କୁ ଯୋଡ଼ିବା ପାଇଁ ନିଆଯାଇଥିବା ବଡ଼ ଧରଣର ପଦକ୍ଷେପ ଯୋଗୁଁ ସମ୍ଭବପର ହୋଇପାରିଛି।
ଲିନିୟର ଟେଲିଭିଜନ ଏବଂ ଡିଜିଟାଲ ମାଧ୍ୟମଗୁଡ଼ିକୁ ମିଶାଇ, ଏହି ସେମି-ଫାଇନାଲ ମ୍ୟାଚ୍କୁ ୩୨ କୋଟିରୁ ଅଧିକ ଦର୍ଶକ ଦେଖିଥିଲେ। ଅନ୍ୟପଟେ, ବିଭିନ୍ନ ପରଦାରେ ଏହାର ମୋଟ ଦର୍ଶନ-ସମୟ ୨୩୦୦ କୋଟି ମିନିଟ୍ ଅତିକ୍ରମ କରିଛି, ଯାହା ଏହାକୁ ଏପର୍ଯ୍ୟନ୍ତର ସବୁଠାରୁ ଅଧିକ ଦେଖାଯାଇଥିବା ଆନ୍ତର୍ଜାତୀୟ ଟି-୨୦ ମ୍ୟାଚ୍ରେ ପରିଣତ କରିଛି।
ଆଇସିସି ଅଧ୍ୟକ୍ଷ ଜୟ ଶାହ କହିଛନ୍ତି:“ଆଇସିସି ପୁରୁଷ ଟି-୨୦ ବିଶ୍ୱକପ୍ ଭାରତର କୋଟି କୋଟି କ୍ରିକେଟ୍ ପ୍ରେମୀଙ୍କୁ ଏକାଠି କରୁଥିବା ଦେଖିବା ଅତ୍ୟନ୍ତ ଆନନ୍ଦଦାୟକ। ଭାରତ ବନାମ ଇଂଲଣ୍ଡ ସେମିଫାଇନାଲ୍ ସମୟରେ ରେକର୍ଡ କରାଯାଇଥିବା ଏହି ଅସାଧାରଣ ସଂଖ୍ୟା କେବଳ କ୍ରିକେଟ୍ ପ୍ରେମୀଙ୍କ ଉତ୍ସାହକୁ ଦର୍ଶାଉନାହିଁ, ବରଂ ଖେଳକୁ ସବୁଠି ଦର୍ଶକଙ୍କ ପାଇଁ ଅଧିକ ଆକର୍ଷଣୀୟ କରିବା ଦିଗରେ ହେଉଥିବା ଅଦ୍ଭୁତପୂର୍ବ ପ୍ରଗତିକୁ ମଧ୍ୟ ପ୍ରମାଣିତ କରୁଛି। ଏହି ବିଶ୍ୱକପ୍ କେବଳ ପଡ଼ିଆରେ ଖେଳାଯାଇଥିବା ମ୍ୟାଚ୍ ପାଇଁ ନୁହେଁ, ବରଂ ଯେଉଁଭଳି ଭାବରେ କୋଟି କୋଟି ପ୍ରଶଂସକ ଏହି କ୍ରୀଡ଼ାକୁ ପାଳନ କରିବା ପାଇଁ ଏକାଠି ହେଲେ, ସେଥିପାଇଁ ମଧ୍ୟ ସ୍ମରଣୀୟ ହୋଇ ରହିବ।” ଜିଓଷ୍ଟାର୍ର ଉପାଧ୍ୟକ୍ଷ ଉଦୟ ଶଙ୍କର କହିଛନ୍ତି: “ଏହା ଜିଓଷ୍ଟାର୍ର ବୈଷୟିକ ଏବଂ ସୃଜନଶୀଳ ଶ୍ରେଷ୍ଠତା ଏବଂ କ୍ରିକେଟ୍ ଖେଳକୁ ଆହୁରି ବ୍ୟାପକ କରିବା ପାଇଁ ଆନ୍ତର୍ଜାତୀୟ କ୍ରିକେଟ ପରିଷଦର ପ୍ରତିବଦ୍ଧତାର ପ୍ରମାଣ। ଗୁରୁବାର ଅନୁଷ୍ଠିତ ଦ୍ୱିତୀୟ ସେମିଫାଇନାଲ୍ ମ୍ୟାଚ୍କୁ ପ୍ରତି ତିନିଜଣ ଭାରତୀୟଙ୍କ ମଧ୍ୟରୁ ଜଣେ ଦେଖିଥିଲେ ଏବଂ ଯେତେବେଳେ କୋଟି କୋଟି ଲୋକ ଖେଳ ଦେଖିବା ପାଇଁ ଏକତ୍ରିତ ହୁଅନ୍ତି, ସେତେବେଳେ ଶ୍ରେଷ୍ଠ ବୈଷୟିକ ଜ୍ଞାନକୌଶଳର ଆବଶ୍ୟକତା ପଡ଼ିଥାଏ। ଭବିଷ୍ୟତର ମନୋରଞ୍ଜନ ଏହିଭଳି ଦୃଶ୍ୟମାନ ହେବ।” ଉଭୟ ପକ୍ଷର ଚମତ୍କାର ପ୍ରଦର୍ଶନ ଯୋଗୁଁ, ଏହି ଖେଳ ସମୟରେ ୬୧.୯ କୋଟି ଦର୍ଶନ ସଂଖ୍ୟା ପଞ୍ଜିକୃତ ହୋଇଛି, ଯାହା ୨୦୨୪ ଆନ୍ତର୍ଜାତୀୟ ଟି-୨୦ ବିଶ୍ୱକପ୍ର ଚୂଡ଼ାନ୍ତ ମ୍ୟାଚ୍ରେ ସୃଷ୍ଟି ହୋଇଥିବା ୫୩.୩ କୋଟି ଦର୍ଶନର ସଂଖ୍ୟାକୁ ଅତିକ୍ରମ କରିଛି। ଚୂଡ଼ାନ୍ତ ମ୍ୟାଚ୍ ବାକି ଥିଲେ ମଧ୍ୟ, ୨୦୨୬ ଆନ୍ତର୍ଜାତୀୟ ପୁରୁଷ ଟି-୨୦ ବିଶ୍ୱକପ୍ ପୂର୍ବରୁ ହିଁ ଅନ୍ତର୍ଜାଲ ଭିତ୍ତିକ ଏବଂ ପ୍ରସାରଣ ମାଧ୍ୟମଗୁଡ଼ିକରେ ବହୁମାତ୍ରାରେ ପହଞ୍ଚ ଏବଂ ଜନସାଧାରଣଙ୍କ ସମ୍ପୃକ୍ତି ପାଇଁ ଅନେକ ନୂତନ ମାଇଲଖୁଣ୍ଟ ସ୍ଥାପନ କରିସାରିଛି। ଆସନ୍ତା ୮ ମାର୍ଚ୍ଚରେ ଅହମ୍ମଦାବାଦର ନରେନ୍ଦ୍ର ମୋଦୀ କ୍ରୀଡ଼ାଙ୍ଗନରେ ଅନୁଷ୍ଠିତ ହେବାକୁ ଥିବା ୨୦୨୬ ଆନ୍ତର୍ଜାତୀୟ ପୁରୁଷ ଟି-୨୦ ବିଶ୍ୱକପ୍ ଚୂଡ଼ାନ୍ତ ମ୍ୟାଚ୍ରେ ଭାରତ, ନ୍ୟୁଜିଲାଣ୍ଡର ସମ୍ମୁଖୀନ ହେବ। ପ୍ରଶଂସକମାନେ ଜିଓହଟଷ୍ଟାର ଏବଂ ଷ୍ଟାର୍ ସ୍ପୋର୍ଟସ୍ ନେଟୱାର୍କରେ ଏହି ସମସ୍ତ ଖେଳର ସିଧାପ୍ରସାରଣ ଦେଖିପାରିବେ।
Comments are closed.