ଶ୍ରେଷ୍ଠ ସମନ୍ୱିତ ଜଳ ପରିଚାଳନା ପାଇଁ ଟାଟା ଷ୍ଟିଲର ଏଫ୍‌ଏଏମଡି ପୁରସ୍କୃତ

ନୂଆଦିଲ୍ଲୀ/ଭୁବନେଶ୍ୱର, ୦୨/୦୪/୨୦୨୫: ‘ବେଷ୍ଟ ଇଂଟିଗ୍ରେଟେଡ ୱାଟର ମ୍ୟାନେଜମେଂଟ ପ୍ରୋଜେକ୍ଟ’ (ଶ୍ରେଷ୍ଠ ସମନ୍ୱିତ ଜଳ ପରିଚାଳନା ପ୍ରକଳ୍ପ) ପାଇଁ ପୁରସ୍କୃତ ହୋଇଛି ଟାଟା ଷ୍ଟିଲର ଫେରୋ ଆଲୟଜ ଆଣ୍ଡ ମିନେରାଲ୍ସ ଡିଭିଜନ (ଏଫଏଏମଡି)। ନୂଆଦିଲ୍ଲୀଠାରେ ଅନୁଷ୍ଠିତ ୱାଟର ଡାଇଜେଷ୍ଟ ୱାର୍ଲଡ ୱାଟର ଆୱାର୍ଡସ- ୨୦୨୫ରେ ଏଫଏଏମଡିକୁ ଏହି ସମ୍ମାନଜନକ ପୁରସ୍କାର ମିଳିଛି। ଭାରତ ସରକାରଙ୍କ ଜଳ ଶକ୍ତି ମନ୍ତ୍ରଣାଳୟର ମାନ୍ୟବର ରାଷ୍ଟ୍ରମନ୍ତ୍ରୀ ରାଜଭୂଷଣ ଚୌଧୁରୀ ଏହି କାର୍ଯ୍ୟକ୍ରମରେ ମୁଖ୍ୟ ଅତିଥି ଭାବେ ଯୋଗ ଦେଇ ଟାଟା ଷ୍ଟିଲକୁ ସମ୍ବର୍ଦ୍ଧିତ ଓ ପୁରସ୍କୃତ କରିଥିଲେ। ଟାଟାଷ୍ଟିଲ ଏଫ୍‌ଏଏମଡିର ପ୍ରକଳ୍ପ, ପ୍ରଯୁକ୍ତି ଓ ଇମ୍ପ୍ରୁଭମେଂଟ ମୁଖ୍ୟ ନତାଶା ଝା କମ୍ପାନି ତରଫରୁ ପୁରସ୍କାର ଗ୍ରହଣ କରିଥିଲେ।

ଭାରତର ପ୍ରିମିୟର ଜଳ ପତ୍ରିକା ‘ୱାଟର ଡାଇଜେଷ୍ଟ’ ପକ୍ଷରୁ ଆୟୋଜିତ ଏହି ସମାରୋହରେ ଜଳ ପରିଚାଳନା ପ୍ରକ୍ରିୟାରେ ଉନ୍ନତି ଏବଂ କାର୍ଯ୍ୟକ୍ଷେତ୍ରରେ ସ୍ଥାୟିତ୍ୱ ପାଇଁ ଟାଟା ଷ୍ଟିଲର ଅତ୍ୟାଧୁନିକ ଡିଜିଟାଲ ପ୍ରଯୁକ୍ତିର ବ୍ୟବହାରକୁ ସ୍ୱୀକୃତି ଦିଆଯିବା ସହ କମ୍ପାନିକୁ ଏହି ପୁରସ୍କାର ପ୍ରଦାନ କରାଯାଇଛି। ଜଳ ଯୋଦ୍ଧା ଓ ସେମାନଙ୍କ ସଫଳତାକୁ ସେଲିବ୍ରେଟ କରିବା ଲାଗି ଏହି କାର୍ଯ୍ୟକ୍ରମ ଆୟୋଜନ କରାଯାଇଥିଲା।

ଏ ନେଇ ଟାଟାଷ୍ଟିଲ (ଏଫଏଏମଡି)ର ଏକଜିକ୍ୟୁଟିଭ ଇନ ଚାର୍ଜ ପଙ୍କଜ ସତିଜା କହିଛନ୍ତି, ‘ଭାରତ ହେଉଛି ଜଳାଭାବର ଏକ ଦେଶ ଏବଂ କୃଷି, ଗୋଷ୍ଠୀ ଓ ଶିଳ୍ପ ସମେତ ବିଭିନ୍ନ କ୍ଷେତ୍ର ଏହି ନିଅଣ୍ଟ ସମ୍ବଳ ପାଇବାକୁ ପ୍ରତିଦ୍ୱନ୍ଦ୍ୱିତା କରୁଛନ୍ତି। ଜଳ ଉପଯୋଗିତା କମ୍ କରିବା ଲାଗି ଆମେ ଆମ ତରଫରୁ ଉଦ୍ୟମ କରୁଛୁ। ଏହି ଯାତ୍ରାରେ ଅଭିନବ ଡିଜିଟାଲ ସମାଧାନ ଗ୍ରହଣ କରିବା ଦିଗରେ ଆମ ପ୍ରତିବଦ୍ଧତା ଓ ଉଦ୍ୟମକୁ ସ୍ୱୀକୃତି ମିଳିଥିବାରୁ ଆମେ ବହୁତ ଖୁସି।’’
କମର୍ଦ୍ଦା ଓ ସାରୁଆବିଲ ଖଣିରେ ସେଂଟ୍ରାଲ ଏଫ୍ଲୁଏଂଟ ଟ୍ରିଟମେଂଟ ପ୍ଲାଂଟ (ସିଇଟିପି), ଓଡ଼ିଶାର ଯାଜପୁର ଜିଲ୍ଲାର ସୁକିନ୍ଦା ଖଣିରେ ଏଫ୍ଲୁଏଂଟ ଟ୍ରିଟମେଂଟ ପ୍ଲାଂଟ (ଇଟିପି) ଓ ସ୍ୱିରେଜ ଟ୍ରିଟମେଂଟ ପ୍ଲାଂଟ (ଏସଟିପି) ଭଳି ଅଭିଯାନ କମ୍ପାନିର ପ୍ରତିବଦ୍ଧତାକୁ ଦର୍ଶାଉଛି, ଯାହା ବର୍ଜ୍ୟଜଳର ଟ୍ରିଟମେଂଟ ଓ ପୁନଃବ୍ୟବହାର ସୁନିଶ୍ଚିତ କରୁଛି।

କେନ୍ଦୁଝରର ଯୋଡ଼ାରେ ଥିବା ଫେରୋ ଆଲୟଜ କାରଖାନା (ଏଫଏପି)ରେ ଜଳ ଉପଯୋଗିତା କମ କରିବା ଲାଗି ଅଭିନବ ପଦକ୍ଷେପ କାର୍ଯ୍ୟକାରୀ କରାଯାଇଛି। ସ୍କ୍ରବର ପୋଖରୀ ଓ ଏଫ୍ଲୁଏଂଟ ଟ୍ରିଟମେଂଟ ପ୍ଲାଂଟରେ ଟ୍ରିଟମେଂଟ ହେଉଥିବା ଜଳକୁ ବ୍ୟବହାର କରି ଏହି କାରଖାନା ଭୂପୃଷ୍ଠର ମଧୁର ଜଳ ଉପରେ କମ୍ ନିର୍ଭରଶୀଳ ହେବା ସହ ଜଳ ଉପଯୋଗିତାରେ ୪୦ ପ୍ରତିଶତରୁ ଅଧିକ ହ୍ରାସ କରିଛି। ସେହିପରି, ଏଫଏଏମଡି ତରଫରୁ ଏହାର କଟକ ଜିଲ୍ଲା ଆଠଗଡ଼ରେ ଥିବା ଏଫଏପି ଜଳ ବ୍ୟବହାର ଦକ୍ଷତାରେ ଉନ୍ନତି ଆଣିବା ପାଇଁ ଆଇଓଟି ଭତ୍ତିକ ସ୍ମାର୍ଟ ଜଳ ପରିଚାଳନା ବ୍ୟବସ୍ଥା କାର୍ଯ୍ୟକାରୀ କରିଛି। ଯାହା ଫଳରେ ସ୍ଲାଗ କୁଲିଂରେ ମୋଟ ଜଳ ଗ୍ରହଣ ଓ ଜଳ ଉପଯୋଗିତା ଉଲ୍ଳେଖନୀୟ ଭାବେ ହ୍ରାସ ହୋଇପାରିଛି।