ଟିପିଡବ୍ଲୁଓଡିଏଲ୍ ପକ୍ଷରୁ ୧୦.୭୧ ଲକ୍ଷ ବିଦ୍ୟୁତ୍ ଉପଭୋକ୍ତାଙ୍କ ବିଦ୍ୟୁତ୍ ବିଲରେ ୭୨.୦୫ କୋଟି ଟଙ୍କା ରିହାତି ପ୍ରଦାନ କରାଗଲା

ବୁର୍ଲା, ୨୮ ଜୁଲାଇ, ୨୦୨୫: ଉତ୍କୃଷ୍ଠ ଗ୍ରାହକ ସେବାର ଏକ ପ୍ରମୁଖ ପଦକ୍ଷେପ ସ୍ୱରୂପ, ପଶ୍ଚିମ ଓଡ଼ିଶା ବିଦ୍ୟୁତ୍ ବିତରଣ କମ୍ପାନୀ ଟିପିଡବ୍ଲୁଓଡିଏଲ୍ ପକ୍ଷରୁ ଗତ ୨୦୨୪-୨୫ ଆର୍ଥିକ ବର୍ଷ ପାଇଁ ପଶ୍ଚିମ ଓଡ଼ିଶାର ୧୦.୭୧ ଲକ୍ଷ ବିଦ୍ୟୁତ୍ ଉପଭୋକ୍ତାଙ୍କ ବିଦ୍ୟୁତ୍ ବିଲରେ ମୋଟ ୭୨.୦୫ କୋଟି ଟଙ୍କାର ରିହାତି ପ୍ରଦାନ କରାଯାଇଅଛି । ମାନ୍ୟବର ଓଡ଼ିଶା ବିଦ୍ୟୁତ୍ ନିୟାମକ ଆୟୋଗ (OERC)ଙ୍କ ନିର୍ଦ୍ଦେଶ ଅନୁଯାୟୀ, ବିଦ୍ୟୁତ୍ ଉପଭୋକ୍ତାଙ୍କ ସୁରକ୍ଷା ଜମା ରାଶି (Security deposit)ର ସୁଧ ବାବଦକୁ ଏହି ରିହାତି ଗତ ଜୁନ ମାସର ବିଦ୍ୟୁତ୍ ବିଲରେ ପ୍ରଦାନ କରାଯାଇଅଛି ।

ସୂଚନାଯୋଗ୍ୟ ପଶ୍ଚିମ ଓଡ଼ିଶାର ସମସ୍ତ ୯ଟି ଜିଲ୍ଲାର ବିଦ୍ୟୁତ୍ ଉପଭୋକ୍ତାଙ୍କ ଜୁନ ମାସର ବିଦ୍ୟୁତ୍ ବିଲରେ ଏହି ରିହାତି ପ୍ରଦାନ କରାଯାଇଅଛି । ଏହି ପଦକ୍ଷେପ ଗ୍ରାହକ ସେବା ଏବଂ ନିୟମ ଅନୁପାଳନ ପ୍ରତି କମ୍ପାନୀର ନିରନ୍ତର ପ୍ରତିବଦ୍ଧତାକୁ ପ୍ରତିଫଳିତ କରେ । ତଥ୍ୟ ଅନୁଯାଇ, ସର୍ବାଧିକ ୨୫.୨୦ କୋଟି ଟଙ୍କାର ରିହାତି ଝାରସୁଗୁଡ଼ା ଜିଲ୍ଲାର ୧ ଲକ୍ଷ ୦୮ ହଜାର ୪୭୪ ଜଣ ବିଦ୍ୟୁତ୍ ଉପଭୋକ୍ତାଙ୍କ ବିଦ୍ୟୁତ୍ ବିଲରେ ପ୍ରଦାନ କରାଯାଇଥିବା ବେଳେ ସୁନ୍ଦରଗଡରେ ୨୩.୮୨ କୋଟି ଟଙ୍କାର ରିହାତି ପ୍ରଦାନ କରାଯାଇଛି, ଯାହା ୨ ଲକ୍ଷ ୪୮ ହଜାର ୦୧୨ ଜଣ ବିଦ୍ୟୁତ୍ ଉପଭୋକ୍ତାଙ୍କୁ ଲାଭାନ୍ୱିତ କରିଅଛି । ସେହିପରି ସମ୍ବଲପୁର ଜିଲ୍ଲାରେ ୧ ଲକ୍ଷ ୨୬ ହଜାର ୮୫୦ ଜଣ ବିଦ୍ୟୁତ୍ ଉପଭୋକ୍ତାଙ୍କ ବିଦ୍ୟୁତ୍ ବିଲରେ ୮.୮୨ କୋଟି ଟଙ୍କା ରିହାତି ପ୍ରଦାନ କରାଯାଇଥିବା ବେଳେ ବରଗଡ ଜିଲ୍ଲାର ୧ ଲକ୍ଷ ୮୭ ହଜାର ୧୯୫ ଜଣ ବିଦ୍ୟୁତ୍ ଉପଭୋକ୍ତାଙ୍କ ବିଦ୍ୟୁତ୍ ବିଲରେ ୩.୭୦ କୋଟି ଟଙ୍କା ରିହାତି ମିଳିଛି ।

ସେହିପରି କଳାହାଣ୍ଡି ଜିଲ୍ଲାର ଏକ ଲକ୍ଷ ୧୭ ହଜାର ୧୮୮ ଜଣ ବିଦ୍ୟୁତ୍ ଉପଭୋକ୍ତାଙ୍କ ବିଦ୍ୟୁତ୍ ବିଲରେ ୩.୮୮ କୋଟି ଟଙ୍କା, ବଲାଙ୍ଗିର ଜିଲ୍ଲାର ୧ ଲକ୍ଷ ୫୨ ହଜାର ୨୫୯ ଜଣ ବିଦ୍ୟୁତ୍ ଉପଭୋକ୍ତାଙ୍କ ବିଦ୍ୟୁତ୍ ବିଲରେ ୩.୨୭ କୋଟି ଟଙ୍କା, ସୋନପୁର ଜିଲ୍ଲାର ୪୮ ହଜାର ୯୭୬ ଜଣ ବିଦ୍ୟୁତ୍ ଉପଭୋକ୍ତାଙ୍କ ବିଦ୍ୟୁତ୍ ବିଲରେ ୧.୭୦ କୋଟି ଟଙ୍କା, ନୂଆପଡ଼ା ଜିଲ୍ଲାର ୫୨ ହଜାର ୭୧୪ ଜଣ ବିଦ୍ୟୁତ୍ ଉପଭୋକ୍ତାଙ୍କ ବିଦ୍ୟୁତ୍ ବିଲରେ ୧.୨୩ କୋଟି ଟଙ୍କା ରିହାତି ପ୍ରଦାନ କରାଯାଇଅଛି ।

ପ୍ରକାଶଥାଉ କି, ଟିପିଡବ୍ଲୁଓଡିଏଲ୍ ଏକ ଟାଟା ସମୁହ ସଂସ୍ଥାର ଅଂଶୀଦାର ଭାବରେ ଏହାର ସମସ୍ତ କାର୍ଯ୍ୟରେ ସ୍ୱଚ୍ଛତା ଏବଂ ଗ୍ରାହକ ସେବାକୁ ପ୍ରାଥମିକତା ଦେବା ନିରନ୍ତର ଭାବରେ ବଜାୟ ରଖିଛି । କମ୍ପାନୀ କେନ୍ଦ୍ର ଏବଂ ରାଜ୍ୟ ସରକାରଙ୍କ ସହିତ ମାନ୍ୟବର ବିଦ୍ୟୁତ ନିୟାମକ ଆୟୋଗଙ୍କ ନିର୍ଦ୍ଦେଶକୁ ସମ୍ପୂର୍ଣ୍ଣ ଭାବରେ ପାଳନ କରିଥାଏ । ଗ୍ରାହକ ସେବାର ପ୍ରମୁଖ ପଦକ୍ଷେପଗୁଡ଼ିକ ମଧ୍ୟରେ ମାସିକ ବିଲିଂ, ଡିଜିଟାଲ ପେମେଣ୍ଟ ଏବଂ ସମୟାନୁସାରେ ଗ୍ରାହକ ରିହାତି ଅନ୍ତର୍ଭୁକ୍ତ ରହିଛି ।

ଏହି ପଦକ୍ଷେପ ବିଷୟରେ ଟିପିଡବ୍ଲୁଓଡିଏଲର ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ ଶ୍ରୀଯୁକ୍ତ ପ୍ରବୀଣ ବର୍ମା କହିଛନ୍ତି, “ଆମେ ଆମର ସମସ୍ତ ବ୍ୟବସାୟିକ କାର୍ଯ୍ୟଶୈଳୀରେ ସ୍ୱଚ୍ଛତା ବଜାୟ ରଖିଅଛୁ । ଏଥିସହ ଯେପରି ଆମର ସମସ୍ତ ବିଦ୍ୟୁତ୍ ଉପଭୋକ୍ତାମାନେ ସମସ୍ତ ନିୟାମକ ବ୍ୟବସ୍ଥାରୁ ଉପକୃତ ହେବେ, ତାହା ନିଶ୍ଚିତ କରୁଅଛୁ । ଆମେ ଗ୍ରାହକସେବାରେ ଉନ୍ନତି ଏବଂ ସେବାର ସର୍ବୋଚ୍ଚ ମାନଦଣ୍ଡ ବଜାୟ ରଖିବା ପ୍ରଚେଷ୍ଟା ଜାରି ରଖିଛୁ।” ଟିପିଡବ୍ଲୁଓଡିଏଲ୍ ସମଗ୍ର ପଶ୍ଚିମ ଓଡ଼ିଶାରେ ବିଦ୍ୟୁତ ବଣ୍ଟନ କ୍ଷେତ୍ରରେ ନବସୃଜନ ଏବଂ ଗ୍ରାହକ-କୈନ୍ଦ୍ରିକ ସେବା ପ୍ରଚଳନ କରିବା ଉପରେ ଧ୍ୟାନ କେନ୍ଦ୍ରିତ କରୁଅଛି ।