ବ୍ରାହ୍ମଣୀପାଳରେ ଟାଟା ଷ୍ଟିଲ ଫାଉଣ୍ଡେସନର ଡିଜିଟାଲ ସାକ୍ଷରତା କାର୍ଯ୍ୟକ୍ରମ ‘କୌଶଲ୍ୟାନ’ ସମ୍ପାଦିତ

ଟାଟା ଷ୍ଟିଲ ଫାଉଣ୍ଡେସନ, ଏଚପି ଏବଂ ସୋସାଇଟି ଫର ଅଲ ରାଉଣ୍ଡ ଡେଭଲପମେଣ୍ଟ (ଏସଏଆରଡି)ର ମିଳିତ ଉଦ୍ୟମରେ ବ୍ରାହ୍ମଣୀପାଳର ଟମକା ସ୍ଥିତ ସରକାରୀ ହାଇସ୍କୁଲର ୧୪୩ ଜଣ ଛାତ୍ରଛାତ୍ରୀ ‘କୌଶଲ୍ୟାନ ପ୍ରୋଜେକ୍ଟ’ ଅଧୀନରେ ତିନି ମାସର ଡିଜିଟାଲ ଦକ୍ଷତା ପାଠ୍ୟକ୍ରମ ଶେଷ କରିଛନ୍ତି। ଗ୍ରାମୀଣ ଏବଂ ଆଦିବାସୀ ସମ୍ପ୍ରଦାୟର ଛାତ୍ରଛାତ୍ରୀମାନଙ୍କୁ ଅତ୍ୟାବଶ୍ୟକ କମ୍ପ୍ୟୁଟର ଦକ୍ଷତା ସହିତ ସଶକ୍ତ କରିବା, ସେମାନଙ୍କୁ ସେମାନଙ୍କ ଉଜ୍ୱଳ ଭବିଷ୍ୟତ ଏବଂ ନିଯୁକ୍ତି ସୁଯୋଗ ପ୍ରଦାନ କରିବା ଏହି ପଦକ୍ଷେପର ଲକ୍ଷ୍ୟ।

ଏହି ଅବସରରେ ଟାଟା ଷ୍ଟିଲର ଫେରୋ ଆଲୋଇ ପ୍ଲାଣ୍ଟ (ବ୍ରାହ୍ମଣୀପାଳ)ର ମୁଖ୍ୟ ଆଦର୍ଶ ଅଗ୍ରୱାଲ, ଦେଉଳକଣ ଗ୍ରାମ ପଞ୍ଚାୟତର ସରପଞ୍ଚ ବିଜୟ କୁମାର ଜେନା, କିଆଝର ଗ୍ରାମ ପଞ୍ଚାୟତର ସରପଞ୍ଚ ରାଜଲକ୍ଷ୍ମୀ ମହାପାତ୍ର, ସମାଜସେବୀ ନରୋତ୍ତମ ବେହେରା, ଟିଏସଏଫ ଓ ଏସଏଆରଡି ଫିଲ୍ଡ ଟିମ୍ ସଦସ୍ୟମାନେ ଉପସ୍ଥିତ ଥିଲେ। ଏହି ପାଠ୍ୟକ୍ରମରେ ଉଲ୍ଲେଖନୀୟ ପ୍ରଦର୍ଶନ କରିଥିବା ୧୦ ଜଣ ଛାତ୍ରଛାତ୍ରୀଙ୍କୁ ସମ୍ମାନିତ କରାଯାଇଥିବା ବେଳେ ଏହି ଅବସରରେ ସମସ୍ତ ଛାତ୍ରଛାତ୍ରୀଙ୍କୁ ‘ପାଠ୍ୟକ୍ରମ ସମାପନ ପ୍ରମାଣପତ୍ର’ ପ୍ରଦାନ କରାଯାଇଥିଲା।

ବିସ୍ତୃତ ତିନି ମାସର ପ୍ରଶିକ୍ଷଣରେ ଏମଏସ ଅଫିସ (ଏକ୍ସେଲ୍‌, ୱାର୍ଡ, ପାୱାରପଏଣ୍ଟ), ଇଣ୍ଟରନେଟ୍ ନେଭିଗେସନ୍ ଏବଂ ୟୁଟ୍ୟୁବ୍‌, ଜିମେଲ୍‌, ଷ୍ଟଡି ଆପ୍ଲିକେସନ ଏବଂ ବିଭିନ୍ନ ସୋସିଆଲ ମିଡିଆ ପ୍ଲାଟଫର୍ମ ଭଳି ଲୋକପ୍ରିୟ ଆପ୍ଲିକେସନ୍ ରେ ମୌଳିକ କମ୍ପ୍ୟୁଟର ଧାରଣା ପ୍ରଦାନ କରାଯାଇଥିଲା। ଶିକ୍ଷାଗତ ପାଠ୍ୟକ୍ରମ ସହିତ, ଛାତ୍ରଛାତ୍ରୀମାନେ ନୂତନ ଯୁଗର ଟେକ୍ନୋଲୋଜି ବିଷୟରେ ଅଭିଜ୍ଞତା ହାସଲ କରିଥିଲେ, ଯାହା ସେମାନଙ୍କ ପାଇଁ ବର୍ତ୍ତମାନର ଡିଜିଟାଲ୍ ଦୁନିଆରେ ଉଭୟ ଶୈକ୍ଷିକ ଏବଂ ବ୍ୟକ୍ତିଗତ ଅଭିବୃଦ୍ଧି କ୍ଷେତ୍ରରେ ସହାୟକ ହେବ।

‘କୌଶଲ୍ୟାନ ପ୍ରୋଜେକ୍ଟ’ ଅଧୀନରେ ଭ୍ରାମ୍ୟମାଣ କମ୍ପ୍ୟୁଟର ଲ୍ୟାବ୍ ବିଦ୍ୟାଳୟ ଓ ଗ୍ରାମ ପଞ୍ଚାୟତରେ ପହଞ୍ଚି ବିଶେଷକରି ନବମରୁ ଦ୍ୱାଦଶ ଶ୍ରେଣୀ ପର୍ଯ୍ୟନ୍ତ ଛାତ୍ରଛାତ୍ରୀମାନଙ୍କ ଜୀବନ ଓ ଜୀବିକା ପାଇଁ ଆବଶ୍ୟକ ଡିଜିଟାଲ୍ ଦକ୍ଷତା ପ୍ରଦାନ କରିବା ନେଇ ସୁନିଶ୍ଚିତ କରୁଛି। ଏହି କାର୍ଯ୍ୟକ୍ରମ କେବଳ ଡିଜିଟାଲ ପ୍ରଶିକ୍ଷଣ ଭିତ୍ତିଭୂମିକୁ ସୁଦୃଢ଼ କରେ ନାହିଁ ବରଂ ଛାତ୍ରଛାତ୍ରୀଙ୍କ ଉପସ୍ଥାନ ଏବଂ ଉତ୍ସାହ ବୃଦ୍ଧି ସହିତ ଦୀର୍ଘକାଳୀନ ଶିକ୍ଷାଗତ ଯୋଗାଯୋଗକୁ ମଧ୍ୟ ସୁନିଶ୍ଚିତ କରେ, ଯାହା ଅଧାରୁ ପାଠ ଛାଡୁଥିବା ପିଲାଙ୍କ ସଂଖ୍ୟା ହ୍ରାସ କରିବାରେ ସାହାଯ୍ୟ କରୁଛି। ଏଥି ସହିତ ଭ୍ରାମ୍ୟମାଣ କମ୍ପ୍ୟୁଟର ଲ୍ୟାବ୍ ଓ କ୍ଲାସରୁମ୍ ଅନ୍ ହ୍ୱିଲ୍ ଦୁର୍ଗମ ଗ୍ରାମୀଣ ଓ ଆଦିବାସୀ ଅଂଚଳର ଯୁବପିଢ଼ିଙ୍କ ପାଇଁ ଡିଜିଟାଲ ସାକ୍ଷରତା ଉପଲବ୍ଧ କରାଇବା ପାଇଁ ଲକ୍ଷ୍ୟ ରଖିଛି।