ବଲିଉଡ୍ ଅଭିନେତା ସୈଫ୍ ଅଲ୍ଲୀ ଖାନ୍ ଏବଂ ପ୍ରଭାସଙ୍କର ଆଗାମୀ ଫିଲ୍ମ ‘ଆଦିପୁରୁଷ’ର ସୁଟିଂ ସେଟ୍ ରେ ମଙ୍ଗଳବାର ଦିନ ନିଆଁ ଲାଗିଯାଇଥିଲା । ଗୋରେଗାଓଁ ସ୍ଥିତ ଫିଲ୍ମ ସେଟ୍ ରେ ଯେତେବେଳେ ଅଗ୍ନିକାଣ୍ଡ ଘଟିଥିଲା ସେତେବେଳେ ସେଠାରେ ପାଖାପାଖି ୫୦ରୁ ୬୦ ଜଣ ଉପସ୍ଥିତ ଥିଲେ । ପ୍ରଭାସ ଏବଂ ସୈଫ୍ ଅଲ୍ଲୀ ଖାନ୍ ସୁଟିଂ ବେଳେ ନଥିଲେ । ‘ଆଦିପୁରୁଷ’ ର ସେଟରେ ଲାଗିଥିବା ନିଆଁର ଭିଡିଓ ସୋସିଆଲ ମିଡିଆରେ ବେଶ୍ ଭାଇରାଲ ହେବାରେ ଲାଗିଛି । ଅଗ୍ନିଶମ ବାହିନୀ କର୍ମଚାରୀ ନିଆଁକୁ କାବୁ କରିଥିବା ଏହି ଭିଡିଓରେ ଦେଖିବାକୁ ମିଳିଛି। ଅଗ୍ନିକାଣ୍ଡରେ କାହାର କୌଣସି କ୍ଷତି ହୋଇନାହିଁ ।
ଫିଲ୍ମ ‘ଆଦିପୁରୁଷ’ ର ସେଟ୍ ରେ ଲାଗିଥିବା ନିଆଁକୁ କାବୁ କରିବା ପାଇଁ ମୁମ୍ବାଇ ଅଗ୍ନିଶମବାହିନୀର ୮ଟି ଗାଡି, ୫ଟି ଜମ୍ବୋ ଟ୍ୟାଙ୍କର, ଗୋଟିଏ ପାଣି ଟ୍ୟାଙ୍କର ଏବଂ ଜେସିବି ପଠାଯାଇଥିଲା । ନିଆଁକୁ ଆୟତ କରାଯାଇ ସ୍ଥିତିକୁ ନିୟନ୍ତ୍ରଣରେ ରଖାଯାଇଛି । ଏହି ଘଟଣାରେ କେହି ଆହତ ହେବାର ସୂଚନା ମଧ୍ୟ ମିଳିନାହିଁ । ନିଆଁ ଲାଗିବାର କାରଣ ସର୍ଟ ସର୍କିଟ୍ ହୋଇଥାଇପାରେ ବୋଲି ଅନୁମାନ କରାଯାଉଛି । କିନ୍ତୁ ଅଧିକାରୀଙ୍କ ପକ୍ଷରୁ ଏ ପର୍ଯ୍ୟନ୍ତ କୌଣସି ସୂଚନା ମିଳିନାହିଁ ।
ଫିଲ୍ମରେ ପ୍ରଭାସଙ୍କୁ ଆଦିପୁରୁଷ ଭୂମିକାରେ ଦେଖିବାକୁ ମିଳିବ । ରାବଣ ଭୂମିକାରେ ସୈଫ୍ ଅଲ୍ଲୀ ଖାନ୍ ନଜର ଆସିବେ । ଏହି ଫିଲ୍ମ ହିନ୍ଦୀ ଏବଂ ତେଲୁଗୁରେ ସୁଟିଂ କରାଯିବ। ତାମିଲ, ମାଲାୟାଲମ୍, କନ୍ନଡ଼ ଏବଂ ଅନ୍ୟ ଭାଷାରେ ମଧ୍ୟ ଏହି ଫିଲ୍ମ ରିଲିଜ ହେବ । ଆଦିପୁରୁଷ ୨୦୨୨ରେ ରିଲିଜ୍ ହେବ ବୋଲି ସୂଚନା ମିଳୁଛି ।
Comments are closed.